DURTLANG LEITAN LEH KAWNG CHHAK KHAM HI

Nunna atana hlauh­awm hi chu, ni mai mai rawh se, tih chi pawh a ni lo. Himna kawng awm thei kan zawn vat vat a ngai a ni.

Kan hriat angin tun hnaiah kawng chhak lung tla vangin nunna hlu tak chan a ni a, hman deuh lawk khan motor park lai, lung tla in a delh chhe tawh bawk.

Kawng thlang lam khamah accident tawk an awm thin vangin, kawng thlang lam tlan liam theihna chu, theih ang angin, foot path hmanga a dalna siam a ni tawh. Kawng chhak lam hi hma lak ve ngei ngei chi a ni.

Mite chuan: Phai lama zin ṭhin chuan mi thiltih dan kan hmu ṭhin ang. Pune leh Mumbai inkar Express Highway khu, tlang ram laih tlang a tam khawp mai a. Durtlang kham aia kham hlauhawm pawh an laih tlang zingah a tel. An lung pawh keini lung aiin a chang fe zawk, chuti chung chuan motor 4 a ruala tlan ham ham thei khawpa zauvin an lai a. Kawng chung lam kham sang tak tak chu, thir net hmangin an tuam chhuak vek asin.

Kan rawtna chu: Kan kawng ko sang zawng zawng chu kan rawt ngam ve lo. Khawpui chhung kawng tal erawh chu, kawng ko sang zawng zawng hi, mi tih danin thir net hmangin i tuam ve ang u.

Sum sen tam em em a ngai kher lo ang, mihring nunna hi a hlu lutuk. Mi pakhat nunna chhan nana kan senso zat awm tawk pawh seng ila, a hlauh­awm zual chu kan tuam chhuak thei em em ang.

Durtlang Leitan leh kawng chhak kham hi chu ngaih pawimawh hmasakah i nei teh ang u. Kal apiangin kawng chhak lama side-a tlan hi chuan, hmul thi hi a ding deuh chem chem reng mai asin.

Vanduaina zawng kan dang thei lo chung hian, dan theih chin chu kan nei ve tho. Mite pawhin an tih theih chu, keini Mizo thluak fing hian, mite aia tha pawhin kan siam thei ngei ang. Hmalak nachang kan hriat loh vang mai mai niin a lang.

Lalrinliana Colney