MIZOTEN RAWMI HI CHIANG TAKA HRIAT A THA E

Mizoram hian Mau (bamboo) ṭha tak tak a nei a, Mau-ah hian chi hrang (species) tam tak a awm bawk a, tun hnu zela kan hriat leh kan hman ṭangkai bik te chu Mautak, Rawnal, Rawthing leh Phulrua te hi an ni. Hetih mek lai hian, Mizoram hian khawvela mau lian ber pathum zinga chhiar tel leh mithiam ten khawvela mau hmantlak ber 25 an thlanchhuah zinga tel pha ngat, Rawmi (D.Sikkimensis) a nei tlat mai!

Mizoramah he Mau Rawmi hi Mizote zinga hrechiangtu tak erawh an tlem tawh hle a, tunah tak phei hi chuan ṭhangthar-ho ten an hre tawh reng reng lo. A chhan chu, mau reng reng hian a kung damchhung bithliah an nei vek a, he Rawmi pawh hian kum 45 dan zela tam thih hun (a kung thih kum) bithliah a nei. Mizoramah hian Rawmi hi kan ngah lo hrim hrim a, kum 1930 hma lam leh kum1975 inkar chhovah kha chuan Mizoram hmun hrang hrangah hmuh tur a awm. Mizoram Rawmi hi duh hun huna a bul kar a, phun nun hi thil buaithlak a ni a. Chuvangin, a kung tam thih kum 45-na ang zela a rah aṭanga a chi (seeds) hmanga tih pun theih chauh a ni. Mizoramah hian Rawmi nei tam tur leh phun pung tura buaipuitu an lo la awm reng reng lova, hei vang hian a kung hmuh tur a vang chho ta hle chu a nih ber hi.

Kum 1975 kha a tam thih kum a ni a, kha mi kum aṭang phei kha chuan hmuh tur a awm mumal tawh lova, hei vang tak hian Rawmi hre fuh lo, la hmu ve miah lo leh a hriate sawi dan hrula inti hre em em- a sawi ṭhin erawh kan awm ṭhin. Zirna lama mithiam kan neih ve te lahin Rawmi hi nikum hmasa (2019) lawk aṭang mai khan an thlir ve tan lek kha a ni si a. Keini a taka kum 1968 aṭang tawha Rawmi chenchilh ṭhintu te thusawi hi chu eng hawi zawng pawha finfiah ngam a ni. Rawmi hrechiangtute chuan a hlut zia leh a ṭhat zia kan hria a, chuvangin, tuna Rawmi la awmna hmun, Tuivawl Phairuam hmuna mi hi nikum 2020 kha a tam thih leh kum (1975 – 2020) a ni a, Mizoram chhunga Rawmi pil bo mai tur ngaingam lovin, a rah aṭanga a chi (seeds) Ramsa (Nungcha) te nena buai tak kara inchuhin, Rawmi chi hi kan khawnkhawm ta kha a ni a.

Rawmi pianhmang : Mizoram tualṭo Mau Rawmi hi Mau kan hriat theih zinga lian ber a ni a, bul khat (a chi kuiṭiah) phun hian bul tam tak a siam thei a, hei hi Raw-hung kan ti. Rawmi hung khatah hian kung sawm bi fe a rawn chawchhuak thei bawk. Mi ṭhenkhatin politics thil taka Rawmi sawi nep tumin, Raw pum khat man aiin a bul phun tur man a to zawk te an ti a. Rawmi tlawn khat hi Rs. 85/- man lek a ni thei lo. Rawmi ṭiak pakhat hi pum tam tak siamtu niin, Rawmi tlawn tam tak leh Rawmi-tuai (bamboo shoots) man tam tham tak ti pungtu a ni zawk.

