RUALAWH A VA NA TAK EM!

Kum 2020 March thla aṭangin Mizoramah Covid-19 hripui a leng ṭan a. Hripui do turin sorkar a inbuatsaih laiin, opposition party te pawhin, 'inbeih hun a ni lo ve, ṭanrual hun a ni,' tiin sorkar thlawpna thu an aupui a. CM Relief Fund for Covid-19 ah pawl, kohhran, mimal ṭhahnemngai leh MLA te'n sum an chhunglut ruih ruih a. Chutiang chuan hripui do tùrin mipuiin an phak tawkin sorkar an thlawp ṭha a ni.

Mipui thlawpna hmu ṭha em em, kan Chief Minister Pu Zoramthanga chet dan erawh rualawh tina khawp a ni thung. Chief Minister meuh chu hetiang hun harsa-ah chuan 'State Pa ber' anga engkima hmahruaitu tur a ni a. State dang CM ten an mipui an thlamuan a, zanlaiah te front line worker te hnathawhna hmun an tlawh laiin, kan CM chu a Office air-condition room nuam takah CMRF for Covid-19 ṭanpuina sum dawng turin inring rengin a lo awm thung a.

Nagaland CM Neiphiu Rio chuan, June 10 khan an State mipuite’n Covid-19 hri lêng dinhmun chiang zawka an hriat theihna tur mobile App a tlangzarh a. Keini state chu tuktin I & PR Minister, Pu Ruatkima'n a awmna WhatsApp group hrang hrangah Covid-19 dinhmun thar ber a post darh a, a awmna group-a awm ve lo te’n midang post chhawn aṭangin an lo hre ve chauh ṭhin.

Assam khu tluk rual an ni lo ang kan ti nain, Covid hri lêng do kawnga an CM Himanta Biswas hmalak dan hi keini tan pawh a awhawm ṭhin khawp mai. Assam hian an state chhunga Covid avanga nu leh paten an thihsan fahrah leh nupui/ pasal chánte chhawmdawlna tur Welfare Scheme (Mukhya Mantri Sishu Seva Yojana) an siam a; Covid hri avanga vanduai tam takin an chhawr tawh a ni.

Keini chu CYMA kaih­hruaia All Party & NGO te rel vek tawh AAY & BPL chhungkua te tui/ electric chhit man bill ngaihhna­thiam chungchang pawh kan sawi hnàwm sak leh duh a. LESDE Dept hnuaia Covid-19 Package, Mizoram sorkar scheme siam aṭanga chhawmdawlna beiseitute pawh an beidawng ṭep tawh a nih hi.

Kan ṭhenawm lawk Tripura pawh hi, an rama chèng Mizote sawi danin lockdown vanga harsa chhungkaw 7,00,000 (nuai 7) sorkarin a ṭanpui tawh a; doctor 150 chuang an lak belh a, Covid Care Centre khum 100 awm theihna Sub-Division tinah an siam belh a. Test runpui (Mass Testing) an kalpui char char a, mipuite a thlawna in test turin an sawm zawk a ni. Covid hri lêng kan do dan a inthlau ngèi mai.

Kan CM duh tak hi a demawm lutuk a ni hran lo. A rilru pek lohna lam hi ngaih­tuahna senga chak taka hmalak ṭulna lam a ni si a. Rawmi tender leh vaiho nena Lengpui Airport contract an thawk dun nia rin te hi hri lêng kara ngaihpawimawh hma­sak tur chu a ni lo maw le?

Assam nena kan ramri buai meknaah 'State Pa ber' CM-in ngawih a chuh tlat bawk. Assam Chief Secretary nena inbiaknaah BEFR 1875 ramri an sawi ri ngam tawh lova, CS 2 inbiak tuk July 10 ah Assam lamin Phainuamah kawngpui sialin Mizote kuhva phun an tihchhiatsak a; Vairengte boruak thlithlai turin Home Minister kal loin Education Minister a kal zawk hlauh a. A letling zawngin kan kal emaw tih tur a ni ta. Rualawh a va na ṭhin tak em!

Zothani