Tunlai ti ti - RAgT chungchang

RAgT test tun hnaiah rinhlehna a tam hle mai. Test summary kan pho lang ang a, a ṭha kan tih leh tih loh chu a chhiartu kutah dah ang.

Mizoramah hian SD Biosenor, S. Korea siam kan hmang a. C-19 Antigen test theihna khawvel siam hrang hrang zingah a sensitivity leh specificity a ṭhat avangin khawvel hmun hrang hrang­ah pawh hman a ni. India ram atana hman theih a nih leh nih loh test-tu Indian Council of Medical Research (ICMR) in an enchhin a, an 'approve' a, an 'validate' hnuah State hrang hrang leh test duhna hmun­ah te lei phalna a pe ta a.

SD Biosensor ṭhat leh ṭhat loh hi khawvel hmun hrang hrang pawh test ve bawk a ni. A sensitivity hi 70 - 80% a ni a, specificity 92 - 97%.

70-80% Sensitivity: A awmzia sawifiah nan Covid-19 hri kai thar tak tak 100 test ta sela. 100 zelah mi 70 aṭanga 80 vel chu +ve tih hmuh chhuah a ni ang. Hei hi positive tak tak. Hetih rual hian mi 20 aṭanga mi 30 chu -ve result a pe a. Hei erawh hi chu false negative tihna a nih chu.

92 - 97% Specificity: A chung ami ang tho hian sawi leh ta ila. A awmzia chu test 100 zelah a hri kai loh test chance hi 97 a nei a, hri kai tlat anga a result a pek chu 100 zelah 3 -8 a ni (false positive).

Mahse 100 test zingah 97 te hi an result -ve vek ta se, a specificity hi 3% tihna a lo ni dawn zawk a nih chu.

Tunlai Mizoram khaw­velah a bik takin Aizawlah, thla hnih aia tam min lockdown hnu pawhin hri kai thar zat a tla hniam thei lo hian mang a ti ang a, a thawpik thlak em emin ka hria. Test tam zawk hi RAgT +ve a ni a, rinhlelh te pawh a awm viau mai. Mahse heti hian kan sawi teh ang, khawvela he test kit an hmanna ram hrang hrang ngaihtuahin keini ram te reuh te, population tlem takah hian a dang viau bik lo ang, ni lo se chu ICMR hian a test kit hi a hnuk let tawh ang.

RT-PCR tluka testna ṭha a awm lova, ZMC-ah chauh test-na hmun kan nei - a pawi hle a ni. RAgT hi ti ta lo sela, ZMC-ah back-log engzat nge awm ang? He back-log chhung hian hrikai thar engzat nge awm ang? Han ngaihtuah ve teh le! Tun ai hian a nasa ang!

RT-PCR hi Covid-19 hri test chauh atana hman a ni lova, hri vei chi hrang hrang (i ngaihtuah chhuah theih apiang) diagnose nan a rintlak ber a ni; tin hri la hmelhriat lem loh hmuhchhuah nan pawhin. Hri vei ka tih hian zuntlum, thisen sang etc a huam lo. Lunglei district-a bun a nih theih nan nawr mek a ni a, a hlawhtlin ngei theih nan theihtawp chhuahpui ila. Kan hlawhtlin hnuah district tinah a khawl leh a khawlin a mamawh hmanrua zawng zawng nei thei turin mipuite ṭang tlang zel ang u.

RAgT test false positive a pek theih 3% leh false negative a pek theih 20 -30% ah hian buai viau lo ang u. Achhan chu false negative a tam zawk avangin, ICMR chuan rinhlelh -ve si te tan RT-PCR a confrim leh tur a ti zawk a ni - a dang a aia ṭha kan neih hma chu. Thu belhchian dawl lo leh thu dik tak ni lo hi thehdarh lo ila. Kan awmna group velah a lo luh pawhin, kan hriat si loh chuan, awih mai emaw forward ngawt zel lovin, google search kan thiam vek a, belchiang hmasa zawk ṭhin ang u.

Him leh dam takin lo awm zel ang che.

Rita Zomuanpuii, PhD (RA, MZU)