KṬP General Conference atan Member-te'n sum thawh khawm tawh ila

Mizorama ṭhalai pun khawm tamna ber, KṬP General Conference a lo hnai leh ta hle mai. Kumin hi KṬP General Conference neih kum a ni a, tluang tak, hlim tak leh hlâwk taka hman a nih theih nan a thlengtu lam leh palai kal turte duhsakna i'n hlân phawt mai teh ang.

Kan hriat angin KṬP General Conference hi kum 2004 hma lam kha chuan kum tin neih a ni a, mahse, a hautak êm vangte pawh a ni ang e, kum 2004 aṭangin kum tin nei loin, kum kár thlakin neih a ni ta a. Kum tin neih a nih tak loh vang ni maw, KṬP General Conference hi member-te'n an hlut sawtin a lang a, kal pawh a kum tèlin an tam tial tial a; a hnuhnung ber, Champhaiah phei kha chuan Pathianni zanah inkhawm mi 30,000 chuang fê an nih tak kha.

KṬP General Conference hi Mizorama mipui/ṭhalai pun khawm tamna ber a nih ṭhin avangin a hautak nangiang reng a, ka hriat sual loh chuan, kum 2016-a Champhaia neihah khan budget pawh cheng nuai 70 vel niin ka hria. Sum sên zat hi a uiawm zawnga ngaihtuah chuan, ni 4/5 vel atan chauha thil tih senso atan chuan uiawm ve thei tak a ni mai thei a; mahse, Pathian rinna kawnga a hlâwkna chhût thiam tan erawh chuan a âwm viau thei bawk âwm e.

Sawi tawh angin, KṬP General Conference hi sum lamah a hautak a, tha a heh a, a buaiate lah an buai narawh. A thlengtu apiangin sorkar lam an la pûr deuh zel a, sorkar aṭangin puihna sum ṭhahnem tak an la dawng ziah niin a lang. Conference thlenna hmun bialtu MLA tan phei chuan thil lawmawm a nih theih rualin, phurrit pawh a ni ve thei mahna! A cháng chuan, a thlawna sum inpe tawp bik loin, inhlawhna chhetê an insiamsak a, chumi hmang chuan sorkar sum eng emaw zat an inpe ta ṭhin a. Hetiang hi thil remchang taka ngaih theih a nih rualin, hnathawh leh hlawh (sum hmuh) zat erawh a intu lo ve fo. Hna thawh mila hlawh hmuh tur ni ta se, Conference thlengtute'n sorkar aṭanga sum an hmuh hi an phu lo, ti pawhin a sawi theih ang.

Hman kum lawkah phei kha chuan, a hranpaa inhlawhna pawh insiamsak chuang loin, sorkar sum, cheng nuai 20 chuang kha sorkarin a pe tawp mai a (Vanglaini chanchinbu pawhin an inpek dan, inpek chhante chiang takin a tarlan kha); a hnuah pawh sawi neuh neuh a awm kha. Kohhran kaihhnawiha thil thleng atan chuan a awm lo viauah miin an ngai a nih pawhin, thiam loh mai chi chu an ni lo ang.

Mizoram Synod-in KṬP General Conference a puihna sum (Nuai 10?) hi chuan a daih lo nasa mai tih a hriat a. KṬP pastor bial leh branch hrang hrangin conference thlengtu puihna sum an pe ṭhin a, chu'ngte chu a tam lamah cheng nuai 10 vel lo tling ta se, Synod puihna nen nuai 20 vel tihna a ni ang. Cheng nuai a daih lo nasat em avang hian a thlengtu tan sum tam tham tak, cheng nuai 30-50 inkar vel deh chhuah belh a la ngai a, chu chu an hna pui ber leh hautak ber a ni hial mai thei. Sorkar sum beisei mai chu sum tam tham tuak dan a váng ngawt âwm asin.

Engtin nge ni zel ang le? Sorkar sum tam tham tak hmanga KṬP General Conference thlen ṭhin hi mi tam takin an ngaimawh tawh niin a lang a, sorkar sum ring lo hian neih theih dan kawng zawn a hun tawh viau lo maw? Synod-in tun aia tam sum a theh chhuak thei a nih si loh chuan, KṬP-te hian senso zawng zawng mahni intum dan kawng i zawng tawh ang u hmiang.

Kum thum emaw ni chu KṬP project lian tak, Youth Recreation Centre atan KṬP member zawng zawngte'n pawisa kan thawh khawm ta a, chuti chung chuan YRC-a hmalakna dinhmunin a la thleng thui lo hle. YRC atana sum thawhah hian KṬP member tam tak (a tam zawk pawh an ni hial mai thei) hian lungsi takin an pe em, tih pawh ngaihtuah tham a ni. A bikin, thingtlang, hmun kilkhawr zawka member tam tak hian hmang ṭangkai ve tak tak lo turah an inngai a, chu chuan sum thawh pawh a tiphûr lo a ni thei ang. Lungsi lo tak chunga member nih ve si vanga thawh hi tam tak an awmin a lang.

YRC atana KṬP member tinin sum kan thawh hi titawp ila, General Conference thlenna senso atan hian sum thawh khawm ve tawh zawk ila a ṭha ang em? A náwlpuia ngaihtuahin, KṬP member-te hian YRC ai chuan General Conference atana sum thawh hi kan phûr tlang zawkin a rinawm. A chhan chu - YRC chu kan hmang ṭangkai ve chuang lo ang, tihna rilru a lian a; General Conference erawh chu member náwlpui tan a ni a, keimah ka kal ve remchang lo a nih pawhin, kan branch-a ka member-pui tam takin an kal dawn a, an hmang ṭangkai dawn tihna rilru a awm ngei ang.

Kum 2017-a KṬP Rorel Inkhawm report-ah khan, kum 2016 chhung ringawta YRC atana KṬP member-te'n sum an thawh khawm kha Rs. 45,65,330 a ni a; YRC atan thawh tawh loin, a aiah YRC atana kan thawh ang zat chiah hian General Conference atan thawh ta zawk ila, kum khatah cheng nuai 45 chuang kan hmu dawn tihna a ni. Member-te'n nuai 45 chuang kan thawh khawm a, Synod aṭanga puina nen chuan General Conference thlenna senso hi a daih thuak dawn tihna a ni. Hetianga kan tih ngat chuan, sorkar sum rin vak a ngai tawh lo a, mi tam takin an sawiselna pawh a bo thei ang chu.

Mi ṭhenkhatin an sawi ṭhin chu, ṭhalai mi sîng tél pun khawmna a ni a, sorkar pawh a che ve tur a lawm, tih a ni a; a dik. Khua leh tui mi sing tél fê pun khawmnaah chuan sorkar pawh a che ve tur a ni reng a. Mahse, sorkar chêt dan tur chu, Conference thlenna senso lo tumsak ve lamah ni loin, ni tin mamawh - buhfai hnianghnar, power supply ṭha, water supply ṭha, kawngpui leh security ṭha lo pek ve kawngah a ni ang. Chu'ng atan chuan sum sên a ngai a nih pawhin, a sêng ve mai tur a ni.

Hawh u, ngun lehzualin i ngaihtuah tlang teh ang u.

Lalthlengliana