Raju-a dan beh

Nikuma Mizoram leh Assam te ramria kan buai laih laih avanga Mizorama lut tur motor dan beh a nih khan Lailapur-a Raju-a dah tir a nih thu kha a lar hle a, kha kha fiamthu nuihza emaw kan tih laiin buaina an chinfel dan en kha chuan thil tak tak kha a lo nih hmel a, Assam lama lirthei an dan kha Silchar aṭanga inṭan ni lovin lailapur-a Raju-a tih tir mai mai a lo nih hmel a, tuna kan ramri buai nen hian a inzawm dan a awm thei a ni.

Assam Police in Mizoram an rawn lut a, Mizoram chhungah ngei mai silaite kengin anmahni ram a nih zia an rawn show kha an ti a, kha kha an buai ṭan chhan kha a ni a, Vairengte ṭhalai an lo duai lo nasa maia an zuk nawr ta huka he mi lai tak mai hian Assam ho in sak tam tak pawh a kang tel hluah hluaha (a haltu erawh hriat a ni lo) kha khan Assam lam kha a ti thinur dawn emaw kan tih kha Lailapur area vel bak kha an lo thinur miah lo a nih hmel ta a ni.

Ka Mizo thinlung tina em em tu zawk chu nikuma ramri a buai khan kan hotute kha a chingfel tur niawm tak khan Vairengte kha an han pan khawm a, political party hrang hrang kha an kal vek niin ka lo hria a, ruling lam chu Minister te kha an nih avang khan an VIP bawka kan Police te kha thla an han lakpui a, silai nen khan an han lang vela Mizo mipui kha kan thla kha a muang nghal suai suai a, mahse Raju-a dan beh motor kha an chhuah tir thei reng reng lova.

Lailapur thing­tlang khaw tereuh tea Vai pakhat con­trola awm pawh zuk su kaw thei lo Minister rual leh politician rual (Ruling leh ling lo tel vek) kha Raju-a pawh ngam lovin a chhakah Police silai bulah thla kan lo la vel mai mai a lo ni, a ho khawp mai.

Tuna kan ramri buai hi chu Raju-a tih a ri ta lova, kan hotute hian Assam hotute zuk bia se a ṭha ber mai.

Lalremruata