THUTLUKNA SIAM KAWNGAH SORKAR A HUAISEN A NGAI (Sorkar hi NGO leh Kohhran phenah a biru fo tur a ni lo)

Covid-19 a ni emaw ramri buaina a ni emaw, eng issue pawh ni sela, Mizoram sorkar hi NGO leh Kohhrante phenah hian a biru fo tur niin a lang lo a, huaisen takin sorkar a nih angin thutlukna a siam ngam tur a ni.

Thil thleng eng­emaw a awm hlek a, mipuia thiam chan nan leh hmai phihfai nana NGO leh Kohhran hruaitute pun buai sek a, meeting neih pui sek hi sorkar chak lo leh dawihzep zia a ni.

Mizoram Sorkar hian issue pawi­mawh­ah mithiamte rawnin, huaisen takin mipui dinhmun leh thil awm dan thlir chungin thutlukna siam ngam tawh zawk sela a duhawm hle.

Kohhran hi thlarau lam thil a ni a, ram rorelnaah thuk taka inrawlh tir fo tur niin a lang lo; chutiang bawkin sorkar pawh Kohhran rorelnaah a inrawlh fo tur a ni hek lo. NGO-te pawh ram hruaitute tan rawn fo a ṭul hek lo; kaihruaitu tur zawkin a kaihhruai turte a rawn a rawn chuan hruaitu ni tlak an ni lo tihna a ni!

Sorkar tan mithiam bikte (expert) thurawn lak a ṭul hun erawh a awm fo ve ṭhin. Kohhran hruaitute leh NGO hruaitute telna awm chi, rawn an ngaihna awm chi pawh a awm ve zauh awm e. Chutiang ni lo a, issue lian a awm hleka Kohhran leh NGO-te kan pun a, an tel loa kan kal hleithei lo fo a nih chuan eng nge ram hruaitu kan nih a ṭulna? Eng nge sorkar awm a ṭulna? Pawn lam aṭanga thununtu ngah lutuk tan hruaitu ṭha a nih theih dawn em ni?

Sorkar thila inrawlhna awm chin hi Kohhran hruaitute leh NGO hruaitute pawh hian hriatthiam a hun tawh viau mai. Sorkar rorelnaa kan inrawlh sek a, thu­tlukna pawimawh kan siampui fo chuan, pawimawh ta viau angin inhre mah ila, nuam ti viau mah ila, Politics ball-ah kan tang fo ang a, kan hriat loh karin Politics-a hmai phih faina hmanrua kan ni zel ang.

NGO leh Kohhran kan nih anga kan tih tur pangngai bakah hi chuan in ham hnawk vak lo ila a duhawm ngawt mai.

C. Lalhriatpuia