Inkhelh an phal chuan inkhung bik lovang u...

Mizoram sorkar chuan Covid-19 inkaih­hruaina a siam thar berah inkhelh phalna thupek a chhuah tel a, he thu sawisel hlawh tak leh a nghawng theih hi chiang zawkin mahni phak ang tawk tawkin sorkar thuchhuah leh sorkar thuchhuah inkalh tlat dan hi i chhui chiang dawn ang hmiang.

Hemi hnuaia an sawisel nasat ber chu "30.06.21 leh 15.07.21 inkara inkhuahkhirhna hrang hrangte" tih hnuaiah hian table an dah a, chu table-ah chuan - Activities tih an daha a piahah a huam chhung AMC Area, District Hqtrs leh Other Areas tih a awm leh a, chumi hnuaia point No. 6-ah chuan Activities tihah Sports practice (indoor & outdoor) tih a ni a, hei hi AMC area, District headquarters leh Other Areas-ah pawh inang khat vekin Sports practice phal (Indoor-ah mi 10 aia tam lo leh Outdoor-ah mi 25 aia tam lo) tiin a indah a ni. Hri len lohna thingtlangah inkhelh an phalsak a nih chuan a awm viau a, nimahsela Aizawl khawpui hripui avanga chhungkaw tam tak eizawnna tihtawp a nih mek laia inkhelh an phalsak hi chuan mi thinlung hi a khawih a ni tih chu social media hrang hrangah hian a lang a ni.

Sorkar thuchhuah:-
Information Department website lamah chuan sorkar thuchhuah (No.1178/2021-2022) hetiang hian kan hmu a, "Mizoram Sawrkar chuan ni 30.6.2021 zing dar 4:00 aṭanga ni 15.7.2021 zanlai dar 12:00 thlenga hman tur inkaihhruaina thar a tichhuak," tih a ni a, he mi hnuaia inkaihhruaina hrang hrang hi a inkalh nasa hle a ni.

"Zin Veivah Chungchang" tih hnuaiah chuan, "(1) Chhiat tawh, damloh leh ṭul bik thila zin veivah ṭul tan an awmna LLTF/VLTF te hriatpuina lehkha kengin an zin veivak thei ang. Hetiang hriatpuina lehkha neite zin nan hian mimal lirthei leh Mizoram chhung khaw kar kawnga passenger phur lirthei (commercial passenger vehicle) te hman phal a ni," tih a ni a, inkhel tur chuan LLTF leh VLTF phalna a ngai ve lova, sorkarin phalna a pe tawh a ni.

"Mipui vantlang tana inkhuah­khirhna dangte" tih hnuaiah chuan,"(1) Hemi hunchhung hian eizawnna leh ṭul bik thil nilova veivah leh inlenpawh khap tlat a ni. Office kai tur leh phalna neite bak chu tumahin mahni in/compound an chhuahsan tur a ni lova, building khata in hrang hrang luahte pawh intlawhpawh loh tur a ni," tih a chuang. Building khata chengte pawh intlawhpawh an phal loh laiin hmun hrang hrang aṭangin 'inkhel turin' mi 25 chin an kal khawm chu phalsak a ni thung a, a phalsaktu hi sorkar a ni.

He mi hnhuaiah vek hian "(3) Vantlang hmuna kal te chu feet 6 tala inhlata awm tur a ni" tih kan hmu leh ta a, infiamna hmun khelmual leh indoor stadium-ah hi chuan feet 6 tala inhlat hi a harsa dawn a, sorkar dan hi sorkar dan bawk hian a bawhchhe sa nghal a ni.

"Thlai/ chawhmeh bazar kalte thawl tak leh midang nena inhnaih lova an bazar theih nan chawhmeh zuartu te ṭhutna inkarah feet 6 tal hmun awl an zuah zel tur a ni," tihte a awm a, hetianga ruahmanna siamtu bawk hian indoor stadium chhunga badminton khelh a phalsak avangin Covid-19 hi sumdawngte/bazara inphote tana harsa tur bik hian an duang em ni?

Mitthi versus inkhelh:-
"Inneih inkhawm leh Mitthi Vuina" tih hnuaiah chuan "Mi 30 aia tam lo. Ei leh in sem phal a ni lo," tih a ni a, hei hi ngun deuhin han zir chiang teh le. Chhungkaw pa ber a thi ta hlauh mai a, fa pali a nei a, a fate chu nupui pasal nei tawh an lo ni bawk si a, an chhungkaw bil pawh chu mi 30 chu an ni der mai. A thi-a unaute leh an kawm chhak chiah te, an kawm thlang chiahte pawh kal belh dawn se awlsam takin 50 an tling mai dawn a, nimahsela kan sorkar dan chuan mi 30 bak punkhawm a phalsak si lo. Mahni ṭhian ṭha pawh kan vui thei lova, mahni laina hnai tam tak vuinaah pawh kan kal thei lova, sorkarin mi 30 bak a palsak loh vang a ni.

Tlai lamah khelmualah ṭhalai punkhawm phalsak an ni a, mi 25 chin phalsak an ni a, thihna aia inkhelha an phal zat tlemna chu 5 chiah a ni. Inkhelh hi chu thil ṭul leh pawimawh tak pawh a ni lem lova, thihna hi chu mihrig nuna kan hun pawimawh a ni a, kan sorkar danah chuan inkhelh hi thihna aiin an dah pawimawh a nih ber hi mawle!

Ṭul bik thil chu inkhelh
"Hemi hunchhung hian eizawn­na leh ṭul bik thil nilova veivah leh inlenpawh khap tlat a ni. Office kai tur leh phalna neite bak chu tumahin mahni in/compound an chhuahsan tur a ni lo," tih hi sorkar thupek a ni a, mahse inkhel tura chhuah chu phal a ni lawi si a, chuvangin inkhelh hi chu ṭul bik thil a ni.

Whatsapp titi lamah chuan sorkar dan duangtu zigah hian badminton inkhelh chak tawh tak tak an awm avangin inkhelh phalsak hi a mak lo an ti a, hei chu titi satliah mai mai lo ni hram rawh se. Eizawnna dawr kha leh chen kha khar a ni tawh a, tunah pawh a ni inchhawka hawn a ni a, picnic spot leh hall liante pawh khar a la ni a, tute emaw man chawia futsal khelhna chu hawn phalsak a lo ni leh si hi rorelna mak tak chu a ni.

Veng ṭhenkhat LLTF te chuan an veng hall leh an field-a inkhelh an phal chuang lo an ti a, sorkar aiin LLTF chu an lo fimkhur zawk hlauh a, a lawmawm a ni. Tunah hi chuan inkhelh hi ṭul bik thil ang maiin an phal a, sorkar hian hri darh zel hi a hlau tak tak lo a nih chuan inkhung hi e ṭulna a la awm em ni? Dawr hawn hun bi tuk hi a ṭulna a awm em ni?

Lalmuanpuia