Rawmi hi Mau lian tak a ni a, a ding nghet em em a, a bulin a kung a lekkawh zo hle. Thil inti hria ten a maha ding ngil ṭha thei lo, dinpui tur (supporters) thing nen lo chuan ding ngil thei lo ang hiala an sawi pawh hi dawt chiang tak a ni. Tuivawl phai lama Rawmi mual, Rawmi hmunpuiah din ngilpui tur thing a awm ngai lo. Rawmi hlang hlak a ding thulh ṭhin. Rawmi hian a changah mit a nei ve lova, a chang a dam a, a pum hi a lian thei hle. Chuvangin, Chhuat atan an chik a, Rawmi dap hian 1 ft. leh a chanve a khuh hlup thei a, Thingzaiphek chhuat aia Rawmi dap chhuat duhzawk khua pawh an awm. Rawmi-Dap-Chhuat hi a mam ṭha a, a tliang hun ṭhin a, eng ang pawhin nawtfaiin, enkawl mah ila, tluk hlauhawm khawpa nal a ni thei lo. Mi ṭhenkhatin Rawmi chhuat hi a nal lutuk a, mi an tlu ṭhin, te an ti mai mai. He thu pawh hi dawt a ni. Rawm-Dap-Chhuatah an tlu rup rup ngawt ngai lo.

Mizoram Rawmi hi kan mau ngah lo tak a ni a, mau lian leh mau chang ṭha tak a ni bawk. Mizote hian Mau dang anga kan hman tam loh avangin emaw, kan hmuh zen sen loh avangin hmanrua atan lian hle mah se, kan hrechiang hlawm lo. Mau duap tak anga sawiho hian Rawmi hung hi han ṭhiat ngat se, an damchhungin Rawmi hi a duap an ti tawh lo tawp ang le! Mau chang ṭha tak a nih leh nih loh hre uk lo hian an sawi duap ve ngawt a ni ber e. Eng chempui pawh hmang mahsela chuti mai mai chuan an sat duap aw-kawng lovang.

Rawmi awm theihna hmun :
Mizoram hi hmun vawt leh zo boruak vawtna hmun chu a ni. Chu­vangin, Rawmi awmna hmun pawh hi zo lam, puallawi hmunah kan hmu tam hle. Mau reng reng hi hmun vawtah chauh an awm lova, hmun lum lamah pawh an awm ṭhin. Rawmi ngei pawh hi phai khawlumna hmunah pawh a awm thei tho. Rawmi a nih bik avanga hmun vawtah chauh awm thei anga sawi hi a dik lo. Mizoram boruak angah hi chuan kan khawlum neihna hmun hi a la lum tak tak lo nge, tuna Rawmi awmna Tuivawl phairuam khawlumna hmun aia hmun dang lum zawk hi chu a awm bik hauh lo. Tunah pawh hian a la awm reng a, chiang taka finfiah theih reng a ni.

Rawmi hman ṭangkai theihna:
Mizoram tualṭo Mau Rawmi hi a pum (Raw-tlawn) a len theih em avang hian hmanna tur a tam bik a, Mizoramin mau dang kan neih nena khaikhin ralah pawh, a ṭangkai hlei viau. Mizoramin mau kan hman ṭangkai dan ringawtah pawh, mau te leh mau lian inthlauh danin a hril. Mautak, Rawnal, Rawthing leh Phulrua te hi hmanrua atana kan hman ṭhinna hmunah, Rawmi hi a hman theih ve vek a, maupum lian tak hman ṭangkaina turah erawh Rawmi a hlu zawk a, a hlawk zawk bawk.

Mau hmanga Paper, Floor Tiles, Bamboo Tiles, Mat Ply, Double Ply etc. siamna hmanrua atan Mizoram Rawmi a hlawk ber a, Mizoram Mautak, Rawnal, Rawthing tih vel hi chu Bamboo Factory atan chuan Rawmi note chumchiap ang lek an ni. Mau hmanga Industry lian thama hman tur atan chauh ni lo, In lam leh Ram lam hmanrua atan pawh mau te zawk put khawm vak vak aiin, Rawmi/Raw-tlawn tlemte hman mai chu a hlawk fe zawk. Cement concrete beam hmanruaah pawh, Mautak, Rawnal, Rawthing hman ai chuan Rawmi hman chu a rinawm zawk a, a do nghet zawk bawk. In ṭha tak tak neitute tan pawh Exteror/Interor-Decoration-Designing atan Rawmi hi a ṭhain, a mawi bik.

