Kum 2017 krismas thlirletna

Halpuah leh Hal mawi:

Kum 2017 Krismas chu buaina leh harsatna lian tham em em awm lovin kan lo hmangzo leh ta a. Engtik hunlai aṭang emawa Mizote pawhin Krismas urlawk zan, kum hlui thlah leh kum thar lawmna nena inmil tlata kan ngaih; mahse Hindu Sakhaw vuantute Pathian biakna nena kal kawp tlat zawk “Halpuah leh Hal mawi” chi hrang hrangte kan hnuchhawn hret hret zel hi a lawmawm em em a. Hma latu kan Police leh YMA lamte an fakawm takzet a ni.

Amaherawhchu, Aizawl bikah chuan kum hlui hlah zanah halpuah hal thawm hriat tur tam tak ala awm cheu mai kha chu khap hrim hrim hi mi tam tak chuan a bawhchhetu nih kan chak vangah ka ngai. Keia lo teh ve dan aṭang chuan halpuah khap kha zaa za chuan a hlawhtling lo nasa a, kum danga kan hal thinte ngaihtuah chuan za a 60 vel chuan a hlawhtlingah ka ngai.

Krismas leh Kumthar kan hman leh zelna turah pawh Mizo Kristian ringtu tha thinlung puin, halpuah leh halmawi chi hrang hrangte hi phum bo hlen i tum ang u. Puak thei thil leh hal mawi chi hrang hrangte hi Krismas kan hman chhan bethlehem ran thlenga Lal thar lo piang nen khan inzawmna pakhatmah an nei lo. Hetih lai hian kan In leh a chhehvel, khawtthler leh Biak In cheimawi nachang kan hre zel erawh a lawmawm a, mihring ngaihtuahna a tihlim a ni.

Kawtthler chei:

Kum 2017 Krismas hman zawh tak kha Aizawl bikah chuan kum hnih thum kal ta ai khan veng tina kan kawtthler chei dan a nep zawk a, kawtthler chei ta lo pawh veng tam tak an awm. Kawtthler cheina a in senso ṭeuh ṭeuh aia rethei leh harsa zawkte Krismas leh Kumthar hmanna atan kan lo insengral zawk a nih erawh chuan a lawmawm hle thung ang. Chuti ni lova, AMC hovin kawtthler cheimawi lawmman an siam tur an puan har deuh avanga kawtthler chei kan inthlahdah deuh a nih chuan thil fuh lo tak a ni ang. Lawmman beisei vang chauhva kawtthler chei thin kan lo nih ngat phei chuan, kan inenlet a ṭul hle ang.

Krismas Hla:-

Mizo culture leh ngaihtuahnaah chuan Krismas hi a ti Krismas tu lai ber chu “Krismas Hla” hi a ni awm e.

Tun hma deuh kha chuan ‘ber’ thla kan chuankai aṭang hian kan pi leh pu, nu leh pate chuan Biak Inah leh lenkhawmnaah Krismas hla sain an zai tui hle ṭhin a. Khatih lai kha chuan Krismas hla sain an zai tui hle ṭhin a. Khatih lai kha chuan Krismas vuakvet boruak pawh kan hman hun chhung a reiin, kumpui tlingleta kan nghahfak Krismas pawh a hlu bik riau ni hian a hriat a ni. Kan Krismas hlate hi a sak hun chhung a rei lo em em a, November leh December thla hun chhung bak chu phur taka sakna hun a awm lo. Chuvangin, a sak hun chhung reilote ah chuan uar tak leh phur taka ngaihthlak leh sak mawlh mawlh a phu a ni.

Thu atana ziak nazawng hi thu a tling zo lo ang bawkin hla atana phuah nazawng pawh hla a tling zo lo. Ṭhangthar ten Krismas hla anga kan neih leh kan phuah lo lar thar ta em emte hi Krismas hla a tling zo lo. Hunpui boruak mila lunglen thu mai emaw, nula tlangval inlemna Krismas hla mai mai pawh kan kurpui ta chiam chiam mai. Heng hlate hi Krismas hla ni lovin, Krismas chhehvel hla mai mai a ni.

