Hlawhchham Hlâu Suh!

A châng chuan kan thil tum-ah kan han hlawhchham hlâwm tawp a. Thil tum tak ngial pawh nei hlei thei lo khawpte pawhin kan hlawhchham bawk ṭhin. Kan beisei a zùzí fo a, kan thawhrimna pawh a thlâwn tawp mai niin a lang ṭhin. Hlawhchham miau chuan bân san zui mai duhna thinlung kan pû a, kan theihna leh remhriatna chenin hmutsitawm niin kan hria a. Mahni insitna leh inkiltawihna boruak nelawm loh zetin min tlâkbûak a. Khawvel hi huphurhawm zo vek ni hian a lang ṭhin.

Hlawhchhamna hian thil pawimawh tak a tar lan ṭhin chu kan nunah thil thar a lo thlenna turin ke kan pên tih hi a ni. Tum pawh nei ngam lo tán hlawhchhamna a awm lo. Tum nei ngamte nunah hlawhchhamna kan hmu ṭhin a. Hmalam pan duhte leh thil thar duha eng emaw bei ṭhinte hi an hlawhchham ṭhin. Rahbi thar eng emaw sûala umzui ngam ṭhinte hian hlawhtlinna phu em em mahse hlawhchhamna tel loin an kawng hi a famkim lo!

Min hlawhtlingte chanchin tingaihnawm em em ṭhintu chu hlawhchhamna a ni a. Malsawm tlâk nun neitute kawngah hian hlawhchhamna hian khêl loin bû a khuar ṭhin. Khawvelin a ngaihsante nun hi eng tik lai emaw kha chuan hlawhchhamna thuhnuaiah a kun ve tlawk tlawk tawh a. Eng ang mi nge an nih tih tifiah turin hun harsa takah hlawhchhamna nen an lo inpakhat fo tawh ṭhin. Malsawmna hi a hlut em emna chu mi tumruh leh dik taka thil tiduh mîten an inhmeh zual bîk hi a ni a. Chumi atan chuan hlawhchhamna hi an rahbi pawimawh leh an nun tichheltu a ni.

Engkim bansantute tán hlawhchham theih a ni lo a. Kan thiltih mêka kan hlawhchham chuan, "Pên khat chauh talin aw," tia hmalam kan la pan vang a ni. Kan nuna thilthar kan beisei ngam avangin kan hlawhchham a. Kan nun hi eng emaw kawng tala hmasawnpui kan tum hian hlawhchham turin 'kan tling ve' a ni chauh zawk. Hlawhchhamna hian mi chak a chawk tho ṭhin a. Amaherawh chu thatchhiatna a thawhpui erawh chuan min rap bet a, kan lungno kâi chhuakin mahni insitna a thlen a, mi tling lo leh tlâk loah min chhuah ṭhin a ni. Mahse, chumi ep chiah chuan hlawhchhamna hian min fiah a, tu nge kan nih tih min entir tura hmanraw hriam tak a ni thung.

Hlawhchhamna hian ânchhia min lawh ringawt lo a, lawmna min thlen tura chakna min petu, hmasawn tura ke pên ngamtu rahbi a ni tel. Hringnuna zirlai pawimawh tak niin, hlawhtlinna zepui pakhat a ni tih loh rual a ni lo. Kan duh emaw duh lo emaw, kawng hrang hrangah kan hlawhchham ṭhin a. Hei hi kan pawm a ngai. Kan nunah hian kan hlawhchham fo dâwn a ni tih kan hriat a ṭul a ni. Kan theihnghilh theih hauh loh tur hlawhchhamnate, kan hnungtawlh tlat nia kan inhriat theihna tur khawpa hlawhchhamna te, kan mualphopui nia lang hlawhchhamna te, kan mawng min hlim sak ngawih ngawih nia kan hriat ṭhin hlawhchhamnate pawh hi kan nun châwmtu leiṭha an ni fo a. Chu'ng kan nuna a lo thlen theihna chhan chu kan nun hian kan la hawn chhin ngai loh kawngkhar thar a kik vang a ni.

