INKHELH A LA HUN LO!

Mizoram chhungah active case mi 3876 an la awm mek a, inkhelh an phal hi ka thlawp thei lo.

Scotland-ah chuan Euro kaihhnawihah mi 1,991-in Covid-19 an kai thar a, ngaimawh tham a tling. Hri leng a la reh lo chunga Wembley Stadium-a entu zat an ti tam pawh sawiseltu an tam reng a ni.

Mizoram dinhmun han thlir ta ila, active case mi 3876 an awm mek. Covid-19 vanga thi 93 an awm tawh bawk avangin he hri leng hi nam nul mai chi ala ni lo tih a chiang.

Covid-19 posi­tive pakhat hian kaih­hnawih/ nghawng a ngah hle ṭhin a ni. Chhungte leh chenpui nei vek kan nih avangin contact neih miah loh hi a theih loh tluk a ni a, vanduai vanga positive pawh an chhungte quarantine an ngaih bakah RT-PCR hmanga test vek an ngai.

Tun dinhmunah RT-PCR hmanga test man hi Rs 1,200 a ni a, mi pakhat positive in a nghawng hi kan ngaihtuah chian a ṭul. Positive contact chu a thlawn vekin an test a, sorkar sum a hek tho. Test man chauh a ni lo, a buaipuitu CMO, ZMC leh Task Force tan hna a awm belh ṭeuh. PPE, motor veivahna, thawktute hlawh leh a buaipuitute ei leh in zawng zawng chhut chuan sum sen hi a tam viau zel a nia.

Mi pakhatin contact 10 nei ta se, RT-PCR hmanga test man hi Rs 12,000 vel a ni ang. Hei chauh hi a ni lo a, chhungkua pahnih pathum quarantine phah an ngai a, dan angin ni sarih chhung tal khung a ṭul - inhlawhfa chhungkua an nih chuan sum ṭhahnem tak an chan dawn tihna a ni. Entirna hi mi pakhat chauh a ni a, Aizawla veng zawng zawngah pakhat chauh pawh hi awm se a nghawng hi a lian asin.

Vanduai vangin Covid-19 a inkai darh thei tih kan hria a, hna­thawhna aṭanga kai a nih chuan pawm dam a awl. Chutihrualin leng, chaw ei khawm leh thildang a nih chuan a thinrimthlak a, infiamna vanga inkaidarh pawh pawm dam a harsa dawn. Mahse sorkarin a phal miau chuan ka pawm tlan mai a ṭul si.

Chutihrualin hri kaiin hniam lam kan la pan miau loh avangin hna kan thawh theihna tura kan inthlah dul hi chu ka thlawp hle. Covid-19 tluk zetin hri leng vanga kan ram sum dinhmun ṭha lo sa hi nasa takin a chhiat belh ang tih a hlauhawm. Fimkhur takin hna thawk ila, inkhelh erawh la insum rih ang u. Hetihlai hian zun thlum, thisen sang neite chu contact nei loa mahnia insawizawi a ṭha viau.

Sorkar pawh hian inkhuahkhirh rei tawh mipui rilru tih thawl nan inkhelh a phal a, a duh ber erawh inkhelh loh a la ni reng. Inkhelh a phal rual hian inkhelh loh hi a phal nasa a nia.

Lalzarzova