FAK HUN A AWM

Rempuia R. Lumang thu ziak, Vanglaini Vol. XXXII, No. 147 Dated 29.6.2017 (Thursday) chhuak kha thui tak ka ṭawmpui e.

Mizo ṭawng dik kan tih hi awmna hmuna zirin a inang lo thluah mai. Bahkhawr hi Khakuan ti an awm.

Ar chawkchaweng pawh ṭhenkhat chuan an ti chawk­chawawng nia! Khaw vawt hit mup lah lo ti hik tlat an awm bawk. Zun in miin an vei laiin ṭhenkhat zun chu a lo im ve bawk nen. Kan awmna a zirin Lamkhuang kan ti hluai a, Kawlthei lah Kawiam ah kan chantir bawk. Khaw chhak phaia Char thing an tih leh Mizoram Char thing chu inang lo tak a ni. Chuvangin, Mizo ṭawng dik ber kan tih hi a inang dawn lo hrim hrim hian a lang.

‘Vawiin ni’ tih pawh "Mizo ṭawng kal hmang dik lo a ni,” an ti fo a, chutih laiin kan Bible hi ṭawng zir nan a hman tlak thu an sawi bawk a. Mahse Jeremia 3:25, 7:25, 36:2, 40:4, 42:31, 44:6;44:10. Exodus 13:3, 13:4, Ezekiela 20:29, 20:31, 24:2, Hagaia 2:13, 2:19, Nehemia 8:9, 8:10, Deuteronomi 6:24, Ruthi 3:13, II Lalte 19:3, Isaia 37:3 ah te hian ‘vawiin ni’ an ti ve tho a, a dang a la awm emaw ka hre lo. Tin, 16:25-26 kan chhiar chuan Paula leh Sila te 'chu' ṭawngṭai tir lovin 'chuan' a ṭawngṭaitir hlauh a. Matt. 6:6, 9 a 'chuan' pawh hi 'chu' ti ila a mam zawk ngei ka ring.

Rempuia ‘fak’ thuah kha chuan heti hian sawi ta ila. Fak chu Mizo hnah thlak 'Pawi' ṭawnga 'ei' tihna a ni a. Tukṭhuan emaw, chawchhun emaw zanriah pawh nise kan ei phawt chuan kan 'fak' chu a ni ngei e. Mahse ṭuan leh manga kan hunbi sawina pakhat 'chaw fak hun' hi chu zing leh tlai ni lovin chhun lai vel sawi nan chauh kan hman ṭhin a nih avangin "chawchhun hi chu Pawi ṭawngin kan 'ei' bik a ni ang e," te ka ti ta mai mai a ni.

Chhurbura chuan aium a tibo a, Pawi khualzin lo kal hnenah "Ṭhiana min zawnpui rawh" a lo ti a. Pawi pa chuan "Zei hme? Zei na thlau? Na hawl leng mang?" a ti a. "Eng a? Enge i tihbo a, i zawn chiam mai?" tih ang a ni ang.

Bus a ka ṭhutpui nu chu "Khawnge i kal dawn?" ka ti a. Ani Hmar hnam lo niin ka zawhna a hrethiam lova, "E hmee?" tiin min zawt let a. Ram hnuaiah Lusei pa ram chhuak ho an lo ṭhu khawm a, an titi nak nak a. An chhak lawka Pawi pafa ram kal chuan an thusawi chu hrethiam lovin a pa zawk chuan, "Tuanhrang, rung aw, kan thih nak thu khal an rel a si thei" a ti a, an tlanchhe ta hlawk hlawk mai a.

Ka sawi tum chu heng hnam Pawi, Hmar, Paihte etc. te hi Mizo vek an ni si a, eng vangin nge an ṭawng hi Mizo ṭawng kan tih duh hauh loh le? Zo hnahthlak ṭawng zawng zawng hi Mizo ṭawng ni sela, min khai rual turin Lusei ṭawng/ Duhlian ṭawng hi common language/ official language atan hmang mai ila.

Hei hian Mizo kan in unauna a phuar ngheh sauh ka ring tlat a ni.

C. Chhawnthanga