Hlawhchhamnain min hrut chuan zahna fâwnin min khuh a. Hlawhtlinna a au rin ṭhin em avangin hlawhchhamna hi thil ṭawmkai lo tâwpah kan ngai ṭhin. Hlawhchhamna chuan min kâi kûna, hlawhtlinna hmaah uipa dâwih zâwk ang maiin mei khupin a khûr ru hlawk hlawk niin kan hria. Chawimawina leh duhsakna ṭawngkamin a thleng phâk lo a. Fuihna thu ṭha leh lainatna meuh pawh hlawh phâk a nih loh châng a tam mai. Hmuhsitna leh diriamna te, ṭawngkam dêngkhâwng leh elsênna te, hnâwlna leh endawngna te, bihruk san sen loh thlíar hranna nen lam tawrh a ṭul zawk ṭhin. Hengte avang hian hlawhchhamna hi eng tik lai mahin a nel awm loh a. Eng tik lai mahin kan nunah kan lâwm ngai lo. Chak lo zâwk, thei lo zâwk, hlu lo zâwk, tling lo zâwk, thiam lo zâwk, fing lo zâwk leh nêp zâwk nihna târ langtu ni-ah kan ngai a. Kal bo tur leh theihnghilh zui mai zawk tur dinhmunah min hnûk lut emaw ka ti ṭhin a ni.

Mitin hian kan nunah a ṭha lam leh a chhe lam kan nei vek. Kan duh kan chawimawi thiam laiin kan duh loh kan rap bet thiam. Kan duh kan fak a, kan duh chu kan rél mai a. ṭha lam ve vea indawr tawn mihring an inrem ṭhin. Hlawhchhamna pawh hi a nihna pakhat chauh kan umzui ṭhin a. A nihna pakhat kan lâk len em avang hian kan nel thei lo. A chak lohna kan hmuh len em avang hian kan hua a, kan zahpui a, kan thinhrik a ni. Kan hnên aṭangin paih bo kan duh a. Kan nun hi min rawn hnaih miah lo se kan ti a. Kan zahpui a, thil ṭha rêng rêng pài ve lo nia kan hriat vâng a ni. Chawlawlna leh retheihna rawn hnuk hnâitu niin kan hria a. Kan chak lohna leh nêpna min pho chhuah saktu nia kan ngaih avângin kan hmelma en lo thei lo.

Hlawhchhamna hian min vuan a, hneh theih a ni tih min hriattir turin mi zawng zawng nun a buan ṭhin. Kan rahbi pawimawh tak a nih theihna turin kan nunah hian a inlâr châmchî a ni. Hlawhchhamna a lo thlen hian, "Kan nun hian kawngkhâr thar hawnga hmasawnna rahbi thar rap zui turin hma a la tih hlawhchhamna hmanga hrilhfiah kan ni," tih lam hi kan tuipui khât hle. He hlawhchhamna ngei hian kan chakna min chawh thawh sak thei a. Kan nun hi hnehsawh taka phih-awk tur ang hial khawpin hmelma angin rawn inlâr ṭhin mahse, kan hneha kan paltlang erawh chuan chawimawina lallukhum danglam bîk khum turin dawhsanah mî a dintir ṭhin. Hlawhchhamna hian eng anga nasa nge mihringte nunah hian thawnthu ngaihnawm leh hausa a hnutchhiah tawh ang aw! Hlawhchhamna tel lo hringnun chu a khingbai a, hlawhtlinna hlutzia temtu a ni thei lo ang.

Kan hlawhchham hian kan hnungtawlh a ni lo, kan tawlh thlu mai a ni. Tho leh loa kan awmna ngaia kan ṭhut chauhin kan hnungtawlh a ni. Hlawhchhamna hmun hi bul kan ṭanna hmun ṭha zawk a ni thei a. Chak taka hmalam pan zui tura chakna min petu hmanraw hriam tak a ni thei. Hlawhchham hi a zahthlak loh a, tum ngam lo an hlawhchham ngai lo. Hlawhchhamna a awm chuan tumna a awm tihna a ni. Hlawhchhamna hi mihring nuna rimawi danglam daih a ni thei a. Kan nun thawnthu ropui inṭanna a ni thei. Tum ngam ila, hlawhtlinna beisei tlat ila, thawkrim ila–hlawhchham pawh hlau loin. Chuti chuan midangte tán chanchin hausa tak leh thawnthu nung tak kan hnutchhiah thei ang.

C. Lalbiaknunga, Durtlang North