Eptu chak loh rah chhuah

Kum engemaw zat nuam tih leh ninawm tih inzat deuh thawa ka hnathawh pension san duhna rilru thawveng in siam chawpin pute phalna nen lung tileng zual tlawhin hun ka hmang a, rilruin a lo tin zawn ber Mizo hnam party MNF chungchang leh MLA dinglai chanchin chu remchang apiangah dilchhut takin ka'n ngaithla pah zel a. Ka zin chhuah dawna ka phurna a nasat tehlul nen hnual rawihin leh pension hun ka nghahhlelh em em chu huphurh takin ka awm ta a!

A hun thlen hmain vawi tam ka huphurh zual a, mahse hei ZPM a rawn piang ta hlauh mai a, tun ṭum chu lungsi em em lo chungin ZPM ah aw ka ti ta a, ZPM leh MNF-ah hian Congress duh lo kan tlan darh ang a, Pu Hawla bawk hi a lal leh luau mai ang a tihte chu ka hlau khawp mai.

Ka mimal hmuh danah chuan tuna kan sorkar hrawn mek Pu Hawla kaihhruai Congress hi chuan ram leh mipui hmasawnna lam aiin an lal theihna tur politic chauh buaipuiin ka hmu a, zu zuar leh KS vote-te leh pastor vote hlut zawng a inang reng an tih ṭhinte phei hi chuan min ti thinrim em em ṭhin a, chu bakah Mizo hmusita rawt chimih vek duhtu vai party a nihna hi ka duh lo ve hrim hrim a, sawi tam pawh ṭulin ka hre lo. Tihtakzeta Pathian hmangaihtute chuan kutphahah an chhut ka rin tawh loh avangin MNF hi eptu party lian ber a nih bakah Mizo hnam tana ṭha berah ka ngaih avangin an sorkar ang chu ka ti a, mah se a lo ni lo.

Ka rilru awmna MNF chu ka'n luhchilh ta a, rin ang an lo ni lo, an lo sawngnawi ru khawp mai! Chhim lama awm ka nih avangin ka awm tawhna khuate kal pelin Rihdil ka han thleng a. MNF-in District an pek Congress-in an chhunzawm duh loh pathumte ka tlawh kual vek bawk a, MNF-ah ka beidawng ta hle mai. A chhan tlangpuite:

An party policy SEDP an sawi dan leh SEDP duangtu ber sawi dan hian min hnar tlat. A thusawi tlangpui an sawite hi ngaihtuah chian chuan Minister kum eng emaw chen lo ni tawh tana sawi atan chuan nuih a tihzat rualin Mizo mipui min hmuhsitnaah a ngaih theih hial em aw ka ti. Kan kalna mipuite khan dawt em chu an sawi lo ang a, hengte hi a thusawi an tih, ka rilru luahtu deuhte chu a ni. Khawtinah SEDP Bank hawn a intiam a, SEDP training-naa kalte chu Register-ah an hming a ziahtir a chungho chu an Sorkar huna SEDP dawng hmasa tur an nih thu a sawi a, BSI-in Certificate an siam angin SEDP Training-te hnenah Certificate mawi tak a pe dawn a! SEDP-ah chuan lo vah man, a chi man, a enkawlna senso zawng zawng leh a hralh thlengin an buaipui vek dawn niin a sawi a, sumah harsatna a awm dawn lo a, an project a zirin sum a tamin a tlem mai dawn tih a sawi an ti a, lehkhathiam leh training chhuak tawh sorkar hnathawk lo zawng zawngte chu thla tin hlawh, stipent angin an pek vek tur thu a sawi an ti bawk.

Sorkar hnathawk lo chhung­kua zawng zawng hnena hna nghet pek a tiam an tih phei chuan a sawitu kha a nuih a za hle nghe nghe a, lehkhathiam a tih hi pawl engzat chin nge? tih a sawi tel bawk si lo a, heng a thusawite hi a tak tak a nih leh nih loh kan zawt dil chhut hle a, a sawi ngei an tih avangin a mak ka ti hle.

An party zokhaw lam hruaitute ti luhaitu ber pawh an President in Rs. nuai 3 an sem tur thu a sawi a, An Vice President SEDP duangtupa lahin sum kan sem ve dawn lo a tih rualin an project/ trade azirin sumah bituk a awm lo a ti bawk si hi a ni.

MNF OB te zingah ruihhlo ti an awm hauh lo hi fak an phu ngawt mai. An President phei chuan zu zuar CM nih a duh loh thu a sawi khan min hneh em em laiin an party han luhchilh chuan an lo ropui bik chuang lem lo. An Party member pawimawh zingah zu zuar an lo awm ve thluah mai a, mak ka van ti em! Heng zingah hian candidate beisei hial pawh an awm an ti.

Pension loh dan awm se pension loh ka thlang var var naa ka pension huna tih tur ngaihtuaha buai ta reng reng chuan tih theih chhun sorkar ṭha siam tura politic luhchilh ka tum avangin eng party nge ṭha ber ta ang tiin ka ngaihtuah a, lung si lo chungin ka lungsik ber MNF Policy duangtupa thusawi ka duh tak si loah chuan ZPM hi tun ṭum chu kan thlang ve ang e tiin thutlukna ka siam ta a ni.

Buanga Chinzah