Pathian malsawm tlak leh tlak lo politics

Pathian malsawm tlak leh tlak lo politics mipuiin kan hriatthiam a hun ta hle mai. Rilru in a ngaihtuah anga sawifiah erawh a harsa mai thei a, chhartuten in lo ngaihtuah zui atan pawh a ni ang chu.

MPF-in Mizoram politic kalphung fel lo a vei hle niin a hriat a, tunlaiin khawpui leh a chhehvelah speaker 150 rual zet Presbyterian kohhran chuan cam­paign-in a tirchhuak mek a ni. Heng speaker zingah hian ṭhahnem ngai tak te, sawi thiam tak te, huai­sen tak te an awm laiin venthawn ngah chutiang ni lem lo te pawh an awm ve bawk awm e.

MPF Founder Pre­sident Rev. Chanchin­mawia khan kan ram politic fel lo chu tu mawh nge ‘mipui’ a ti nih kha. Israel-te ah zir tur kan nei a ni. Mipui an suala Pathian an hawisan chuan roreltu lal sual a pe mai a, hrem tlak khawpa an sual hunah an phu tawkin a hrem ṭhin a ni. Kan ram leh hnam pawhin kan hlat lo a ni.

Khawvela Politic malsawmna dawng nasa ber chu Kumpinu (Britain) sawrkar a ni ka ti ve tlat, avang chu kum 700 vel zet Democracy an practice tawh a chutiang karah politic avanga mimal inphiarruk, inthah, intualvuak tih te a awm ve lo. Khawvel chanve awp theia an sipaite an fehchhuah ṭhin lai pawh khan Lal Isua Chanchin Ṭha hrilin an missionary-ten an zui nghal zat zel a ni. Keni rama an lo thlen dan pawh chutiang chiah chu a ni. India ram kum 140 an awp chhung pawhin politic avanga inthahna a thlen kan hre lo. India independence hnuah chuan sawi sen a ni lo. History kan chhiar chuan Europe ram te pawh Britain ang chu an awm ve lo. USA meuh pawh an filhim lo, Parliament an neih ṭantirhah pawh speaker leh senator pakhat chu inhnialin pistol draw-ah an incho zui a, speaker chuan a thih phah a ni.

Mizo ramah politic lo luh dan chu a nem chi (evolution) ni lovin a hram chi (revolution) in a lo thleng a, lal ban phutin lal in vawm leh tharum hman hreh lo in kan nu leh pa ten bul an ṭan a ni. Mizoram buai chhiar telin tun thlenga Politic avanga tuar, tang, thih phah chhiar tham kan awm ve tawh a ni. Mizote kristianna leh a chang changin thlarau lam harhtharnain min chim ṭhin lo se kan politic boruak a vin hle tawh mai thei a ni. Chutichung chuan India ram state te zinga corruption hluar berna pawlah kan tel zel a ni.

Mi hausate leh retheite inkar kak a zau sawt hle a, Mizoram mihring 60% vel te mimal kum khat sum deh chhuah Rs 2900/- vel chauh a nih laiin 40% te sum lakluh chu Rs 19000/- lai a ni thung. Ruling MLA vawikhat term hmang tluan thei rethei leh an awm lova, Minister chin hausa lo an awm lo bawk, state hnuaia CM term hmang zo chu multi-million aire tih tur an ni. Tunhma a MP tla thei lo Ahmedabad-a Reng Lalnu tih angin inthlan dawn hma niah thlawhnain mi chhe vengah pawisa an la thlak ve lovang tih a sawi theih loh.

NLUP/ NEDP/ SEDP tih te hi vote lei dan mawihnai mai an ni. Mipui­in sual an sim loh chuan lal sual, phakar, nuisang chunga tual that hreh lo, sermon thlak zui thei zel pawh a pe thei a ni.

Kelkang harhna in Mizoram a tuam chhuah kum chu kohhran lian ber synod sum budget target phak loh kum a ni tlat. Synod revival election campaign in eng nge a hrin chhuah dawn hriat a ni rih lo. Pathianin Israel-te a hmangaih a, mahse a thikthu chu chhe tak mai a ni. Khawvela Israel-te chanchin hriat theih china an tawrhna zozai te hnam tam takin an tlin lo ang. Mipuiin kan sim loh chuan Pastor Chhawna sawi thim thuah hnih khawvar lam arsi ang pharh dam khawchhuahna tur thlen tir turin roreltu sual Pathianin a hriat hnam, thik khawpa a hmangaih, siam ṭhat nan a hmang thei reng a ni. Pathianin keimahnia a duh chu setana’n a lei theih loh tura sim hi a ni.

C.Zama Khawlhring, Dinthar