COVID19 KARA ZIRLAI NUN

Khawvelin hripui a hriat ngai loh a hmachhawn. Rethei leh hausa, mi fing leh mi â, a lian a tê a thliar lo, hmun tin a fang chhuak - a rah chin chu a ram a nih zel. WHO meuh pawhin he hripui ninawm leh ninhlei Covid-19 lakah hi chuan 'mask vuah tur, kut silfai tur, mahni inah tawm tur' tih bak sawi theih a nei lo; dawl zawrin a zawr a ni.

Mihring nitin khawsak dan nunphung a thlak a, a tibuai ta vek a ni hi. Mi zawng zawngin kan tuar a ni. Thil dang kan tawrhna hi chu dah ṭha rih ila zirlaite tawrhna hi ngawih bosan mai chi a ni lovang le!

Zirna in zawng zawng an khar avangin duh emaw duh lo emaw zirlaite ina tawm a ngai. Thingtlang lam aṭanga harsa tak chunga zirna avanga khawpui pan ve ṭang ṭang ho pawh an puanthuah tela haw leh rih a ngai ta. School ṭhenkhatin online-in class an kal a, mahni in lum aṭangin class an kal ta a nih chu. Hemi in-a zirlaite a tihchhiat turzia hi sawi theih pawh a ni lo, chuta kara zirlai tam takin handset an la nei lo, hmun ṭhenkhata mobile network a ṭha tawk lo, thingtlang hmun ṭhenkhatah phei chuan network a awm lo hrim hrim. Chumi hote chuan engtin nge online class an kal ve tak ang? Ava manganthlak ta ve aw! Hetia kum khat/hnih kan kal ringawt pawh hi kum 10 hnua rah duhawm lo tak kan hmu ngei dawnin a lang.

Nitin School/ College/ University-a kal ṭhinte ina tawm char char a ngai ta mai hi a manganthlak tak zet - ti thei lah kan nei der si lo. Rilru leh taksa hriselna a nghawng ngei a rinawm. School thla khat lek han chawlh pawh hian kan rilru eng emaw chen chu a lo muhilh hman ṭhin kha a ni a, kum hnih (session hnih) dawn chawlh a ngai ta mai hi zirlai rilru muhil kaihthawh leh tur chuan a awlai lo ngawt ang, ṭhenkhat an muhil hlen mai ang tih pawh a hlauhawm tak zet.

Zan rei tak thlenga zir ṭhin school naupang tam tak chu social sedia-ah nundan an zir a, hmuh loh tur an hmuh a, an hriat lo tur thlengin an hria a ni - a nghawng a namai lo ngawt ang. Zing hma taka tho ṭhin zirlai pawh 'zir tur a awm lo, engnge ka zir ang?' tiin a duh chen chen an mu ta mai. Chhunah lah mobile games nen hun an hmang a. Assignment tlem te te bak tih tur, class test tih vel awm tawh hek lo.

Lehkha zir duhna tak tak thinlung kha zirlai naupang tam tak chuan an nei tawh dawn loin a lang. Kan hrânghlui hlaphuah thiam Rokunga’na, “Hriatna, thiamna, finna ram saw,” tia chilpûta a lo râlthlir doh doh ṭhin kha, kan hlat telh telh dawn niin a lang.

Khua a tlai hmain kan sawrkar leh zirlai pawl hruaitute ṭangkawpin hmalak dan kawng ngaituahin an rilru seng se la, a ṭul dan a zirin mithiam leh a ngaina hriate rawn bawk se. 'Engtin tin emaw' tih dan tur kawng dap se a ṭha ngawt ang. Zirlai naupang tam tak an muhil mek a, a ṭhen phei chu a muhil hlen tawh mai thei a ni.

J. Beikuzo