Bial vil

Kumin chu MLA inthlan kum a ni bawk a, Kumthar ruaiṭheh tur hnatlang ti ti pawh inthlan rim a nam ṭan a, khawilaiah pawh politics-in sawi a hlawh ta. MLA inthlan dawna ngaihnawm ka tih ṭhin chu party candidate ruat hmaa rin dan insawi siak lai vel boruak hi a ni a, keini ang politics hre thui ve lo chuan an sawi hnuhnun apiang hi kan awih zel mai dawn a nih hmel.

Aizawl chhim lamah hian mi pakhat hausa deuh mai a awm a, tun hmaa MLA candidate pawh la ni ngai lo a ni awm e. He ruling pa hausa hian a theihna apiangah a thil neih (JCB etc) te thawhin MLA-a din a tumna bial chhungah a hnatlang char char mai an tih chu mawle. Pawisa a ren lova, a neihin a tlin bawk avangin a bial hual hi a vil hneh hle an ti.

Aizawl tlak lam veng ṭhenkhat pawh hian bialtu MLA leh bialtu nih ve tum MLA tun term chhung zawng hian an nei char char an tih bawk chu mawle! He bial hi eptu lam chan a ni a, ruling lama pa pakhat hian a bial angah ngaiin kum li chhung chu chhiatni ṭhat niah a phusa ber a, pawisa han thawh maina tur chi zawng zawngah a thawh a, a neihin a tlin bawk a, an MLA neihin a tlin bawk a, an pahnih hian pawisa an inphawrh chhawk sek bawk an ti a, MLA inthlanah chuan a ngaihnawm ve ngawt ang.

Aizawl chhuahlam bial pakhat pawh hi MLA candidate nih inbeisei eptu lam pa pakhat hian rei tak chhung chu a lo vil tawh a, a leng kual nasain mi a tlawh taima a, mipuite hnenah pawh thil chi hrang hrang sem tawhin a bial tur thawthangin a vil a ni awm e. Tichuan, he bial tho hi eptu lam ticket beisei ve tho pakhatin tun hnaiah a ‘hmangaih’ thar ve ta a, a sem theih theih a sem a, chu chu duhtawk lovin media lam thlengin, “Hei Krismas thilpek ka pe e,” tiin a au tir a ni awm e. Bial vil pahnih an intihsiak dawn a nih hmel khawp mai.

Aizawl hmar tawp lamah hian mi chal­lang tak pakhat chu a leng taima riau an ti a, an sorkar laia an hotupa ber ni ṭhin a ni nghe nghe awm e. Ani pawh hian Krismas chibai a sem mai piah lamah he lamah hian rilru, tha leh sum a pe riau niin an sawi.

Ruling lama mi pawimawh ber pakhat hian a dinna tur a la zawng a, bial pathum velah thilpek a sem nual tawh an tia. Aizawl hmar lama veng lian tak pakhata an sports lama senso atan nuai chuang fe hi a thawhin a thawh tawp mai a ni awm e, chutihlaiin he pa tho hian Aizawl tlak lam hla deuhte pawh a tlawh deuh chhen a, Champhai lam kha chu a kal khat ta deuh niin an sawi bawk.

AMC lam Coun­cillor, MLA emaw inti ta maia bial lo vil leh lo tlawh ve ṭhinte thlengin an awm bawk niin an sawi a, inthlan kum a ni bawka a ngaihnawm chho dawn a ni.

Lalṭanpuia