Aizawl - Tuirial kawng siam rih lo ang u
Kawng chhiat vanga kan iak kan iak laia ‘siam rih lo ang u’ lo tih chu leh!
Tunah hian Aizawl leh Tuirial kawng chhe lutuk siam tura hma lak mek a nih thu kan lo hria a, he kawng zawh ṭhintu tan chuan hnathawhna tur pawh cheng nuai 1966.39 a nih thu kan hriat khan beng thleng thlenga bawp khaia “Pu Lal Thanhawla... dam reng rawh se” tih dual dualna tham a ni. Amaherawhchu, heti zawng hian ngaihtuah nawn leh ila a ṭha lo maw...
Tunah hian NH 54(Aizawl - Tuipang) kawng zauhna tur hi chak taka kalpui mek a ni a. Kawng zauhin a tihchhiat tur ram leh inte pawh teh fel thawkhat tawh a ni a, road map pawh peih tawh niin kawng zauh hna hi ṭan mai an tum ni awm tak a ni. Hetiang a nih chuan tuna cheng nuai 1966.39 lai senga Aizawl leh Tuirial inkar kawng siam tur pawh hi tihchhiat leh vek a ngai dawn a, sum a va luang ral tam duh awm hem hem ve! Sang tam tak luan ral tir hi a tih chi ber dawn em ni?
Aizawl - Tuirial kawng hi siam a ngai lo ka ti hauh lo va, mahse, rulngan pa ang zara chhuah tum kher hi kan ram sum pai dinhmun nen inmilin kan hre thei chiah em le? Kawng siamtuten sum tam tak senga an siam zawh hnu lawka pipe/ hrui phumtuten an rawn lai chhe leh mai ṭhinte pawh hi a ang dawn dawn e.
Kawng ṭhat lai khan Seling - Aizawl hi darkar khat lekah kan thleng ṭhin a, tleirawl tha za fawr falho phei chuan two wheeler-in minute 45 vel bak hun an hmang ṭha duh lo. Tunah chuan le... tihsual chang phei chuan darkar thum zet te kan thang ta a nih hi! Kawng chhia avanga lirtheiin a tawrhna zawng zawng hi thuhran ni se, Tuirial - Aizawl kawng zawhtuten darkar hnih zet mai hun kan han seng thlawn ta hi sum leh thaah chantir ila, channa nasa tak a ni.
Mihringte a ṭul ang zela insiam rem theia Pathianin min siam hi a lawmawm. Tuna kawng chhe em em maite hian lirthei khalhtute inkarah pawh inhriatthiam tawnna a thlen tlat nia! Kawng khuar lai hela mahni side lo lam deuha kan kal pawhin a hma anga inmelh sa la mai lovin kan innuih sen sen tawh mai a ni. Aizawl lama lo kalten kan khaw kawng chhiat thu an sawi a, keini lam lahin Aizawl kawng chhiat thu kan sawi ve thung a!
Tun hma chuan ṭhal laia kan kalin a khukzia kan sawi a, furah nise kawng khuar leh diak kawi thu bak sawi tur kan hre ṭhin lo a nih kha. Tunah thung chuan ṭhal laia kan kalin ‘a diak kawi lo ve’ kan ti a, fur huna kan kal lahin a khuk loh thu kan sawi ta mai mai zawng a nih hi!
R.Lalfakawma Seling