MIZO ṬAWNG HAUSAKNA
Mizo hìan thumal (words) hi kan ngah lo hle a, hei vàng hian thumal lama hausa tak tak hnampui ṭawngte nen Mizo ṭawng hi tehkhin hleih theih a nih lohna lâi a awm ṭhin a; amaherawhchu, thumal hi ngah ve lo mah ila, kan thumal neih chhunte hi daihzai taka hman theih turin Pathianin mi a lo duansak thung a; hei hi Mizo ṭawng hausak vena lâi pakhat chu a ni àwm e.
Noun: Kan noun thumal tam tak hi verb leh adverb leh adjective atân kan hmang thei a. Entir nân 'nula' tih hi noun thumal ni mah sela, "Kimi pawh a nula ve ta," tia kan sawinaah hi chuan 'nula' hi verb atân kan hmang daih a, "Remi pawh tlangval-hovin an chhaih nula der tawh," tia kan sawinaah hi chuan 'nula' hi adverb atân kan hmang thung a; "Nula thawmhnaw a inbel," tia kan sawinaah hi chuan 'nula' hi adjective atân kan hmang ve leh ta thung a ni.
Verb: Kan verb thumal tam tak hi noun leh adverb leh adjective atân kan hmang thei a. Entir nân 'ṭap' hi verb thumal ni mah sela, "Khuti lâiah khuan ṭap an awm," tia kan sawinaah hi chuan 'ṭap' hi noun atân kan hmang daih a, "Naupang chhaih ṭap ziah suh," tia kan sawinaah hi chuan 'ṭap' hi adverb atân kan hmang ta thung a, "Naupang ṭap kha ngaihsak rawh," tia kan sawinaah hi chuan 'ṭap' hi adjective (participle) a ni ve leh ta thung a ni.
Adjective: Kan adjective thumal tam tak hi noun leh verb leh adverb atân kan hmang thei deuh vek bawk a. Entir nân 'hmelṭha' tih hi adjective thumal ni mah sela, "Hmelṭha hi chu hmuh an nuam," tia kan sawinaah hian 'hmelṭha' hi noun atân kan hmang daih a, "Kungi hi a hmelṭha," tia kan sawinaah hi chuan 'hmelṭha' hi verb atân kan hmang thung a, "Ka hmu hmelṭha riau che," tia kan sawinaah hi chuan 'hmelṭha' hi adverb atân kan hmang ve leh ta thung a ni.
Heng entirna tlêm tê kan han tàr lan chin aṭang chauh pawh hian parts of speech-a nihna nghet nei kan thumal hrang hrangte hi, sentence-a kan chelek dan azir zirin nihna hran hran neiin an che kual vêl thei tih kan hmu a. Hetiang hi a nih avàng hian Mizo hìan thumal (words) hi ngah ve lê lû lo mah ila, kan thumal neih chhun ang angte hi an dahzâi êm êm vek a; hei vàng hian thumal ngah si lovah chuan Mizo ṭawng hi hemi kawng bikah hi chuan hnam dang tam takte ṭawng âiin a hausa bik a tih theih hial àwm e.
Thumal ngah lamah hnam dang tam takte ṭawng angin Mizo ṭawng hi hausa ve lo mah sela, kan ṭawnga thumal kan neih chhunte hi an daihzai bikzia leh an hlut bikzia hi hriain, an nih phung leh an awmzia te hi zir chik peih ila; thumal kan neih sa dip chhe zâwnga thumal awm sa hrûla thumal suak lo chher ve phêt tum lovin, ṭhangthar chhùan lo la awm zel turte tân kan thumal neih sate hi roh takin a humhalh hna i thawk ngawrh zel ang u.
PC Thang Zikpuia