Sorkar fakselna lam ve thung
Covid-19 hri leng kara Mizoram sorkar chet vel danah hian eptu lam (opposition party) chuan a sawiselna tur an hre thei hle mai. Ruling hi chuan opposition lam lo chhân (counter) hi an thupui ber a ni ve leh bawk a, ka mimal ngaihdana lai (neutral view) aṭanga sawiselna ka chhanna leh sawifiah zuina lam point pali ka rawn thur chhuak ve a ni.
1. Sorkar ka fakna chu thutlukna a thlak ngam hi a ni. Hei tak hi miin an sawiselna a ni a, mahse kan sorkar hian a rorel tawh chu ṭha lo tia miin an sawisel chuan a ngaihtuah nawnin a thlak leh mai ngam tlat. Sawiseltute chuan, "Sorkar ve si a le lo, dinna pawh a nei lo, a thu a thlak reng mai," an ti a - mipui hma an ngaih vang zawkin an dinna an thlak ngam a ni.
2. Thuneihna sem zai kawngah sorkar kal dan hi a fintlak ka ti a, hei hi mi sawiselna keiin ka fakna a ni. Chief Minister Pu Zoramthanga hmuh tur a awm lo, pawisa chiah a dawng a, a office ah a pawisa dawng lai thlalak chiah kan hmu titute hian Health minister Dr R Lalthangliana fakna an han sawi zui zat zel a. Pu Zorama tan engkim tih theih a nih loh bakah a kum a tam ve tawh avangin hri leng kara lo chhuah ve fo a ṭul ber lo; a thawhpui Health Minister fel tak kutah a dah a, an inbe rawn reng tho vang. Hei hi thuneihna insemzaina zawk a ni. CM hian tih vek tum se, "Health Minister awm ve reng si a ring ngam lo," tiin tuna phun phun hi chu an phun leh tho ang.
3. Random test chungchangah Dr Thiamsanga demna social media hrang hrangah kan hmu hnem hle a, ani khan zep nei lovin huaisen takin thil nihna dik tak a sawi a, fak mai tur a ni. Thiam takin han chhang pial vel se, a kaihhnawih miah lo tehkhin thu nen politician takin (typical politician) han sawi kawi vel se mipui zah lohna zawk a ni ang. Sorkarin pawisa a nei lova, enkawl sen loh positive hmuh ṭeuh a hlauhawm a ti ve a ni mai, ti zawngin pawm ila, a fakawm tlat a ni.
4. Sorkarin pawisa a nei lova, sorkar hnathawkte pawisa a dil, tih hi sawiselna atan tak an han hmang ṭhin a, tuna kan sorkar ni lo eng sorkar pawhin tun hunah hian ro hi rel se pawisa hi kan nei chuang lovang. Chuvangin, sorkar hi pawisa neih loh vanga dem tur a ni lo, kan dem theihna zawk chu pawisa nei anga an insawi te, pawisa tamzia an sawi fo te, Minister ṭhenkhatin project lian tak tak an la sawi reng erawh hi chu a demawm zawk chauh a ni. Pawisa neih loh hrim hrim hi chu sorkar demna tur a ni ka ti hran lo.
Lalmuanpuia