Eiruk thup nân thiltih hmanga lungmuang an tam ta!
Mizote aia Pathian ram thilpêk pe nasa hnam hi an tam bik vakin a rinawm loh. A eiru nasa sate hian ṭhahnem an ngai zual emaw tih mai tur zuk ni tlat a! Kohhran lah chuan lawm takin an thilpêk an la pawmsak zui a!
Joint Director niin concrete building chhawng tam tak a sa lûr thei a, a fate lah phaiah lehkha a zirtir fai vek thei bawk a. Chumi piahlam-ah missionary a la chawm zui a! Pathian mi hriat ka ṭhiannu chuan an missionary chawm tur a va len luhpui ṭuma an in chhûng boruak pìk a tihzia min hrilh lawi a!
A in sain sikul ram a nêk mai a ni lo, a pawt hek nasa mai a. Mahse, kohhranah tangka leh tha hmangin nasa takin ṭan a la a. Rawngbawltu nihna leiin thilpêk kawngah a thawhhlawk hle bawk. Sikul lama thawkte erawh chuan eng lai mahin an Pathian mi hmuh thei ngai lo!
Mizoramah hian sual tih thupna hmun ṭha êm êm mai pahnih an awm a, chungte chu kohhran leh NGO hi an ni! Aizawl lama kan kohhran pakhat, sawrkar hnathawk lian lawi tamna chu thilpêkah an sâng rem rem hle a. Nimahsela, an kohhran hruaitu lû ber nupui chuan, "An tih angte hi chuan ti ve duh ni ila, keini pawhin kan ti ve thei ang chu!" a ti!
Eiruk chingte hian khawtlang leh kohhran tân insen an hreh lovin an thilphal hle a. A bik takin kohhranah hian thilpêk an pe tha thei hlawm hle mai. Pathian ram zau nân tiin an bungruate lah ui reng an nei ngai bawk hek lo. Heng an thiltih avangin an chungah kohhrante kan lawm ṭhin a, eirukna hi kohhran leh khawtlang hian kan vulh lian tial tial a lo ni!
Kan eirukna laka lan mawi nân missionary chawmin Pathian ram thilpêkah ṭan kan la a. Chung kan thiltihte kaltlang chuan Pathian thinurna lak ata fihlim mai turah kan inngai ta hial niin a lang. Sawma pakhat mai pawh ni lovin a aia pe tam pawh an awm hial a. Tehtu dik tak chuan in thawhlawm avang hian hremna chu in tân a bikin a khêk tho tho dawn a. Lawm taka in thilpêk dawngtu kohhrante pawh a zilhhau hial ta ve ang!
An in leh lo ropui tak takte chu kohhran leh ṭhalai tân hman uina reng an nei lova. An hman chhun chhunah lah ei tur tuihnai tinreng nen an lo mikhual a. Khawtlang pawhin kawmiti nân hmangin an chungah lawmthu kan sawi ṭhin. Hengte avang hian a ni, eiruk chingte hian zahna chang reng an hriat loh a, mahni inthiam lohna pawh an neih theih tak loh ni!
Tangka sûm ngainat hi sual tinreng bul a ni si a!
Lalremliana Pachuau