Hruaitu thar kan mamawh lo maw?

Zep thu a cheng lo, tunlai chu Kohhran boruak leh thildang zawng aiin mitin hian Politics kan ngaihven em ni? tih tur hian hmun tin maiah kan sawi a. Pa ho chauh ni loin nuho thleng thlengin an sawi a, ṭhalaite lah chuan kan beidawn leh mangan thu kan sawi chamchi a, sawi tur tingin kan sorkar hrawn mek lah chuan tunhma lama kan la tawn ngai reng reng lohin mipui lungawih lohna min thlen tlat bawk si a nih hi!

Hmanni lawkah eizawnna atana an hman lai sumo permit chu hrensak a ni a, hmun tin maiah kawngpui chhiat thu kan sawi a, a ni bawk lah tak reng a. Hetianga kawngpui chhia hi he zoram hian ala tawng ngai tlat si lo a, mitin maiin sorkar kan dem luih luih a, sorkarna chelhtu lam lahin opposition party an han dem daih ta mai a! nuih a za ṭhin ngawt mai. Balu chunga ui bawk an sawi ang maiin sorkar chelhtu Party hrawn mek lah hi a chetna apiangah a che fuh hleithei tlat lo a. Keifang hmuna Chief Minister ṭawngkam tawi tak, hriatreng awlsam tak si bawk te kha kan la hre rengin kan la vawng reng asin.

Favang boruak kan thleng a, ruahtui a hul ṭan a, mipui te demna a nasat vang leh opposition te nawr nasat vang pawh a ni ang, kan sorkar chuan a theih ang angin kawng chhia a han siam ṭha ṭan a, nimahsela mipuite beisei loh lamah Aizawl khawpui chhunga kawng, a chhiat thu kan sawi rik ngai reng reng loh chu a han thual ṭha hmasa phawt a. Fur laia mipui kan phunna ber zawk - Aizawl leh thingtlang inkar kawng chhia chu hnuhnung lamah a dah a nih han ring phawt ila a ṭha ang e.

Chief Minister ber lah chuan mipui titi ti tamtu atan “Cheng khat pawh ka eiru lo” tih thu a han sawi ri leh mauh pek a! Social media lamah a darh nghal chuai chuai a, a hnungzuitute tan ngei pawha ṭan ngaihna awm lo turin mitinin kan pawmsak lo a. Chumi ti chiang turin Kolkatta khawpui lamah kan hriat hauh lohin kan Chief Minister chuan In ropui a lo din luah mai bawk leh ta nghal a! Politics thila inbeihna maiah ngaihsak dawn ila document engkim mai lah chu kan hmu vek bawk a. A beitute lam lah an huai a, ngawih mai mai tum loin Election Commission hnena an lehkha thehluh thlengin kan chhiar ta vek mai si a, opposition lam chan a ṭha zawk a ni anga tiin mipuiin beng kan chhi ta mek a nih hi.

Ni 14 November 2017-a Mizoram Assembly thlasik ṭhutkhawm ṭan ni chuan Chief Minister chu a banglow aṭanga a kal tur chu Opposition party MNF ṭhalaite chuan lo dan an tum a, nimahsela, dang zo loin an chhuah leh ta tho a. C.M ngei pawh chuan tluang takin House-ah a hun a hmang ta a. Nimahsela Aizawl D.C chuan thuchhuah a han siam ta nghal a, Section 144 of the Code of Criminal Procedure 1973 hmangin Mac Donall Hill mai duh tawk loin Zarkawt traffic point thleng thlengin mi panga emaw a aia tam awm khawm khap a nih thuchhuah chu kan hmu chawpchilh nghal ta mai bawk a.

Hetih lai vek hian MNF lam lah chuan hun kal tawh hnu an rawn phawrh thar lehin, ni 4, Dec 2003-a Chief Minister, Zoramthanga thutiam la tura kal chu Treasury Square-ah Congress Ṭhalaite’n lo dangin a car pawh vawm chhiat sak a, Zoramthanga hi a tlan let leh hial a ni. Hei chauh pawh ni loin ni 31 Jan, 2007 chhuna Health Minister Pu R. Tlanghmingthanga office kal tur chu Congress Ṭhalai te hian lo dangin, an lo vawm a, motor mai duh tawk loin Secretariat office tukverh darthlalang tam tak an vawm keh bawk a. Motor hal te pawh a awm hial nia sawi a ni.

Heng lo pawh hi sawi tur tam tak a awm ang. Hetiang hian kan Party lian pahnih te hian opposition-a an awm laiin sorkarna changtu zawk Party chu an bei ta ṭhin a ni a, Kristian rama thleng atan chuan a mak tih mai piah lam a ni. Sorkarna duh vangin an inbei a, na tak takin an inbei a, sorkar lai tihchhiat an duh a, tih mualpho an duh a, in rah beh a, che thei loa indah an duh a ni.

Sorkarna changtu zawk lahin kan thil ṭha tih avang hian kan sorkar leh ang tia thil ṭha zawk tih tum loin opposition beihna atan a thiltihtheihna a han hmang ta daih mai a, neutral tan ngei pawh ngaihtuahna fim hman hi a har a nih hi. Kei zawng heng kan Politician-te chet dan hi ka awm hmun aṭanga ka han thlir vang vang hian anni-ah hian hei baka pen lehna tur hi a awm ka ring ngang lo!

Mahmuaka Chhakchhuak