Sorkar lamah ka ṭang
Mizoram sorkar hi Covid-19 a do danah duhkhawp lohna lai a awm thu hi chu kan zavaia hriat a ni a, sorkar-in political party hrang hrang leh pawl hrang hrang hruaitute a kawm ni khan kan chief minister Pu Zoramthanga khan, "Theihtawp chu kan chhuah a, nimahsela tlin lohna tam tak kan nei a ni," a tih kha a khaikhawmna chu a ni mai a, tun ang hun harsaa sorkar demna ringawt zawn hi chu a hahthlak lulai deuh chu a ni e.
Kan sorkar hi a chak lovin pawisa a nei lova, a hmain pawisa neih thâwkin a lo thaw lian deuh tawh a nih pawhin, a tak ramah chuan pawisa a nei lo tih kan Finance Minister (CM) pawhin a sawi leh tawh a, chuvangin sum nei lo chung chungin hripui leng a do va, mipui sum thawhkhawm hrang hrang CM Relief Fund lama lutte hi chu an duhna leh remchanna apiangah an hmang ve bawk ang chu, pawn lam aṭanga, "Mipui thawhkhawm... chutah chuan an hmang a, hei hi chu sorkar sum awm sa hmanna tur chi a ni," tia lo sawisel hi a thawhtu mipui zah lohna zawk a ni lo maw? tih hi ka ngaih ve dan zawk a ni.
Health Minister Dr R Lalthangliana an han fak chiam chiamte pawh hi thiam taka kan Chief Minister nen an inkar tihzau tumna lam a kawk daih zawk mah mah a, hetiang hi politics hri ṭha lo tak lo tlazep a ni zawk a, Covid-19 hri len laia Health Department sum an audit ngam khan thil fel zan lo a awm tih a rawn hai lang zawk tihna a ni mai lo maw? tihte hi lo ngaihtuah ve chhin teh u. Kan ram sorkar hruaitute hi opposition hian fak duh leh fak theih miah loh an nei a, pakhat faka pakhat an sawisel hian ruling party chhunga khi siam tumna lam rawng a kai zawk lo maw? Tun ang hun hi politics lama advantage lak tumna hun a ni lo va, sorkar hi kan theih dan danin kan support zawk tur a ni.
Sorkar sumin a daih loh avang leh a hmunhma pawhin a tlin loh avangin khawtlangte nen ṭangkawpin hripui hi do a ni a, chutah chuan Task Force chakna hmang thiamtu sorkar hi an fing a, Task Force tel lo chuan duh hneh chi a ni lo va, Task Force nena inrem tak chunga CCCC an duang chhuakte hi sorkar chak loh vang lam ni lovin a remhriat vang a ni zawk a, chuvangin sorkar hian duhthu a lo sam lo deuh a nih pawhin Covid donaah kher hi chuan theihtawp a chhuah avang hian a lamah ka ṭang tlat dawn a ni.
Zothansanga Hnamte