The Unholy Trinity - The Fools, The Silent Gentlemen & The Dirty Politicians!

Setana hnên aṭanga thilthlawnpek kan dawn zinga mi nung pathumte khian - ram, hnam leh sakhuana pawi an va'n khawih nasa tehlul em! Tute nge inhan bihchiang ang hmiang.

1. The Fools - Heti ang mi hniam, â leh mawl chhah tlat, keiniho Mizoram khua leh tuite hian thluak aiin kutzungpui kan hmang nasa a, chuti ang kan nih avang chuan ṭanchhan ziktluak (logical reasoning) awm miah lovin, kan rin thu leh zeldinna nen social media tualzawl leh buzawlah kan nghal hle. Bih chiang leh bel chiang mang hlei lovin, eng thu nge kan ken pawh zir chiang lovin, Facebook-ah kan copy paste nghek nghek a, Whatsapp group lamah lah forward kan ranzia chu pui tak a ni! Tawnhriat ngah leh dai zau zawk, kan mi bik leh val upa zahawm tak takte lah kan palzut thei hle! Anniho zinga hming pakhat han thur ila - amah Pu M. Lalmanzuala te ang tân phei hi chuan vun chhah hi a va ngai dâwn ṭhin e aw... An tu leh fate rual lek, keini ang hian diriamna leh deusawhna ṭawngkam nen a bawplawkah thu la in, buluk zetin ka'n ri ve ang phawng phawng a! Hringnun inrelbawlna kawnga râwntlak miah loh keini naupang rual â falte hian hawihhawmna reng reng nei lovin ka'n bauh ve khar khar ṭhin a nia! Rual ute hi an dawhthei asin aw!

Chutih rualin, kan pute zingah hian ṭhenkhat hi chu demawm viau mah se, a demtu lam hian hawih­hawmna râwl ri mawi zawk zonunmawi, aia u zawkte zahna kan hmang thei lo a nih paw'n, ramri chin fel tak neia duh lohna tarlang tur kan ni! Mahse, khiti ang khawpa chhah khi kan nih tlat avang khian dai pelh leh dai berh hun kan nei nge nge a, thuphachawina thu nen kan lal ram social media-ah ngei hian account thar nena bul ṭan ṭha leh turin tih tlawm leh nawr tawm kan ni fo!

Ât leh mawl lama phirpui kan neih ṭhenkhat erawh keini ang lo takin a derin an â bik. Anni chu an fing a, an ṭanghma hai an thiam em avangin an pute dik lohna kawchhung haitute ṭanhmun phet reng rengin an hmanhlel ṭhin. Anni chu keini angin an ri ve pung pung lo, zawitein pi leh pute nuih rualin an khi ve suk chauh zel.

Pi leh pu chuam an neih thiam miau avangin, nui chungin an in leh lo kalsanin bial vilna lamah hmuihmer nen an liam khu vut vut fo! Hlawkna tur a nih chuan an tlawm thei mai zel a, hlohna tur a nih erawh chuan an hotute thlazar hnuaiah a him chin aṭangin midang mawnga hiah kawngah an 'pro' ngang mai!

2.The Silent Gentlemen - Mi pangngai sawi ve tur nei ngeia kan beiseite an ngawi thei lutuk hi a buaithlak ṭhin mang e! A ngawi tur an ṭawng a, a ṭawng tur an ngawi a, thil hi a linglet zo ta!

Lehkhabu ziaktu leh fin thu rilpui pui nui heuh heuha sawi ṭhin, South Indian putar Sadhguru hian, "ngawih hi mahni inngaihtuah nachang hre lote zia" a tih mêk laiin keini ngawih dân ve thung erawh chu a danglamin a dangdai daih thung. Keini chu mahni kan inngaihtuah luat avangin hmasial takin kan ngawi thei hle!

