Titi phungléng - ramri
India hmarchhak state zinga eng emaw zat hi Assam aṭanga indanga state ni ta kan ni hlawm a; chu'ng state-te nen chuan Assam state hian ramri buai a nei vek niin an sawi. Mizoram nen pawh ramri buai a nei a, ramri bul hnaiah buaina pawh a thleng fo a nih hi.
Mizoram sorkara Council of Minister chuan Mizoram ramri atan Bengal Eastern Frontier Regulation (BERF) 1875-in ramri a ṭhen chu July 8, 2019 khan a pawm a, hei hi Mizo mipui tam ber pawhin kan pawm dan a niin a lang.
BERF ramri hi pawm àwm rêng pawh a ni a, kan pawm lo a nih chuan, ziaka awm pawm tur dang a awm chuang lo. A dang awmchhun lah chu, Vairengte khaw chhungah ramri a kal tlang avangin pawm chi a nih loh thu an sawi ṭhin.
Thil awm dan a inthlâk viaute a nih loh chuan, keiniho dam chhung hian Assam nena kan ramri hi chinfel tak tak a nih ka ring meuh lo a, chief minister ve vete pawh inbia se, chinfel a nih ka ring lêm lo. A chhan chu, keini'n BERF 1875 ramri kan pawm a, Assam tan pawm theih a ni lo. Assam lamin an pawm ve pawh keini tan pawm theih a ni lo.
A tak takah chuan, BERF 1875 ramri hi a tak takin nei dawn ila, kan duh kher lo mai thei. Mizoram ramri atan BERF ramri siam chu pawm mah ila, a tak takah chuan kan ram chin anga mitthla chin hi a awm ve bawk.
Chuvangin, a thuphung anga tuna kan ram chin anga a tak taka kan mitthla chin leh kan luah chin hi lungawipui rih mai ila a ṭha mai awm mang e. BERF-in a sawi chin hi nei tak tak ila, vái a nuai tél awm mekte khu engti kawng mahin kan nawr chhuak dawn si lo.
A tak taka kan ram china kan ngaih leh kan luah chin, kan enkawl chin Assam lamin an rawn nêk a nih erawh chuan na takin kan lo do let ve tur a ni ngei ang. Ka do ngam lo a, kan humhalh ngam lo a nih chuan, min nawr tawm telh telh dawn tih a chiang.
Chutih rualin, BERF hi ziaka awm kan neih chhun, kan pawm theih awmchhun a nih si avangin ramria buaina a awm erawh chuan ṭan chhanah kan hman tlat erawh a ngai a ni.
Ramri hi chinfel ni lo mah se, ṭha tê têin awm tlân theih ni se duhthusam a ni. Ṭha tê têa kan awm laia ani lamin min rawn nawr leh ṭhin a nih chuan, an chêt dan lêta lo do lêt zel a ṭul ta ve ang!
Kezo