Aizawl khawpui tawt tih ziaawm

Kan khawpui chhungah lirthei a tam lutuk avang leh mihring nunphung thlenga a lo nghawng tak siah chuan October thla aṭangin lirthei intlanchhawk chu kan hotuten an rel thlu ta rup mai a, a ziaawm ti pawl leh hmasawnna hmu lem lo a insawi pawl kan kat nuk mai. Kei chuan ṭha ka ti khawp mai a, kawnga han kal vel a nuamin lirthei keng tan pawh a hma ang em em chuan lirthei lek hreawm chu a ni tawh lemin ka hre lo.

Amaherawhchu, lirthei zuartu lamin kuhva hralha an bungrua te an hralh zung zung a, lirthei a pun zel si chuan intlanchhawk hian awmzia a nei lo vat dawn a, thla reiloteah ngai kan awh leh mai dawn. Khawpui a mipui an rawn luh belh hian mihring chauh kan pung lova, mihringin kan mamawh thil chi hran hran kan pu lut telin kan in vur belh zawk ta ṭhin. Khawpui a ṭhan si loh chuan kan chep zel dawn chu a nih mai hi. Motor (lirthei) kan lei hian khawlaia veivahna tura lei kan nia, khung bo turin tuman kan lei lo.

Khawvela kan awmchhung zawng, kawng ana dawr leh in a awm chhung zawng chuan kawng sirah hian lirthei a awm reng tawh dawn a. Kawngsira lirthei ding leh riak hi tih rem theih a ni lova, khap theih chi pawh a ni lo. In vengin garage nei vek mah ula ṭhenawm veng an rawn lawi luh chhung zawng chuan in veng kawng sirah lirthei a ding dawn. Mahni in garage nei mah ila veng ṭhenawmah garage kan va nei tawh lo, park na hmun tur hmun rem leh zau hmuh tur awm bawk si lo. Sawrkarin parking lot (building) lian tak tak a siam hunah kawngsir parking hi chu hmalak chi chauh a ni.

Keini aia ram lian leh changkang zawl dei duai-ah pawh thil hlawhtling thei lo, helai kan ram chhengchhe lutuk leh motor kawngpui pawhin a pawh loh in tam lutuk na ramah hian garage neih vek hi thil theih loh hul hual a ni! In tur luih leh in nek chepna chi pawh ni hek suh. Aizawla cheng tam zawk hi mi in luaha khawsa, mahni in leh lo nei lo, chhuak rawh tih huna chhuak nal nal tur deuh vek kan ni a, amaherawhchu, in leh lo nei nen kan thil mamawh chu a inang vek lawi si. Mipui tam zawk mi in luah kan nih si a, mipui tam zawkin lirthei dahna tur sakna hmun kan neih si loh chuan kawng sirah kan hung mai a nih hi.

Veng tinin Biak In, YMA Hall, Community hall eng­emaw zah hmun rem laiah leh laili laiah kan nei vek awm e. Heng kan building lian tak takah te hian lirthei dahna tur inhnuai ber (kawng an) tal hi chu han zuahin han siam vek thei ila chu kan va hlawkpui dawn em. Chhiatni ṭhatni-ah veng dang mi an rawn lawi lut a, kan veng ṭheuhah traffic a jam chu a ni nghal zel mai a! Veng ṭhenkhatah phei chuan lirthei ke li (4) nei nena len huphurhawm khawpin kawng leh veng a chep a, kawngsir a lirthei ding hlek chu kan melh sala nghal mai zel chu a nih hi!

Kan sawi tak ang khian kan building pawimawh tak takah hian parking lot nei vek ta ila, tunah sawrkarin garage neih vek tur a lo ti bawk a, lirthei kan hung bo duak tawh bawk nen parking-ah hian khawi veng mah kan buai ka ring lo. Aizawl khawpui tawt lutuk leh traffic jam nasa lutuk pawh hi a ziaawm ngei ang a, chutah chhiah chawi (parking fee) aṭang kan la lalut ṭeuh bawk dawn zu nia.

Entirna han siam ta mai mai ila, Chanmari Biakin leh Chanmari YMA Hall-ah hian lirthei hunna hmun hi chhawng khat ve ve han zuah sela? A veng mipui mai bakah a venga lawi lutten kan va

ṭangkai pui dawn em, zirlai leh sawlai hnaia office leh mimal dawr tam tak kawng sira lirthei dah ngai lovin lirthei kan hung lut vek ang a, ava thawl nuam dawn em. He programme hi kalpui ngat ila, veng tin hian ngaihtuahna seng ila, sawrkar chet hun nghak mai lo hian mahni veng ṭheuhah hma han la thei ngat ila chu kawng sira lirthei inhung del dul leh traffic jam nasa tak te, lirthei hnawksak tak taka inhung hi a zia ngei ang le.

Saihmingpuia Sailo,(Tapuia sailo) Ramhlun Venglai