Tualchhung, ramchhung leh ram pawn thlengin, chawhmeh atan Rawtuai (Bamboo Shoots) mamawhna hi kumtin a sang hle a. Mizoram chhung­ah hian tuna kan mau neih ang ang aṭanga Rawtuai hralh chhuah tham sengkhawm tur hian engmah tham a awm lo. A chhan chu, mau/Rawtuai duh tawka lak theihna hmun kan tih fo hi a phur­chhuahna leh mihring tha lut belh­khawm hian, buaipui loh law law a finthlak. Chu bakah, Mizorama mau/ Rawtuai kan hmuh phak awmna hmun hi mimal huan-Lo-Ram deuh vek a ni tawh.

Mimal mau/Rawtuai va ruk sak ringawt pawh ni ila, sawngbawl a, thawnchhuah tham Rawtuai kan nei thei chuang lo. Zokhawthar aṭanga Kanhmun thleng rawk pawh mau tlahlang zawng ila, duh khawp lak tur a awm tawh lo. Chuvangin, Rawmi chiah hi Rawtuai atana thar chhuah tham, sawngbawl tham leh hralh chhuah tham nei tura Mizoram mau kan neih zinga kalpui theih awmchhun chu a ni.
Rawmi-tuai (D.Sikkimensis Bamboo Shoots) hi ei atana tui tak a ni, a zawr duh a, a hmin hma a, Rawtuai quality ṭha tak a ni bawk.

Rawmi hrechiang tur a chin :
Mizoramah hian thing leh mau kan ti chereu hle tawh a, thing buaipui aiin, a hlawk hma zawk tur leh kan chhawr hma tur zawk, Mau buaipui mai hi a fing ber. Mizoramah mau dang ching tura buaipui tur pawhin a chi (seeds) hmuh theih hun a hla lutuk. A bul kar ngawt dawn ila, a hmunpui (plantation) daih tur kan inkar mai lovang. Mahni Huan enkawl faina hmun ngeia Rawmi chin a fuh hle.

Mizoram mau Rawmi chinna hmun (plantation) siam tur hian a chinna hmun tur sik leh sa-ah harsatna a awm lo. Ram vawt leh ram lumah a awm thei vek a. Ram/lo vah faina hmun leh thlawhbua samfaina hmunah pawh a chin/a phun theih vek. Thil inti hre tak tak hovin, ram vawtah leh thingkung bulah emaw, ram ngaw karah lo chuan a puitling thei lo, an ti hi chu dawt a ni. Hmunhma fai tluka thil phunna ṭha dang a awm lo. Rawmi hi rangkachak pawh lo ni teh reng se, a sawichhe pawl chuan an sawichhe tho tho.

Zing hma taka thovin, tukverha dak vang vang chungin, “vawiin chu tu nge ka rel ang aw” ti mi hi an awm ve tlat. Chuvangin, India ramah, mau nei ṭha state nih hi a finthlak hle tawh dawn a. Sawrkar laipui aṭanga a bik taka item mal, item bil bik tana sum rawn thehchhuah theihna a ni bawk. Mimal tan pawh, Rawmi hmanga Raw-tlawn hralh leh Rawmi-tuai hmangin, phun aṭanga kum 40 chhung teh meuh thlasik anga khel lova sum hailuh theihna nei turin, Rawmi hi buaipui a, hrechiang tura ngaihven mai hi a fuh hle dawn.

Rawmi hi IMCS Agribusiness Project item a ni a, Agribusiness awmzia hrechiang duh leh Rawmi hrechiang duh, finfiah duh te chuan eng hunah pawh IMCS Nursery Farm Lengte-ah emaw, IMCS Office, Upper Khatla, MG Road, Aizawl hnenah zawhfiah theih reng a ni e.

F. Vanlalpeka, IMCS, Aizawl