Traffic jàm tihziaawm nan

Ni tin lirthei a pun belh zel a, kawngpui lah chu a zîm tulh tulh a. Kan ram khawpui ber ‘Aizawl’ traffic jam-in a tihkhaihlak

ṭhin tih ziaawmna tur rawtna hrang hrang kan hmu tawh ṭhin. Hei hi sorkar pawhin ngai pawimawhin taxi a in tlàn chhawktir hnuah lirthei zawng zawng a number mil ang zelin kan intlàn­chhawk ta bawk a.

Taxi, Maxi Cab leh City Bus intlàn­chhawktir tura sorkarin thupek a chhuah reng reng emaw, an stand sawn leh tidanglam tura boruak a awm ṭhin lai khan dodaltute thawm a na hle ṭhin a nih kha.

Ruahmanna mumal lo vangin Mizoramah hian eng sorkar pawh hrawn ila, traffic jam harsatna hian tawpin tai a nei lo vang. Tunah lirthei zawng zawng kan intlànchhawk chung pawh hian kan harsatna hi a la bo chuang lo a, sorkar hian mut mawh hnar mawhah an neih a ṭul reng dawn a ni.

Tuna New Sec­retariat Complex awmna hmun te, MZU hmun hmâ te, Falkawn Referral Hospital leh Synod Hospital, Durtlang awmna hmun te hi a fuhin a remchâng hle a ni. Heng chauh te pawh hi khawpui chhungah inêkbeng vek ni ila chuan, tun dinhmun ai hian traffic jam hi a nasa dawn a ni. Hetiang deuh hian khawpui chhunga office leh zirna in lûn deuh sawm (10) chauh pawh hi khawpui daifêmah sawn chhuah nise, traffic tawt zualpui hi chu a ziaawm phah sawt ngei ang.

Aizawl Civil Hospital awmna hmun hi a laili hle na a, mirethei leh harsa zawkte’n emergency thilah awlsam taka kan pan zung zung theih a nih avangin hmun danga sawn chhuah hi mipui tam zawk tan a remchâng lo hle. Ni tin zan tin casualty pantu ringawt pawh mi za tel tak meuh an awm.

Aizawl khawpuiah Private Hospital pawh eng emawzat kan nei tawh. Private Hospital bawlhlhlawh leh thli te hi mihring hriselna atan a pawi thei hle dawn a; heng hospital-te hi kawngpui zauhna zel ni pah fawmin, Luangmual lam emaw, World Bank Road velah hian sawn theih ni sela, traffic jam nasa takin a ziaawm phah ang.

Aizawl khawpui chhung kawng sira workshop hnawk zual 42-te hi khawpui daifêmah sawnin, motor parking nei lo sorkar office 40 vel zet awm mekte dinhmun en fel ni bawk se.

Hei bakah ni lênga mahni dawr kawt leh office kawta motor park ṭhinte hian zing leh tlaiah driver-te inhruaitir mai se, tra­ffic jam ni nasa takin a ziaawm phah ang.

R. Lalhmangaiha, Bethlehem Veng