Rawmi chu eng tur nge ni a?
Mizoram sorkar chuan Mizorama mau leh rua tam tak awm sa hi a hman ṭangkai dan zawng chhuak lovin mau/raw dang chin a duh zawk a, chuvangin Brandisii leh Lactiferous rua an han supply ta chur chur mai a. Chumi hnuah tualchhunga rua, Rawmi chu supply tur an han zawng leh a, keini mimawl zawhna chu, "Heng mau/ruate hi lo ching puitling pawh ni teh reng se eng atana hman tur nge ni dawn?" tih hi a ni ta a ni.
Brandisii leh Lactiferous supplier kha in lo chik ve em? Kha mite kha tun hma pawhin kan ram hruaitu pakhat chuan a sawi ri tawh ṭhin a, anni kherin an rawn chhang fuh chat mai leh Mizoram chhunga Lengte rama kha raw chi kui ṭiah nachang hria an lo awm fuh chat chat lehzel mai kha eng anga han ngaihtuah zui tur chi nge ni aw?
A hmutu tur hre saa contract hna tender chhuah hi tunlai miin an sawisel ṭhin chu a ni a, kha kha a hmutu tur hre saa tender chhuah chu a ni e ka ti ngam chiah lova, mahse mi pakhat chiahin a han chhang kha chu a chhangtu kha an tlem deuh chu a ni!
Rawmi an han supply leh dawna a chhangtu an han awm ve ta nial a, chhui neuh neuh chuan khaw khat chhuak an tih ang mai a lo ni leh ta a. Engpawhnise a supply na pawisa hi chu uihawm hle mahse an hman zelna tur lama kan bangbo tlang lutuk hi sawi chhuah ngai zawk chu a ni.
Kan sorkar pawisa hi mipui pawisa a ni a, ṭangkai taka hman zuina awm rawmi a nih chuan a ṭha tih kan pawm. A hmanna tur hi tuna kan mau leh raw awm sa aia ṭha bik a nih loh chuan supply tawh loh mai ni se kan ṭhianhoin kan ti a nih chu aw.
David LR Hnamte