Kan dawr khartuten inkhelh an phal!

Covid 19 boruaka Mizoram sorkar thuchhuah tawh zawng zawnga mak ka la tih ve ber chu June 30, 2021 aṭanga outdoor a mi 25 inkhelh phalsak leh indoor a mi 10 inkhelh phalsak hi a ni.

Tunah hian keini dawr kaite chu kan dawr pawh kan duh hunah kan la hawng ve thei lova, kan eizawnna ber ni 70 chuang min khar sak tawh lai hian tute emaw inkhelh mai mai an phalsak si hi rilru a ti na vawng vawng a, hei hi chu hlip leh ngei ngei rawh se.

Kan Aizawl khawpuiah hian dawr lian tam tak awmna chu Millennium Centre a ni a, a chhungah hian mi tam tak eizawnna chu kalh hnan tlat a ni a, sum lakluh nei miah lovin ni tam tak an awm tawh a, dawr neitute hi milian tak tak an awm rual hian eizawnna bul ṭan ve ek ek chauh, loan nena thil ti ve ṭan te pawh an awm tam hle a ni.

Heng mite hi eizawng thei lovin an awm rei tawh a, dawr luah man pawisa tam tak pek chhuah a ngai reng a, sum lakluh awm lovin loan rulh a ngai a, tunah hian inhawn phal sak pawh ni se customer tur pawh an tlem dawn tehlul nen kar tluana inhawn pawh phalsak an la ni chuang miah lo. Tichuan inkhel tura mi 25 an pun khawm luih luih phalsak an ni tho a ni.

Millennium Centre hi chu example atan ka rawn thur chhuak mai mai a ni. Keini ang kawngpui dunga dawr lian vak lo kalpui ve bek bek te tan phei chuan kum hnih dawn kan hawi hil tawh a, sorkar hian inzawrh hi min phal sak ve tawh mai se inkhelh an phalsak tho si chuan.

Indoor-ah mi 10 an inkhel thei a, inkhel chu physical contact te a la awm a, inkhelh laiin mask an vuah hmel bawk si lova, dawrah chuan mi an rawn lut zawka mask an vuah bakah hand sanitizer nen thlap a ni zawk a ni.

Keini ang dawr te ah phei chuan mi 10 punkhawm hi a awm lo hrim hrim a, len pawh an leng lo a ni. Chu bakah hrui kan thlung a, pawn aṭangin min dawr a, indoor lama mi 10 inkhelh an phal hi chuan dawr hi nitin hawn phal tawh rawh se.

Restaurant neitute hi Covid 19 tuar nasa ber pawl an nih ka lo ring ve a, restaurant hi hawn an la phal loh zinga mi a ni a, inkhel tura mi 25 punkhawm an phal chuan restaurant hi hawn phal ve rawh se a hlauhawm lo zawk asin.

Mi eizawnna hi kan sorkar hian ngaihtuah rawh se inkhelh tih vel mai mai ai chuan ngaihtuah a ṭul tawh a ni khawpuiah hian patling rilṭam pawisa nei lote dawr hi khar sak reng ni tawh lo rawh se.

Madinmawia, Ramhlun North