TUN ṬUMA ASSAM NENA KAN BUAINA HI

July ni 2, 2021 (Zirtawpni) khan kan party (ZPM) hotuten Assam nena ramria buaina a hmuna tlawh a, zirchiang turin mi pathum min tir a. PC Vanlalruata Secretary General, B. Lalchhanzova General Secretary leh kei (Lalmuanpuia Punte, General Secretary) te kan kal a.

Vairengte tui lakna pump house, Aitlang luikam PHE gate-ah 1st IR an lo duty a, a hmun thleng kal an remti lova, Vairengte Police Station-ah DIG, Lalbiakthanga IPS leh Kolasib SP, Vanlalfaka Ralte te nena inhmu zawk turin min tir chho a, anni nen chuan inkawmin thil awmdan te kan sawiho a ni.

Tun ṭum buaina leh Assam lam rawn thawh dan hi ṭum danga buaina thleng tawh ṭhin dan nen a danglam riau a, ṭum dang buaina aiin Assam Police pawh hi an rawn thawk ripin kiltinah rawn beih tumin min rawn nawr niin a lang. Vairengtea kan awm lai ngei pawhin Assam Police te chu hmundang, hmana naupang bona, Lailapur chhaklamah an rawn kal leh thu report a awm avangin Mizoram Police te chu lo dang tura an intirh mek thu Police hotute hian min hrilh a. Chumai ni lovin Assam Police te hi Chief Minister Office aṭanga order an hmuh avanga lo thawk ni ngeia an lan thu Police hotute hian an sawi bawk a ni.

Pu Zoramthanga kaihhruai MNF sorkar Cabinet meeting-in 1875 ramri chu kan ramri dik tak a nih zia an pawm thu an lo pass kha a lawmawm hle mai, Pu Laldenga hova remna thuthlung sign phatsanna ni mahse, ram leh hnam tana ṭha tura thiltih a ni a, a lawmawm a ni. Cabinet meeting meuhin an pass chu ti hlawhtling a, a taka luah ngei turin theihpatawpin hma an la turah ngai ila. 1875 ramri tihlanna official map sorkar hian siam bawk sela, Mizoram mipui rilruah kan ramchin dik tak hrechiangin ka rilruah intuh nghet se a duhawm khawp mai.

Assam nena kan ramriah hian buaina tenau deuh a lo chhuak zeuh zeuh tawh ṭhin a, tun ṭum anga state khat sorkar CMO meuh aṭanga buaina irhchhuak nia lang hi a la awm ngai lo. Chuvangin kan hma lawk, july ni 9-a state pahnih Chief Secretary ve ve te Delhi-a inbe tur pawh hian awmzia a nei thui lo mai ang tih a hlauhthawnawm ta hle a, chutih rualin kan Chief Minister Pu Zoramthanga'n ramri buai chinfel dan tur thuruk a hriat kha a hman hun a thleng dawn chiah niin a lang thung a ni. Hruaitu ṭha, ama hoa Cabinet meeting meuhin an pass tihlawhtling a, kan ram dik tak, 1875 inner line chin luah thei leader a nih leh nih loh fiahna tur a lang chiang dawn ta hle a ni, theihtawp a chhuah ngei pawh beisei ila.

Vairengte khu Mizo mipuiin kan pawm loh, tuna Mizoram map kan hmuh ṭhin, UT map-a Mizoram hmar tawp zum lai taka awm a ni a, tuna kan buaina hmun, Assam Police leh kan lam Police te ramhnuaia buk saa an inkhuarna lai khu Vairengte khawpui aṭanga chhimlam hret, sipai camp - CIJW zawn vel a ni tih ka sawi lawk duh. Ramri chungchangah hian buaina a chhuah ṭum leh buaina a chhuah loh lai, englai pawha kan ram humhalha ṭan la mar pat reng ṭhin Vairengte mipuite huaisenna leh inpek zawhna hi a lawmawmin an fakawm takzet a ni. Ram inchuhah chuan a taka luahtu nih hi a pawimawh êm avangin Vairengte khaw mipuite khuan ram an nawr zau nasain an luah zauh sawt em avangin fak leh chawimawi an phu takzet a ni.

Assam CM thar hi Mizoram mipui, kohhran leh pawl zawng zawngte duh loh em em CAB pass a nih theihna tura nasa taka hma latu, tuna Mizorama rorelna chang mektu MNF party thawhpui, NEDA Convener a nih avangin a ni leh kan CM Pu Zoram­thanga hmalaknain Union Home Minister Amit Shah pawh Mizoramah CAB campaign in a lokal hial a nih kha, khatih lai khan BJP sorkarna state dangah pawh Amit Shah kha a kal thei lo. Chuti khawpa kan CM pawhin a lo thlawp ṭhat, CAB pawh Mizoram kohhran, mipui leh pawl zawng zawngte duh loh em em chunga Mizoramin Lok Sabha-a kan MP neih chhun vote tirtu Mizoram CM Pu Zoramthanga hian a thawhpui, NEDA Convener, Assam CM hi a hmin theih ngei ka ring tlat a ni.

Pu Zoramthanga hi Naga hel pawl NSCN (IM) te a deal na lama lo zui hrep tawhtu ka nih avangin a experience te a ropui hle a, a duhtawka a duhzawng sawina hun remchang a neih phawt chuan thil sawifiah thiam zet a nih avangin a duhtawka thil a sawi tak tak chuan hnamdang chu a hmin hneh ṭhin hle tih hretu ka ni. A duh a, a vei a, rawmi a vei ang zeta a vei ngat chuan ramri sawifel chu a duh leh duh lohah a innghatin ka hria, a sawifel thei khawp ang.

Lalmuanpuia Punte