Sawrkar hnathawk (thlirna tlang dangah)

Sawrkar hna kum 40 (sawmli) zet lo thawk ve tawh ka lo nihna avangte pawh a ni ang e 7th Pay chungchangah sawrkar hnathawkte demna leh selna chanchinbuah ka lo chhiar ve ṭhin a. Sawiselna satliah mai pawh ni lovin hnehsawh deuh deuha demna te ka lo hmu ṭhin a.

Entir nan - ‘lungawina nei lo sawkar hnathawk' tih te leh MZP te pawhin ‘7th Pay a la hun lo' te an lo ti bawk a. Kum 40 zet sawrkar hna lo thawk ve tawh si; hlawh kham lo reng renga ka pension te ka ngaihtuah a. ‘Khawnge’ tiin sawrkar hnathawkte dinhmun kan hriatthiam theih nan tiin ka han ziak ve a ni.

November, 2017 khan Karbi Anglong-ah Kohhran Work Camp-in kan kal a. Kan ramah tomato 1 Kg Rs 100 a nih laiin 20 a lo ni a, Parbawr 1 Kg 20 a ni bawk a, Balu ṭin khat 14 a ni a. Zoram sawrkar hnathawkten tomato 1 Kg Rs 100-a an lei laiin Karbi Anglong sawrkar hnathawkten 20 in an lei a. Zoram sawrkar hnathawkten balu ṭin 1 Rs 45-a an lei laiin Karbi Anglong-a sawrkar hnathawkte chuan ṭin khat Rs 4 in an lei thei. State dang aiin Zoramah thil man a let tam takin a to zawk a nih chu.

Zoram sawrkar hnathawkte hlawh hi state dang sawrkar hnathawkte hlawh aiin lo tam deuh zawk pawh ni se thil man inthlauh dan en hian thil awm lo pawh a ni awm lo e.

Eng pawh ni se, Zoram sawrkar hnathawkte hi anmahni duhthu thua thawk an ni ngawt lova, sawrkar-in mamawh tawk nia a ngaiha a lak te an ni. Anmahni ruaitu sorkar chuan thil man lo sang zel milin kum 10 danah a hnathawkte hlawh a pun ṭhin. 6th Pay hunlaia chartin pkhat Rs. 400 kha tunah chuan 700 te a lo ni tawh a, dal 1 Kg Rs 50 vel ni ṭhin kha tunah 100 a lo ni tawh a. Chumi avang tak chuan alawm sawrkarin a hnathawkte hlawh pawh kum 10 dana a pun ṭhin ni. Tuna sawrkar hnathawk laiten ‘7th Pay min hmantir ve tawh rawh u' an ti hi an duham vang hrim hrima ti an ni lova, an chanvo kum 10 dana an dawn ṭhin kha, 'Min pe ve tawh rawh u, thil man a to si kan indaih to love' an ti a ni mai. Lungawina nei lo mi pamham lutuk ang chuan i puh lo ang u. Pa leh fapa an indawrnaah hian ṭhenawm pa chu lo inrawlh lo hram ila a ṭha in ka ring.

Heti zawng hian sawi leh ila. Kum 10 danah central sawrkarin a hnathawkte hlawh a pun ṭhin. Chumi zulzui chuan state sawrkarin a hnathawkte hlawh a pun ṭhin bawk a. Thlasik anga khel loa kum 10 dana thil thleng a ni. 6th Pay hunlai aṭang khan 7th Pay a lo la awm dawn tih hi sawrkar pawhin a hre sa vek a. 7th Pay hi thil lo thleng thut ni lovin hriat lawk sa vek a ni. Chumi avang tak pawh chuan sawrkar hian a hnathawk zat a hria a, kum tina an hlawh atana a senso ngai zat pawh a hra. Engatinge hman aṭang khan a lo inbuatsaih lawk loh te pawh ti ila a dikna chen a awm viau awm e.

Kan rilru put hmang hrim hrim hi siamṭhat a ngaiin ka hria. Tuna sawrkar hnathawk dem vak vaktute pawh hi an chhungte sawrkar hnathawk awm ve nual sela an ngaih dan a dang mai thei. Entir nan - Pain fa a nei a, a fate mamawh ngaihtuah sak chu a hringtu pa mawh a ni. Fapain a pa hnena kawr thar lei a dil hi a chanvo a ni a, mi dangin, 'dil suh' kan lo tih theih pawh a ni lo - pa leh fa inkar a ni.

Tuna kan thu khel mek 7th Pay pek leh pek loh te leh a pek dan tur chu sawrkar leh a hnathawkte inkar a ni a, ṭhenawm pa i lo inrawlh lo teh ang u. Sawrkar hian a tihdan a hre mai ang.

R. Vanlaldika, Durtlang Mel-5