BJP awmzia leh ka hmuh dan
BJP Party dinchhan leh lo pian chhuahna bul ber chu India ram hi Hindu Lalrama siam a ni tih kan hria a, he mite tichak tura ṭan lo lak ve vak mai hi chu Hindu rawngbawlna ṭawiawmtu kan ni thei mai ang em le?
Chuti chuan BJP chakna hmang ṭangkaia hmalak tum hi hmelma chawikan a, thunun let tum ang leh ngam loh chala chil hnawm kan ang thei mai lo’ng maw... Sangha pawh hian nghakuai tel lova a sa tawktarh chauh ei tumin a chuk keuh keuh ṭhin a, a tawpah chuan a pumin a dawlh leh nge nge ṭhin a, an duh duhin an khai chhuak leh mai ṭhin. BJP te hian state tinah sorkarna lo siam ta sela Kristian te hian kan hlawk pui ang nge kan chhiat pui dawn?
Chutiang zelin Yoga te pawh hi a tirah chuan taksa sawizawina atana an hmang te pawh a ni ang, tunah erawh chuan a hmang chhuaktute ngeiin Hindu sakhua serh leh sang pawimawh takah an lakluh tawh avangin sakhaw dang tan tih ve a rem zan tawh lo a ni. Hindu sakhaw puithiam tih dan kha Kristian puithiamin zir ve zel mai ta sela a fuh ber ang em?
Kawngsira thing tuluang tlu reng ṭhin mipuiin an rah huai huai pawh hi thingzaitu in a chan sawm a pulpit mawi takah a siam a, ṭawngṭaina nen an hlan thlap chuan thing thianghlim leh zahawm a lo ni ve leh mai ṭhin. Sakhaw dang tan phei chuan chuan kai ve fo chi a ni tawh ṭhin lo ang hian.
Puan than inang reng pawh hi a thui dan a zirin ṭhenkhat tan chuan hak chi hliah hlaih a nih laiin ṭhenkhat tan chuan hak chi hauh lohah a lo chang thei ṭhin a ni.
Puanthanin sualna a nei lo ang hian Yoga hian sualna a nei lo a, BJP-in sualna a nei bawk lo. Kristiante tan a tihawm leh awm lo hi a awm ve mai ṭhin zawk a ni.
C. Lalṭanpuia, Chanmari