Mipui MLA ni ngei tur thlang ang u

Kumin chu kan ram rorel tur, MLA thlan hun a lo ni leh ta reng mai. Tun aṭang pawhin pa ho ṭhukhawm ti ti pawh inthlan lam a ni leh ta hawlh mai a! Kan ramah hian MLA hi kan thlang ngun ta malh malh hle a, mahse inthlan apiangin kan tifuh hlei thei meuh lo zawng a ni ang, kum 2/3 a vei meuh chuan ‘kan thlang fuh lo’ kan ti deuh reng mai a; chuvangin tun ṭum chu kan thlan fuh ngei tawh nan i ngaihtuah ngun viau tawh teh ang u.

MLA thlante hi tih mai mai a ni lo tih hria ila, kum 5 chhunga kan bial aiawha ding tur an ni tih chiang takin hria ila, uluk takin i thlang tawh teh ang u. Kan aiawha ding an ni tih inhre tak mi chauh thlan i tum tawh teh ang u. Tam tak hi chu kan han thlang lal te te a, min hnuaichhiahin min han be ṭha duh lo nghal mai a, biak pawh kan be ṭha ngam lo nghal mai ṭhin zawng a nih hi! Kan harsatna han sawi reng reng pawh mi ngaihtuah ṭha duh lovin, Aizawl pa, an ṭhenawmte an bekbawr peih zawk tlat mai zel a. Hetiang mi hi chu i thlang lo ngam tawh teh ang u.

Ṭhenkhat ve thung chuan inthlan dawnah pawisa tlem a zawng min han pe a, hmangaih awm takin, aw nem fan raihin min han bia a, min hmangaih ta lua-ah ngaiin kan han thlang ta ngei a, mahse mi an hre zui leh tawh lem hlei lova. Hetiang ang mite hi an ni ngai ‘Chinghne beram vun sin’ an lo tih thin kha! A ṭhen leh chuan thil eng eng emaw mi tihsak turin an intiam a, kan duh zawng leh kan mamawhte chu a hria a hlei hlei an ni si a, tichuan kan han thlang tling a, engmah tih chu a awm leh lem hlei lova. ‘Zunte nu siam ang’ maiin kan rethei tlawk tlawk mai ṭhin zawng a nih hi!

Tih laiin chanchinbu leh whatsapp lamah lah ‘damlo kan leh mitthi phurh MLA tawk lek’ tih te kan hmu cham chi a. Hengte tak hi kei ni, thingtlang mi ho hian min hmusitin kan dinhmun an hrethiam pha lo a ni tih hriain i dem ngam ang u. Thingtlang mite hi rethei bakberh te te kan ni a, damlohnate hi tawk thei kan ni a, kan han damloh chang te hian hmun pui, damdawi in ṭha pan ve lo thei kan ni ṭhin lova. Hetiang vanduaina kan tawh huna min lo ngaihtuah a, min lo kan peih leh kan harsatna min sutkian sak peih MLA chu kan lawm hliah hliah lo thei lo a ni. Hmun pui Aizawlah te emaw kan han boral a, kan ruang phurh hawn ngaihna kan hriat loh, a phurh man pawh kan neih loh chu kan MLA-ten man lovin min han phurh sak a. Hetiang mi ngei MLA hi a ni dawn lawm ni ram leh a mipuite hmangaihtu MLA chu? Hetiang min ngaihtuahtu MLA hi chuan kan tlakchham dang pawh an hriain min ngaihtuah sak ngei ang tih chu thil chiang sa a ni. Pawnga taka ‘damlo kan tawk, ruang phur tawk MLA’ ti ṭhin te ngei hi kan MLA han ni ve ta ngat se zawng thingtlang mite harsat leh mangan dan tur hi sawiin a siak awm lo ve!

MLA Fund pawh party mite tan chauhva phalrai chi, mahni party mite lo chu NLUP pawh dawn tir ve phal hauh lotu ang chi, thingtlanga ruang phurh hawn a ngaih chang pawha party unit hriatpuina phut tlattu, damlo hmunpuia awm pawh party unit hruaituten an recommend-te chauh kan tum chi, khawtlang mamawh thil dang reng reng pawh party unit hriatpuina tel lo chu a

ṭul tih hre reng mahse ti duh hauh lotu ang chi MLA hi kan thlang tling palh ang tih a hlauhawm hle.

Chuvangin, tun ṭum kan inthlang tur hi chu thingtlang mipuite pawh hi harh ila, mipui MLA ni ngei tur chauh i thlang teh ang u. Chuti a nih loh zawngin kum 5 chhung hi hrehawm tiin kan chiau leh vawng vawng dah ang e!

A tawp berah chuan kan kawngpui, National Highway, State Highway leh District Highway, tun hma UT nih tirh aṭanga mipui hnatlangina kan sah leh kan siam ngai reng reng loh, tun genrationa mipui sah leh siam tur emaw ti khawpa kan buaipui tak luai luai ang te, min sial ṭhat sak thei tur ngei hi i thlang thiam teh ang u. Chuti a nih loh zawngin National Highway sat fai hian a Meikhuchhuak Hnatlangte hi kan ko fa mai ang tih a hlauhthawnawm hlel lo e. Hawh teh u, thingtlang mipuite hian rilru fim nen inthlan i hmachhawn teh ang u.

Patrick Z, Chhingchhip