Inthlan dawn hnaiah 'change' a awm thut thei

MLA kan thlang dawn a, kumin kum tawp lam a ni tawh si a, politics hi kan sawi kan sawi mai dawn a, kumin kum chanve vela change awm tura ka ngaih hi zawlnei angin ka han puang lawk lawk teh ang.

1. Thawhhona - MNF hian party mala an din tur thu vawi duai lo an sawi tawh a, an ding dawn ta tak tak pawh a ang tawh hle. A boruak ka thlir ka thlir hi chuan MNF hi an mal din ka ring tlat lo pek a, a chhan chu khu lama an innghahna ve ber NDA lama khaipa BJP-te nen hian an inkhin ka ring thei lo. MNF hian BJP candidate hi an thlawp ka ring a, chutiang bawkin BJP pawhin MNF candidate hi bial ṭhenkhatah an thlawp ka ring. Tum inang an nih chiah loh pawhin hmelma inang nei an ni a, Congress paih hrim hrim duhtu pawl pahnih hi an thawh dun ka ring.

Tin, ZNP pawh hi kei rin ngam an la harsa deuhin ka hria. Tuna ṭangrual pawl ZPM lama an awm hi a thlemtute'n an thlem thiam dan azirin Congress lamah hian an peng thut lo ang tih a sawi theih loh.

2. Party inmil lo - Tlemlai deuh aṭang khan political party ṭhenkhat hi chuan candidate la ni chiah si lo, candidate nih tum hi an nei fur tawh. Bial ṭhenkhat phei hi chu a vila lo vil ve ngar ngar tawh an awm a, heng mite hian an bial angin an ngai tawh awm e. Nimahsela tun hnaia tui thar, sum ngah bawk si, tun hnai maia bial han vil leh chawt te an awm thar ṭan. Party hrang hrangah candidate nih inchuh vanga thawkho thei lo tur party thuhmun ni si an awm dawn.

3. The Modi factor - Na­rendra Modi vangin India ramah BJP hi an invawrh sang hle. Manipur leh Goa inthlana MLA tlem zawk ni chunga sorkarna an neih theih dante kha thlir ta vang vang ila, Modi thlitleh hian a nuai na hle. Mizoramah chuan Modi thli hi a tleh nat vak a rinawm ve lova, boruak an nei vak lo mai thei a; amaherawhchu titi awm pakhat chu Congress MLA ṭhenkhat hian sorkarna vawn fung an chelh dawn phawt chuan an ṭan lam an thlak hreh dawn lova ringtu an pung zel. Change mak tak a thleng thei.

4. Lal chhungkua - India ram politics-ah hian 'lal chhungkua' hi an awm ṭhin a, Vairamah chuan politician fate hi an pate bialah hian an tling nawlh nawlh zel. Tuna Mizorama lal chhungkua chu Chief Minister leh a lam hnaite sawina a ni a, a nau Minister a ni a, a monu nau Minister a ni a, a monu nau dang leh chu MLA a ni bawk a, Miinister, MLA leh MP lamah pawh an chhung hnai an la awm bawk.

Heng zinga tel ve lo Ca­binet Minister pakhat hian Bhawan lam rawn miah lovin mi pakhat hna pekah duhsak bik a nei a, lal chhungkaw lam hi an lawm vak lova, chumi kal zelah chuan he Cabinet Minister hian MLA ṭhenkhat thurualpuiin ho hran a siam a, lal chhungkua leh lal chhungkua lo boruak hi a ri ṭan ta deuh der a nih chu! Hei hian change a la siam thei a ni.

Romalsawma