Tlaktlum loh hlauh vâng leh sawisel tawrh ngam loh avanga khabe dawma mahni pindan chhungrila ṭhuthluang, dikna ṭantu nih aia sual en liam thei hi intodelhna duhawm lo zet, kan mamawh aia tam fê kan kawl ruih chu a ni!

Khawpui ṭhalai lehkha­thiam leh hawizau zawkte ngawi thei lutuk pawh hi manganthlak tak a ni. A him chinah, nula fing leh tlangval fakawm ten biak in bathlar bawr vêla a pawi lo tawk vêl chiah chiah zawi tê tê a phunpui ser ser an thiam lutuk te hian nghawng leh rah ṭha a va chhuah lo e aw! Nangniho hi in ngawih reng chuan, Irish pachal philosopher Edmund Burke-a thusawi, "Mi ṭha awm mai mai hi thil ṭha lo vulh lenna a ni" a tih kha a nemnghettu in ni hlauh dah ang e aw!

Ziaktu ngainatawm leh ngaihawm, kan Mafaa te kha chuan a lehkhabu Hringnun Hrualhrui-Mahni Pûte Sîk Chîng tihah khan, "Bâwng, mahni pûte sîk chîng chu a pute lakah a tlatlum thei ngai dâwn lo tih ka hre reng. Mahse, MAL-a tuitlâk ka duhna ai chuan Mizo literature ka duhsakna a khîn zâwk tlat si a', ngawi ka dawh hle hle thei lo ṭhin a ni. Ṭhahnemngai leh ṭhahnemngai chu kan inhuat zui phah pawh ka ring lem lo," a tih kha!

Keini chu kan ṭhahnem­ngaihna hi a la sâng tawk lo nge ni, ram leh hnam veina kawngah hian, a nawlpui chim chin aia hap sang zawk, thlek leh thlawp lam nei lem lo te aw hi a la chhang riau! Mifing, Pu Plato khan, "i ram sawrkar chetvelna i ngaihsak loh chuan mi â zawkte rorelna hnuaiah i kun a ang!" a tih kha darthlalang keh ve ngai lo, inbih chet chet nana rintlak em em a ni.

3. The Dirty Politicians - Thim zinga hmeichhe buanchak lo thil tih êngah a lang puar nawlh ṭhin ang hian, politician tenawmte thil tih chu an lirthei, in leh lo leh chapo taka an hawiherah a lang ṭhin! Heti ang mihring leh an thurualpuite bakah hian an chithlum lo liak mawm pha chinte hi Chunglamin a la ngaihtuah dâwn a, he planet-ah hi chuan vote hmanga lo hrem ve hi kan mawh a ni thung!

Kan sawi ta nual, lamlian tê zawkah erawh thlir ninawm loh a kuh ve ṭul tho. District Council hun laia Pu C. Pahlira'n ṭhahnemngai taka Lammual thlanga ek rap tlum hmak hmaka kawng a sial dân chanchin te erawh hi chu a va ngaihnawm si em. Chuti ang zelin, hmanni maia MP (Lok Sabha) inthlan campaign boruak dai ruih hnuaia fîm taka candidate zinga mipa pali thawm te kha a va changkang e aw! Ram tana ṭangkai lo, tih dân hlui khirh zet, mimal inbeihna ho tê tê aiin hmathlir an neih hmangin an inzuar a, khati ang kha chin zui leh chhawm nung zui tlak a ni.

Sawi hmaih phal chi loh - a sum hmuhna chân vek ngam khawpa AMC lama nula Baryl-i rawn penchhuak te, Aizawl hmangaih rum rut thlan tlin hmaih ni ngai lo Pu Rosiamngheta vision te, hnawkin a bawm balh loh Mayor kal chhuakta Pu PC. Lalhmingthanga te kha ṭhalaite hi chuan The Unholy Trinity zingah kan telh phalin a rinawm lo!

Thim thuah hnih an tih fo hi êng thuah thum hmanga chhanletna remchang an ni ang promising politician-te hian an nei e.

Tpa Bunghai