MIN MAN CHIANG E

Kilometre 27-a hla a ni a, minute 15 chiah hun ka nei tawh. Cement-a chhun kawng, a ṭha aia a chhia leh khuar tam zawk tawh mah km hnih tlan chhoh phawt a, kawng luan dum, biboh ru tak si km sarih tlan chhoh leh hnuah kawng mam ṭha chin km 18 zet chu pawh chauh tur a ni. Khaw kar kawngah hi chuan motor hi chak taka tlan nuam ti chi ka ni ve a, theihtawpa chakin ka ri ve fua fua mai.

Motor lian a lo tlan ve nual avangin duh angin tlan chak a har a, hun tiamah kan tum ram kan thleng dawn hauh lo mai. Ka nupui chuan, “Hmanhmawh lutuk suh, darkar chanve vel chu min hrethiam thei mai ang,” a lo ti ngaihṭha ve sek a. Kulikawn kan thlen chuan dar 7:10 chiah a ni. Minute sawmin kan tlai a, curfew kan bawhchhe tlat mai. Police duty chuan dam diai hian, “Khawi lamah nge?” min lo ti a. “Kan feh haw,” kan ti a. Nui tawi tat chung hian, “Saw laiah sawn lo va ding ve phawt rawh u aw,” min ti a, a ṭhianpa bulah min tir phei a. A ni chuan, “Cheng 300 i chawi ve a ngai tlat mai,” tiin ka hming chu a ziak a. Chawi tur angte ka chawi fel hnu chuan, “Ka lawm e,” ka ti a, kan haw tlang ta a.

Covid hri len tirh aṭanga ka thupui pakhat, ka fate pawh ka hrilh fo chu ‘thu awih tur’ tih hi a ni a; a zawm pawh ka zawm ṭha hle. Mawhphurhna bik riau ka nei a nih loh chuan lam hnaite chhiat ṭhatah pawh ka lang ngai lo. Dan hi chu zawm ila a hahdamthlak ber mai tih hi ka thupui a ni. Curfew bawhchhiaa pawisa chawi ngaia ka awm chu police duty te ka zah hle mai. A chhun a zanin keini ang dan bawhchhiat chingte vengin an hah hle mai a lo ni si a. Hripui kaiin lo positive ve hlauh phei ila dinhmun hlauhawmah ka siam der dawn tihna a lo ni si. Ka tisual chhiava a lo ni. Kha mi zan khan ka hnungah mi dang an la awm nual bawk tih ka chiang em em! He hripui dona atana thawktu, hah leh rimtawng taka bei ngat ngatte hi an zahawm zual mang e. An thin te pawh hi lo chhe deuh mahse a va âwm em; mahse an la zaidam thei phian a, an fakawm mang e. Human rights lo tih ve sek te hi a ṭul lo mang e ka tih phah ta hial a!

Sawrkar hotute, mipui pumpui ngaihtuaha roreltute ka chhui thleng a; an thu chhuah eng eng maw ka lo sawisel ve ngawt ṭhinte kha ka ngaihtuah let a, a harsat turzia leh ngaihtuah kim a ngaihziate ka chhutpui a, ‘an lo rel thiam mang e,’ ka ti. Kei, mahni tapchhak zawla fing inti, a takah chuan eng rorelna maha tel pha ve si lo hian anni aia fing riaua inngaih chang ka neihte chu ka ngaihtuah chhuak a, ka zak ru veng veng mai. Sawrkar rorelna chu sawi loh tualchhung rorelnaah pawh tel pha hauh lo a, tualchhung mai pawh a ni lo, section chhungah takngial pawh tel pha si lo hi fing ka lo inti ve em em mai chu lo niin. Eng pawl emaw ber zinga tel pha tur chuan mi eng emaw nih a lo ngai a, mi eng emaw pawh chu ka lo ni pha der si lo. Ka ṭhenawmpa pawhin eng thilah mah min la rawn chhin ngai lo a ni a, chutiang mi chuan fing ka lo inti ve riau chu niin. Ka ṭawng tam poh leh nuihzat ka hlawh nasa ting mai dawn a ni tih ka inngaihtuahna chuan min deng harh a, ‘mi â pawh a ngawih reng chuan mi finga ngaih a ni,’ tih thufing kha zawm hun tak a nih hi tih chu ka mihlim thil dawn thar ve chu a ni.

Tunah chuan ka ngawi tawh dawn a, ka ka ka ang zung zung tawh lo ang. Kan dam tlan nan dan ka zawm ang a, ka bawhchhe leh tawh lo ang tia intiam chungin cheng zathum ka chawina receipt chu ka thlir vang vang a, paih mai tura ka tin lai chuan ‘lehkha hlu tak a ni roh a,’ tih ngaihtuahna chuan min rawn deng dawt a, ka vawng ṭha ta zawk a ni. Kum tam ral hnuah kan tuten an la rawn hai chhuak ang a, a awmzia rawn zir chhuak zo tak ang maw? ‘Ka pu chu an man chiang mang e,’ an la ti ve fo maithei asin!

C. Lalduhawma