"Kan dawr khartuten inkhelh an phal" chhunzawmna
Madinmawia, Ramhlun North khan thiam takin "Kan dawr khartuten inkhelh an phal" tih kha a rawn sawi tawh a, sorkarin mahni in aṭanga ṭul bik thil ah ni lo chhuah a phal lo chunga inkhelh a phal avangin inkhelh hi chu ṭul bik thilah a dah tawh tihna a nih hmel thu tiel leh titau titih khan a rawn ziak a, sumdawnna leh eizawnna dawr pawh hawn hunbik chep tak siam sak laia nitin mai an inkhelh luih luih an phal a dem thu a sawi kha tuihnih ve ngei ka duh a ni.
June 30 hnuah pawh Covid avanga thihna a la thleng chhunzawm zel tih hre chungin inkhelh an han phal ngawr ngawr lai hi ka dem lova, ka dem na ki ve erawh zawk chu dawr hawn hun an la siam si hi a ni. Dawrah hian mi an pungkhawm tuau tuau ngai lova, inkhelhna playground ah zawk hian mi an insi tuau tuau a, a chang chuan an inkuah nawk nawka chutah chuan Covid hlau si lova kum khat chuang sumdawnna dawr kharsak an nih tawh hnu a tun thlenga dawr an la khar zel hi chu sumdawng pawl tan hian au chhuah ngei na tur chi a niin ka lo ralkhat hriat ve mai mai a ni. Keini ang pa chengvawng lo tan chuan vawiinah eng dawr hawn ni nge? Dar engzat ah nge an khar? tihte hi kan hre seng lova, dawr hawn leh khar dana khuahkhirhna siam tu hi sorkar hnathawk thla tina hlawh la, Covid-19 avanga a pawisa lakluh kiam ve miah lo a ni ngei ang a, sumdawngte hi chuan kum khat chuang an lakluh hi nasa takin a tlahniam a, dawr luah man an pek tel phei chuan sumdawng tam tak hian tlak chhiat (Bankruptcy) hi an hmasak ka ring tlat a ni.
"Sorkar hian inzawrh hi min phal sak ve tawh mai se inkhelh an phalsak tho si chuan," tih hi ka point tak chu a ni. Dawr hawn huau hrim hrim hi chu Covid-19 hri leng zel avang hian a ṭhat pawh ka la ring chiah lova, mahse he sorkar tho hian inkhelh mai mai (tournament a phal lova inkhelh satliah a phal lawi si a ni) a phalsak tho avang hian kan nih nih ni tura eizawnna khap ber (dawr khar) hi chu hawnsak ve tawh mai se, inkhelh pawh ngaimawh tawh lovin mi dawr hawn dan tura thuneihna lekkawh chunga eizawnna tibuai thei ruahmanna la siam lui tlat hi chu dodal ngam a ṭul zawk a ni. A sawi dan ki dangah chuan, "INkhelh hi phal lo se dawr hawn hun hi kan pawm thei ang. Inkhelh an phal hi chuan dawr kan hawn hun, kan eizawnna rei tak kalpui theih loh kan kal pui hun hi chu min khuahkhirh tawh bik suh u Pu Sorkar," an tihna a ni.
Restaurant neitu ni ta la i dawr luah man nen khan ngaihtuah la an khar rei tawh lulai sin, sorkar aṭanga ṭanpuina package pakhat pawh pe thei lovin inkhelh phal siin restaurant khar sak hi engti ngaih chi nge ni dawn?
He thil hi thil serious tak, mi eizawnna tlachhe tawh leh tlak chhiat hmabak te chhungkaw nun thlenga nghawngtu a nih avang hian inkhelh tihtawp a nih loh chuan dawr khuahkhirhna tihtawp ve nghal hi sumdawng pawl hian an demand ve ngam dawn lo vem ni? Pawl hminga luanchhuahna lam ai chuan hengte hi an pawl din chhan a nih zawk hmel a ni.
David Lalremsanga