Pawisa awm lo kara pawisa hmanna!

Mizoram sorkarin a hnathawkte pawisa a dil hma lawk khan Mizoram sorkar chuan Lawngtlai lamah ei leh bar zawnna leh mipui din chhuahna tur ni miah lovah cheng nuai hlir 12,044 man project an hawng rup mai.

He project hi in awih loh chuan media hrang hrangah a inziak a ni. Heti zat zat pawisa hi Mizoram pum pawh ni lo Lawngtlai tan bik, chutah pawh chuan sports tan bik sawi chhuak thei sorkar kan nei hi kan fak dawn lawm ni le?

He sorkar bawk hian Mizorama Covid-19 hri a len laiin random test pawh an kalpui ngam lova, chu chu a chhan dik tak Dr Thiamsanga, MLA chuan sawiin a video pawh en theihin a la awm a ni. Chu video-ah chuan random test neiha positive hmuh chhuah an tam chuan a enkawlna senso a hautak dawn a, chu chu sorkar sum neih loh vangin test kal pui ngam a nih loh thu a sawi. Hei hi cheng nuai hlir a sing bia sports hmun hma siam tumtu sorkar tho kha an nih avangin a nuihzatthlak ta hial a ni.

Kan sorkar innghahna chu hri vei lai chuan mipui pawisa thawhkhawm a ni a, chu pawisa chu Chief Minister's Relief Fund a ni. Lockdown avanga mirethei ṭanpuina pawh sorkar hian sorkar sum aṭangin a la pe lova, CM Relief Fund an tih aṭang tho hian a pe chhuak a, chu chu kan CM-in a pek ni lovin mipuiin kan pek khawm sa a lo sem chhuak ve leh mai chauh a ni.

Tui connection kan neih hian PHE tui semin tui min rawn pe ṭhin a, a tui petu tak tak chu sorkar a ni a, a tui pu (tui sem) hi chu a rawn herh hawtu ve mai an ni. CM Relief Fund aṭanga pawisa sem hrim hrim hi mipui pek chhuah vek a ni a, a tawpa a hlantu kha sorkar a ni ve mai mai a, sorkar tan inchhuanna tur a awm lo. Tuna District hrang hranga Covid-19 hrik ennaa TrueNat khawl pawh hi mipui lei tho a lo nia lawm mawle, sorkar pawisa ngah tak anga insawi tan chuan a zahthlak asin.

He sorkar tho hian cheng vaibelchhe 118 man tur Mamit District lamah sports thil bawk lungphum an phum bawk tih kan hria a, Lawngtlai leh Mamit lama sports thila sum hmuh an tih hi Pradhan Mantri Jan Vikas Karyakram (PMJVK) hnuai a ni a, kan budget-a mi ni lo a dil chhuah theiha awm sa PMJVK hi sports thil a ni lem lova, health atan pawh hman theih, education atan pawh hman theih a ni.

Kan sorkar hian infiam­na hmunhma buatsaih aiin hriselna leh education hi ngai pawimawh thei se a lawmawm ngawt ang.

C Lalremtluanga