HLAUHTHAWN RUK KA NEI

Eng dang a ni lo, kan Hripui (Covid-19) hi mawle! April ni 20 aṭang­in June ni 30 thleng Mizoramah lockdown a ni a, July ni 15 thleng an la chhunzawm dawn a ni awm a.

Sorkar: Kan sorkar hi hri do kawng­ah an ṭang em em a, a bikin kan Health Minister leh damdawi lama thawktu pawhin tha tawp takmeuh an chhuahin ka hria. Tupawh sorkar se hei bak chuan ṭan ngaihna awmin ka hre lo, kei chuan ka ti hial a ni. Kan Chief Minister zahawm tak, Finance Minister ni bawk pawh a fakawm khawp mai, hri do nan pawisa lamah limit a awm lo vang, ti khawpin a inphal a ni.

Medical Team leh Force lam mi te pawhin an zavaiin theihtawp an chhuah tlangin ka hria. MLA dang zawng zawng pawhin theih­tawp an chhuahin ka hria.

Volunteer: A hmatawnga thawktu dang, hlawh nei lo va tlawmngaia thawk pawhin mahni hna ṭul kalsanin mipui him nan an thawk a. Aizawlah LLTF te, hri hluarna veng leh hluar lohna deuh vengah pawh inang patin chhun-zanin an duty a. Ṭanpui ngai an vai a, ṭanpuina an sem a. Thingtlang khaw lamah VLTF lah riah buk suam chawpin ramri an veng a. Ṭhenawm khawveng huat hlawh lek lekin kan himna turin an thawk bawk a. Chu chauh a ni lo va, khawpui miten chawhmeh tel lova chaw kan ei hlauvin chawhmeh chi tinreng an rawn thawn lut ṭhin a ni.

Donation: Sum lama ṭang thei deuhin CMRF-ah leh veng leh mimalah an luang chhuak reng bawk a, a va mawi em! Kohhran lam ni se, mahni theih tawka luang chhuak vek an ni bawk a, Sorkar hna thawkte pawh chuti bawk.

Mipui: Kei ka hmuh ve dan chuan mipui pawhin thu kan awih. In len pawh tawk pawh an awm ang, hmai tuam lova chhuak tawk pawh an awm ang; mahse a nawlpui chuan thu kan awihin ka hria.

TV-ah te kan thlir chuan phai vaite a maka mak thuawih lo khawlaiah hmuh tur an awm. Mahse tunah chuan an dam chhuak rate a sang a, positivity rate a hniam em em bawk a ni. A nih keini hi vaccine la ṭha, sample test tam bawk si, engatinge positive kan hniam theih tlat loh? Tun hapta khat chhung mai pawhin ni 23/6 ah positivity rate 10.82%; chutiangin ni 30/6 ah pawh 7.24% kan la ni a, 5% aia a hniam hma chuan a ngaihṭhatawm lo an ti bawk si. Dam rate lah India pumah 96% vel a nih daih laiin keini 77% vel chauh kan la ni tlat a, India a chhe ber kan ni tlat mai. Heti taka thawk ṭha tlang si kan kang thei lo bik lutuk hi hmaihṭhelh kan nei em ni?

Engnge hmaihṭhelh?:

(a) Rawng­bawltuten sorkar hmingin ram pum huap ṭawngṭai rual an rawt ṭhin a, kan ti thei lo va. India-ah chuan PM berin tih tur a tih avangin Dar khawng ri ten hri kan do tawh va. Mizoramah pawh sakhaw hrang bia awm mah ila, mahni Pathian hnenah ṭheuh ṭawngṭai rualna lo awm tawh se chuan kan ziaawm ang a.

(b) Lunglei lama khawl lei sa bun kan tum har lutuk pawh kha, party kan la lian lutuk a ang. Khang pawh khan ṭanhona a tichhe viau thei. A petu thinlung kan sawi thei lo, a thinlung pawh a ṭha ang, sorkar ta a ni tawh a, damna kan mamawh a, hma lak duh loh tlat pawh kha chung lama mi a lawm ka ring hauh lo. High Court thurem avangin lo bun thar pawh ni ila, kan Pathian chuan a hre hrang thoin ka ring.

(c) Opposition te lam­ṭangah kan siam lo lutuk a ang. Committee leh pawipang dangah te telh ve se. An thurawn te han ngaithla ve se, an thu a tluk loh pawhin thudang ni mai se. Finchhuah kan har lutuk a ang.

Opposition: Anni pawhin sorkar daisualtir phet tum lo se, party advantage lak tum lovin bei bawk se. Hri donaah thawk tak tak vek ila, Chung lama mi a lawm ang a, kan hri pawh a kiam hma ang. Vairam nen kan inteh a ni ang e, anni pathian leh keini Pathian chu a dang daih a nia.

Hei hi alawm, state dangte 2nd wave reh lamah kan la vul chuk a, kan 2nd wave hniam hma hian 3rd wave in min nang ang tih pawh a hlauhawm hlel ta lo ve. Eng ang pawhin dovin ṭang mah ila, Chung lam a mi lawmna khawpa kan ṭanrual loh chuan hri hian min kiansan lawk lo vang, tih hi ka hlauhthawn ruk chu a ni e.

V.L. Hruaia, Tuikual South