Bawngkawn brigate field & sawrkar ram te hian Chhantu an ngai em?

Hmanni lawk khan Sakawr­tuichhun lamah pawimawh thilah ka kal a, khu lam

aṭanga a lan danin Bawngkawm Brigade Field vel hi lei laihna vung tharlam tak tak mai a lang sen huam mai a. Helai hmunah hian sawrkar hmalakna sawi leh hriat a awm pawhin a lang si lova, mimal in sak velna lei vung mai ni turah ka ngai a, mi ṭhenkhat ka han zawh vel pawh hian chu chu an ngaihdan a lo ni ve tho mai.

Tin, helai thlalak ka neih te hi a hun leh ni ka hre thei ta mai lova, nimahsela, kum thum - kum li liam ta inkarah lek pawha a danglam nasatzia hi a mak khawp mai tih chu a hmuh theih a ni. Tunah chuan a field kotlangah hian mimal in building pawh a lo dak chhuak der ta mai niin a lang. A chheh vel ram hi a zau ropui mai si a. Hetiang hian mi pamham leh chuh chak apiang hamṭhatna hmun a ni ta mai mai em ni ang tih min ngaihtuahtir a.

Hman deuh laia Baptist Biak In sak mi tuten emaw an tih chhiat chungchang chanchinbu vela chanchin lo lang awmna hmun vel thleng pawh khan sipai ram luah area chhung hmun vek a niin an lo chhuahsan tawh emaw la chhuahsan lo emaw pawh ni se kan sawrkarah hian venghimtu emaw humhalhtu emaw tu emaw tal an awm lo em ni ang le? tih hi ngaihtuahnaah a awm. Mizoram sawrkar hnuaia eng Department ber emaw hi chuan awmze fel zawk nena an humhalh leh chin fel a va duhawm ve.

Hetiang kawngah hian Govt. Complex pawh sawr­karin a acquired ram chhungah mimal chenna in leh mimal ram eng emaw zat a lo awm tawh a. Engtia kalpui zel tur chi nge ni ang tih ngaihtuah nan khua a tlai zo vang tih a hlauhawm khawp mai.

Mak ang reng tak bawk chu Govt. Complex ram tlak lam ramah Gauhati High Court tan ram pek a ni a; anni hian RCC post hmangin gate lian tak siamin a panna motor kawng ṭha takin tlan luhna an nei a, nimahsela, gate tlan pelh hnu kawng sir hmun remchang leh nuam tak mai chu, “Mimal ram a ni e” an ti bawk. Hetiang hi a awmdan a nih avangin sawrkar tan hian tuna ching fel leh tur chuan namenlova beih fe a ṭul tawh dawn tih a lang reng mai. Chutiang bawkin Tuirial airfield ram te, Assam Rifles (Lammual leh a vel) te, Industrial Estate, Zuangtui te, Industrial Growth Centre, Luangmual te leh hmun dang danga sawrkar ramah te hian mimal ram tlazep buaipui ngai hi kan ngah hle awm asin.

Tin, hman ni deuh khan Chite luiah pawimawh thilah ka zuk kal a, tunhma khan sawrkar ram deuh vek kha ni maiin ka lo ngai a, a lo danglam ta hle mai. Ka pa Challiana kha Mizo doctor hmasa pawl niin Assam sawrkar hnuaia thawk ṭhin a ni a. Indopui II-ah khan N. Vanlaiphaia a awm laiin Upper Assam-ah Ledo an tih rail thlen tawpna khua, tuna lungalhthei lakna hmunpui awmnaah khuan, an sawn thla a. Mahse, rei tak awm lovin pumna a neih avangin kum 1944 khan Chite luiah khuan Labour Force-ho camp hmunah an rawn sawn let leh a, kei chuan ka zuk hmu ve hman hauh lo nain kan uteho sawi danah chuan chung hun lai pawh chuan sawrkarin hmun rualrem ṭha lai hmun zau tak luahin sipai tam tak an khawsa niin an sawi ṭhin.

Tin, Govt. Mizo High School-a kan luh laiin 1964 vel khan School pumin khu lai hnaiah khuan kan picnic a, a vel hmun pawh kha a nuam khawp mai. 1990 khan El Bethel Camping an buatsaih lai khan, kawṭhalo hri a len leh an inkaidarh kan hlauh pui avangin camp-a awm te tui in tur bleaching powder hmanga tihthianghlim hna thawkin ṭum eng emaw zat kan nauteho hruaiin ka zuk kal a. Khatih laia Zemabawk lam kai bul vela a lui luan dante pawh kha tunah chuan a lo danglam ta hle niin ka hria. Tunah hian Agriculture farm kha Horticulture farm tih a lo ni tawh a, nimahsela, a hmun zawl ṭha chin chu Department kutah a awm mumal hauh lo a, playground leh mimal ram zau takin Chite lui ruama a hmun zawl ṭha lai chu a lo awm ta vek mai em ni chu aw tih ngaihtuah theih tak a ni.

Hetiang hian kan khawpuia sawrkar ram awm apiang kan nek chep a, kan pawt hek zel dawn a nih chuan a fel lo hle dawn a ni. Hetiang hi a nih zel lohna turin a hma lama sawrkar hian hma a laka sawrkar ram hmun ruak awm apiang humhalh ṭha tura

ṭan lak a pawimawh hle. Tin, hetianga sawrkar ram mimalin an hman leh an luah zawng zawng hi enzuia chin fel ṭhin atan a duhawm takzet a ni. Tin, hun lo kal zelah pawh hetiang kawngah hian kan sawrkar hian a ram neih reng reng hi mimalin an pawh buai fo tawh lohna turin dan leh thupek lamin emaw ruahmanna fel tak hmanga a humhalh atan a va duhawm em!

C. Dorema, Khasi Veng, Kulikawn