Ṭhalaite nun leh Christmas

Pathian khawngaihna zarah kum 2018 chu kan lo chuangkai ta a, a lawmawm hle. Lusun khawhar leh ruih hrang hrangin a tihbuai chhungkua te erawh chu thinlung takin an tawrhpui a ni.

Naupang, ṭhalai, nu leh pa ruih hrang hrang tite hi ka vei ve ṭhin hle a. Hei vang hi nge ni nu leh pa tam tak hian an harsatna te min hrilh ve ṭhin a, tih theih erawh chu a tam ṭhin lo hle. Krista piancham lo thleng tur hi rilru taka an huphurh ṭhinzia min hrilh fo a ni. Hunpui lo thleng a ruih hrang hrang tite nakin hun zelah kan ven theihna a nih beiseiin he article pawh hi kan ziak a ni. Nu leh pa tam tak chuan hunpui lo thleng tur hi thin phu dep depin kan thlir ṭhin a ni. Amaherawhchu, tun ṭum Christmas kan hman erawh chu kum dang ai chuan a lawmawm. Ruih lam ti ṭhin naupang, ṭhalai, nu leh pa kum dang ai chuan kan fim tlang a. Kum dang ai chuan khawlai leh hmun dangah inhawr khawm luih luih an tlem. Kumdang ai chuan zak lo leh pawr taka rui an tam lo. Hmun zawng zawngah chuan a dik lo mai thei, mahse a tlangpui a lak chuan boruak muanawm tak a ni.

Mi dang tana harsatna siam pawh an tam lo. Khawtlang duty te tan pawh kum dang ai chuan buaipui tur tlem tak a ni. Kum dangah kha chuan nu leh pa Christmas dawn insen nen, fa te ruih avanga rilru hah nen, hunpui lo thleng hi thuah hnih/ thuah thuma lung ngaihna a ni fo. Vawi khat nun hloh pawizia hretu ka ni a, ka van lawm em. Ṭhalai mahni nun tichhe duh pawh an tlemin a lang. He tiang a nih zel dawn chuan nau piang lawm leh Kumthar lawm pawh a phurawm sawt mai.

Nakin zelah ṭhalai te leh ruih ti ṭhin te kan ven na a nih beiseiin a hnuaia point te hi kan tarlang teh ang.

1. Pathian malsawmna a ni. A hnenah lawmthu i sawi ang u.

2. Ṭawngṭai mite vang a ni. Ṭawngṭai mite tha thlah hauh loin i bei sauh sauh zel ang u.

3. Nu leh Pa te kan lo fing deuh ta. Fa te khuahkhirh kawngah kan ṭhangharh a, a ṭha hle. Hei i chhunzawm zel ang u. A nachang hre lo te pawh i harh thar zel ang u.

4. Kawn leh hmun hrang chei tlem hi a ṭha niin a lang. Hmun chei a ti vak mai hian rilru a ti zauthau a, in control a har. Naupang leh ṭhalai mai pawh a ni lo, nu leh pa pawh min ti zauthau. Thil chei hian vah chhuahna a ti tam a, vah chhuah na na chuan thil ken tel a ngah a, pawisa pawh a hek.

5. Jerusalem Isreal khaw­puia puan a ni hian hun hnuhnung lam nia ngaihna min neih tir a, hei hian minti cool deuh em ni.

6. Kohhran ṭhenkhat chuan ṭhalai leh youth lam he hunpuiah hian chanvo kum dang aiin kan pe thiam a, hei hi thiam taka chhunzawm zel chi a ni. Kohhran ṭhenkhatah chuan kohhran programme ni tho siin ṭhalai lam an hruai tir a, chu chuan nasa takin ṭhalai leh tleirawl a hip bet niin a lang. An vak mai mai tur eng emw chen chu a veng a ni. Kum dangah chuan nu leh pa chauh tel theihna programme a tam lutuk a, ṭhalai tan chanvo a tlem. Ṭhalai phur theihna lam leh an chanvo tur lam i ngaihtuah thar zel ang u. Nu leh Pa ten phurpui thiam i la. Nu leh pa ṭha sa te chu ngaihtuah awm lo zawk kan nih kha. Ṭhalai te hi kan man beh thiam a, kan tih fuh chuan Kohhran bakah tuallai nun thlengin hmun nuam a ni dawn a ni.

He tiang lam nakin zela kohhran beng tivar turin midang te pawh hian rawn thai lang ve se. Christmas leh kumthar lawm te hi ṭhiah chi a ni si lo. Amaherawhchu, mi tam takin ruih lam tih thar nan leh nun inthlahdahna hun tura an ngai tlat ṭhin hi ṭhiah dan i zawng teh ang u. Ngaihtuahna tak tak sen a ngai a ni. Hlim ta, nuam tak, huap kim sia hman dan i zawng teh ang u. Mahni mai in ngaihtuah loin, harsatna tawk te i ngaihtuah tel ang u. Central YMA leh Kohhran te pawh inpawh tlang taka thil sawiho a hun ta em? Hunpui leh hun lawmawm a nih theih nan. Pathian rawn chung zelin.

CL Hluna