Pathianni bawhchhiat

Sorkar laipuia kan minister chuan Mizoram a rawn tlawh a, Pathianni bawhchhe kherin a rawn kal a. BJP an sorkar hnu hian Kristiante ni pawimawh ngaih pawimawh lohna hi kan hmu kan hmu ta mai a, a lawmawm loh hle.

India ram chu sakhaw thliar bik nei lo ram a ni a, chu­tihlai chuan India ram secularism hi sakhuana leh politics kal hrang hlawk ang chi a ni lo. Sakhaw tin ten zalênna kan neih rualin sorkar hian sakhuana hi a thlauhthla ta tihna a ni lo. Kan sakhaw ni pawimawh bawhchhe tur zawnga ram hruai­tute rawn zin hi ngawih liam pui mai mai chi niin ka hre lo a, tun hnu zela an rawn chin ṭhan loh nan thâwm kan neih a, kan state sorkar pawhin central lam a hriattir hi a ngai a ni.

Vanglaini chan­chinbu, January 25-a chhuaka Editorial-ah khan a rawn ziak ṭha hle a. Sakhaw hrang hrang kan awm a, kan tih dan leh ngaih pawimawhte hi kan inzahtawnsak a ngai a ni. Pathianni châm kher loin rawn kal ta se chuan buaina tur a awm lo a, Pathianni a châm avang khan mi tam tak chuan Pathianniah hna an thawh a ngaih phah a ni. Pathianni kan serh dan anga min rawn serhpui tur te, kan inkhawm dan min hriatpui tuma rawn kal te chu nise chu a hriatthiamawm hle a, chuti ni loa khatianga Pathianni châm khera a rawn kal kha chu Kristianna zah lo leh palzutah a ngaih theih a. Chu mai bakah Mizo mipuite min palzut tumna pawh a ni thei; Mizoram BJP pawh hian he thu hi central lamah an hriattir a, tun chinah chuan kan ni pawimawh bawhchhe lo zawnga lo zin tura hriattir hi an tih tur niin alang.

Tuna kan duh lohna leh kan sakhaw ni pawimawh bawh­chhe zawnga zin programme siam hi min zah lohna a ni tih hi kan hriattir loh chuan hetiang zin programme hi an la rawn siam fo ngei ang.

Mizoram Kohhran Hruaitute Committee pawh hi sorkar laipuiah zualko se an tih tur tak an ti niah ka ngai ang. Mizorama BJP hruaitute pawh hian Mizoramin kan rin theih nan leh, an sorkar zawm, central-a mite lakah Mizo thlavang an hauh ngam a ni tih an lantir a hun hle. Kan ni pawimawh bawhchhe zawnga an hruaitute an chet laia an lo ngawi mai mai a nih chuan BJP hi Mizoramah chuan a tla na lo tial tial ang a, BJP hruaitu zinga Mizo awm vete pawh Mizoram leh hnam tana ding loa mahni hlawkna tur chauh ngaihtuah ṭhinah kan ngai ang a, kan hmusit tial tial ngei ang.

State sorkar tan pawh Mizote ni pawi­mawh leh kan sakhaw ni serh bawh­chhia leh tibuai lo zawnga min rawn tlawh tura an hriattir ngam lo a nih chuan kan sorkar hian Mizote thlavang a hauh tak tak ngam lo tihna a ni ang.

Tunah chuan Pa­thianni kan serh ṭhin tibuai zawnga ram hruaitute programme siam a la tam lo a, amaherawhchu kan ngawih mai mai chuan a la nasa tial tial ang. Tuna kan remchan dan leh remchan loh dan kan hriattir ngam lo a nih chuan harsatna kan tawk hnem tial tial ngei ang.

Ramropuia