Heng kan Krismas hla thar tam tak hian kan tana nau thar lo piang chu chibai buk tir min tum lo a, lawmtir min tum hek lo. Kan hrang hlui Krismas hla phuahtute kha chu an phuah chhan leh chang thlante kha an hmuchiang em em a. Thinlung leh tih tak zetin Krismas hlutzia min hmuhtir bik a ni. An hla thuah ‘Krismas’ tih telh kher lo mahse; an hla thu ruangam leh thlukin Mizo rilruah kan tana Lal thar lo piang chu hlim taka chawimawi turin min tirlui a ni. Tunlaia kan Krismas hla thar phuahtu tam tak chuan, a hla thu leh thluk pawh vawi tam tak phuah nawnin an siam ṭha a. Kristian hlabua chuang, Krismas hla phuahtu hrang hluite kha chuan thlarau thianghlim pawlna changin hun reiloteah hla thu leh hla thluk kha an siam zung zung a, an phuah ni lovin Pathian aṭanga a dawna an dawn a ni.

Bible chang nena inmil lo lutuk kan Krismas hla thar tam takte hi hunin a thlit fim kan nghak reng a, Mizote hi hnamah chiangin, culture-ah pawh kan harh thar hunah chuan a taife paiha a fir tak chauh lak chhuah hun a la thleng ve ngei ang. Chu hun chu nghakhlel takin kan thlir mek a ni.

Mizo Krismas hla pakhat mah thiam chhuak si lo, sap ho Krismas hla leh vai hla ṭhenkhat Krismas laia lo au thlerpui duar duar hote hi hriatthiam har tar an ni. Changkan kan tum lutukna lamah sap ho tihdana Krismas hman kan tum tawh a. Krismas hun a lo thlen meuh pawhin khawpui leh thingtlangah pawh Biak In leh lenhawmnaah Krismas hla sa a zai a tui thei tawh lo. Kan lawm chhan kan tana Lal lo piang chu ngaihtuah nachang hre tawh lovin mahni zawn ṭheuhah hlimhlawp bawl kan tum deuh vek tawh a ni.

Kum 2017 Krismas kan hman zawh takah pawh khan Gospel Camping leh Crusade hnaivaiin a chiahpiahna hmuh chauh loah chuan khawi hmunah mah Krismas hla sa a zai a tui thei tawh lo. Hnam changkan ho hman anga hman kan tum tawhna lamah leh mahni duhdan dana hman kan tum tawh avangin Mizo Kristian culture kan phum bo tial tial tih i hria ang u.

Tun ang zela Kristian hlabua kan Krismas hla thulkhung ṭha leh Kumhlui thlahna hla ṭhate sa chhunzawm zel lova kan mausam chuan, ṭhangkhat a liam leh hunah ṭhangtharten a hriat pawh hre tawh lovin an sak thiam loh hun a la thleng ang. Chumi lalet leh tur chuan beih fet a la ngai ngei ang. Kumin 2017 Krismas leh Kumthar vuakvetah khan All India Radio (Aizawl) tih chauh loah chuan, mi tam zawkin kan thir leh ngaihthlak LPS leh ZONET-a Demand Channel-ah pawl Krismas hla, kumhlui thlahna leh kumthar hmuahna hla ngaihthlak tur a tlem khawp mai.

A hun chhungna na na chuan hengah hian hmu tamin ngaithla tam ila, naupangte rilruah pawh a ṭhena zar chu a intuh nghet ngei ang.

Krismas ti Krismas-tu ber chu Krismas hla hi a ni e, kan tih mek lai hian, tun ang zela kan kal chuan nakinah - Krismas ti Krismas-tu chu ruaiṭheh emaw, silhfen thar neih te, khawi emaw picnic spot leh park-ah chhungkua leh ṭhianza hova intihhlim hun buatsaih emaw, kan tih hun a la thleng hlauh dah ang e. Hawh teh u, Lal Isua ringtu­te tana ni pawimawh ber Krismas leh Kum­hlui thlah a, kumthar kan hman danah hian urhsuh leh a nih dan tur ang thlapa kan hman a pawimawh tawh khawp mai.

Kristian leh Mizo culture ngaihhlut leh chawinun nachang hre thar zel turin zau zawk leh fimkhur takin zirtirna nasa zawk i kalpui zel ang u.

R. Lalhmangaiha, Bethlehem Veng