DAWN TISEI KRISMAS

Krismas leh kumthar lawmna hunpui kan hmang zo chu a ni leh ta reng mai a. Nimin lawkah hlim leh am takin ruaipui kan theh mup mup a, tunah chuan ṭhahnem ngai em ema ni tin hnathawhna lamah bul ṭan a ngai leh ta a nih hi.

Khual khuaa hnathawk leh lehkhazir ṭhinte tan chuan khuangpui leh khuangte inchhawn buk buk thawm benga a la reh fel hma hmain mahni khua chhuahsan a tul a; rilruah masi thlen in leh ruai theh ni tlai ngaihtuah reuh reuh chungin khualzin zawng kan zawh chhunzawm leh ta. Party leh politics lam buaipuitute tan pawh inthlan kum te a ni bawk a, thawhphan nei lo va vir kual nghal char char a hun viau awm e.

Kristian kan nih hnua kan hunpui ber krismas kan hman tawh dan zawng zawngte ngaihtuah let hian krismas leh kumthar hi kan hmang nasa mah mah lo maw tiin ka ngaihtuah ta deuh a. Kan phak leh tlin tawka hman a that em em rualin a tam zawk fe hi chuan kan tlin bak bakin he hunpui hi kan hmang thin a, kum khata kan retheih ber thla pawh January hi a ni awm asin. Min chhandamtu pianna hun leh kumthar lawm ni mah ila, kan mimal nun, chhungkua leh kan ringtu nun thleng mai pawha a ṭha lo zawnga nghawng a neih dan hi kan ngaihtuah tel ve a ṭul hlein ka hria.

Mi tlem te tih loh chu tleirawl tih deuh phawlh hunlai nei vek kan ni a. Mipat hmeichhiatna kawng kan zawh tan hun te, ruih hlo leh zu kan tih chhinna bulte han ngaihtuah letin khawvel thil taka krismas leh kumthar lawmna kan lo hman ve vang a ni duh khawp. Krismas laia piangthar ai chuan piangthar sa da leh te hi kan tam zawk hle mai thei a ni. Kan phak ang tawk leh kan zawh ang tawk tein hmang ni ila hum sual kan dai tan bik lo tur hi a ni a. Amaherawhchu, hlimna duh mihring nun hian kristiante hun puiah pawh tisa takin hlimna a lo zawng ve chiam ṭhin a, khawvel thilah mit a lo tikeu ta ṭhin a ni.

Tun hnuah chuan chhungkaw nun ngaihpawimawh nachang kan hre ta deuh zawk a. Hman kum lawkah te kha chuan nu leh pa tam takin mahni fate engtin nge an khawsak ve ang tih lam ngaihtuahpui lovin lenkhawmna in lamah emaw, chhung leh khat ṭhiante tlawh kualin emaw an kalsan mai mai a. Hlim taka an lenkhawm avangin an fate pawh him taka awm turin an beisei thla rawk a, mahse an rin ang a ni lo. Nu leh pa mitmei ven tur a awm tak lovah chuan siai tak ei tiin khawi khawiah emaw kan lo pingpei kual a, a rah chu kan hre hlawm ang chu.

Tunah pawh kan hunpui ber a nih avangin ur chikimin kan ur lawk a. Chhungkaw member tin ten thawmhnaw thar, thil thar neih tumin ruahmanna kan siam a. Ei leh in lamah nise a tui ṭha ṭha, kan hmuh phaka a changkang ber ber ei tumin list kan siam a. Thingtlang lama zu in mi ten an lo bilh lawk fir fer a, khawpui deuha mite chuan wineshop khar a nih hmain a tam thei ang an lo lam lawk dim diam bawk a.Thingtlang lam te khawpuiah kan bazar a, khawpuia mite pawh an chenna aia khawpuiah an bazar ve lehzel bawk a. Kan ban phak piah hreta mi neih hram chu kan duhthusam ber a ni hlawm.

He hun hi sap lem kan channa hun ropui tak a ni bawk. Tlangsam par te, tlaizawng parte hi kan rama krismas ti-krismas-tu an ni ngai a, mahse tunah chuan hmun an chang ta meuh lo. Krismas tree kan ti a, tual to thing zar ten sap-ho tree a an loh avangin kan lung a dum lo va, hmun dang a mi kan chaw lut chiam a. A cheimawina tur takngial pawh kan la intodelh loh avangin vai siam tho kan hman a ngai. Mahni in leh a vel chei mai duh tawk lo vin biak in, tuallai, thlanmuan leh hmun remchang apiang kan chei vul chuk a, ropui tak a ni. Krismas lai hi sap ramah chuan vur sur nasat hun a nih avangin an krismas hlimthlaah vur a tel lo thei lo. Kan ramah chuan vanlaiphai, champhai leh thenzawl velah bak vur a tlak miau loh avangin vur lem te kan siam chawp a, vur tla hian ti-krismas ta riauvah kan ngai ve ta a ni ber.

Birthday kan lawm chuan kan lawmsaka te pual a nih avangin an tan thilpekte kan hlan thin a ni ngai a, mahni lam kan inthuam thar ve chuk ngai lo. Nimin maiah pawh Isua birthday kan lawm a ni a, a neitu lam thilpek pe ta lo chuan mahni lam kan inhaivur chiam thung a. Mi hlim nu pakhat an sawi fiamthu ang deuh khan kan hlim chhan Isua pawh kan hre chang lo lek lek thin awm e. Ka birthday min lawmpui tura lo kal ten kei min ngaihtuah chang lo lekin an hlimna lam chauh ngaihtuah se ka tan chuan a lawmawm hauh lo vang. Ṭhenkhat ruiin buaina siam ta se, ṭhenkhat lah ui leh ar ang maiin lo inmawngzawm kual vel mai mai ta bawk se; a nih loh leh ṭhenkhat lo chatthla ngit nget ta mai si se engtin nge ka ngaih ang ni!

Kan ro hlu ber berte Amah chibai buk nana hmang lo va mahni lam inhaivur nan kan hman avang te; Bethlehem lam ngaihtuah leh tin zawn miah lo va a piannaa hman kan lo tum ve phet te; A ropuina thuam hlihsaka mahni lam kan inbel ṭhin avangte hian, “In krismas leh kumthar lawmna zozai hi ka tan eng nge a ṭangkaina awm? Ka tana ti ni awm taka a let beisei ru si a miretheite thil inpek ṭhin pawh ka lawm lo ve... In thla tharte leh in hun bi nei kutte chu ka rilru chuan a hua a ni: ka tan thil hnawksak tak a ni; tuar ka ning tawh e,” min tihkhum ve dah ang e, i fimkhur deuh teh ang u.

R.Lalfakawma, Seling