ZONUN ZE MAWI CHAWI SAN

“Zonun Ze Mawi chu tawngkama hrilhfiah leh hla-a sak fiah chi ni lovin a nuna nunpui tura Pathianin Mizo hnam tana a bik taka min pek a ni.”

Kan pi leh pute khan zonun ze mawi hi an khawsakhona-ah nunpuiin ‘sem sem dam dam, ei bil thi thi’ an lo ti ṭhin a. Ṭhenawmte thlai leh an-tela in vawm tawnin khaw chhungah ei tur nei lo, meialh en an awm bik ngai lo. Sa, ral leh kangmei a lo chhuahin thih ngam lu puin an thawk chhuak a, ‘dam leh tlang khatah, thih leh ruam khatah’ tiin zonun zemawi an lantir ṭhin.

Tunlai hunah ve thung chuan zonun ze mawi hmuh tur a tlem ta viau. Zawlbuk a awm tawh lova, taimak inzirtirna leh intodelhna ber thlawhhma la tlem tial tialin, zualko kal a ṭul tawh lo a, mi hrang, sa hrang leh huai hun a liam a, thim a kiang a. Christianna kan vawn rual khan kan hnam min ti mawitu zonun ze mawi kha kan hlamchhiah ta em ni le? Zonun ze mawi hi christianna nen ain kalh lo asin.

Chhungtin khawsak leh eizawnnate chu kan pi leh pute hunlai ai kha chuan a hahdam ta hle mai, chutih rual chuan zonun ze mawi hi Mizo hnam tana siam a ni ta lo em maw ni chu aw tih tur khawpin khawtlang nunah zonun ze mawi hmuh tur a tlem tial tial a. Hnamdang laka kan hranna leh kan danglam bikna, Pathianin a bik taka Mizo hnam tana a siam, min pek chu a dal ta riau angah a ngaih theih awm e.

Zonun ze mawi hi ral mai thei a ni lo, kan nihna, Pathianin Mizo hnam tan liau liaua Isua Krista nun dan zemawi tak leh christianna nena inhmeh em em tura min pek kan pian chhuah pui a ni.

Hmanlaia Mizo nuna zonun ze mawi tak ang kha tunlai mite nunah pawh hian a la awm reng a, hmanlai hun angin hman chhuahna hun leh tih lanna hun erawh a tlem tawh thung. Zonun ze mawi lantirna langsar tak pakhat, ‘sa’ leh ‘ral’ a awm tawh lova, khawsak a danglam a, khawvel hranah kan cheng ta a ni ber a. Kan khawvel hman mek ruala ke penin mi tinte kan hmanhlel ta zawk a ni.

Heng avang hian zonun ze mawi hi kan mamawh tawh lo tihna erawh a ni lo. Mizo hi chu a huhova cheng ṭhin kan ni a, kan nun honaah hian zonun ze mawi lantirtu leh chawisangtu kan nih zel a ngai. Thiamna a san ang zelin zonun ze mawi hi kan chawisan ve zel a ngai a, hnamdang karah pawh zonun ze mawi hi a hnawksak lova, hnamdang laka zahawmna min petu a ni zawk.

Kan hnam nun mawi hian palzam a hlawh em em a, Mizo hnam nun pela nun hmang kan pung tual tual a, khawtlangah mawhphurhna nei ve lo anga inngai kan awm a, khawhar ina kal nachang hre lo leh lumennaa kal ngai lo, thlan laih pawh tum lo kan awm ta hial mai. Heng avang hian tunlai huna kan la nunpui theih leh kan mamawh em em zonun ze mawi hi chawisang tura kanin zirtir sauh sauh a ngai.

Pathianin’a min pek zonun ze mawi pianchhuah puitu kan nihna hi in hrilh hriaa inzirtir thar lehin, ṭawngkama hrilhfiah leh hla-a sak duh tawk mai lova a nuna nunpuitu nih ṭheuh i tum ang u.

Chhakchhuak Entlinga