Rilru Rûntu Rûkru Rilru

Ram leh hnam humhalh kan tumna kawnga thil huatthlala awm deuh mai pakhat chu rûkru rilru hi a ni. He thil hian nghawng a nei lian hle. Rûkru rilru hian kawng hrang hrangah min rûn mah se intihhlimna (entertainment) khawvêl bîka min rûn dân chauh thlur bing dâwn teh ang.

Mizo film: Tlêm lai deuh khan Vaiva­kawnpa Sangzela Tlau khan ‘Sensiari’ tih film hmuhnawm zet mai a rawn tichhuak a. A changtute pawh an zei a, chanchinbu-ah pawh fakselna thu leh hla a tam hle. Film dang hmuhnawm tak tak, mittui titla thei hialte pawh a lo chhuak ve nual tawh a, kan hnamzia leh dinhmun zira chan an nih hlawm avângin hmuhnawm kan ti bîk thei hle. Tûn hnaiah Khawnglung Rûn, Lungdumtu, Nunna Thar leh Laltheri tihte a rawn chhuak leh a, video picture quality leh an aw (voice) te pawh a fiah ṭha tawh hle a, full high definition-in an siam tawh bawk a, en a nuam tawh bîk hle.

Nimahsela, film siam lamah hian hma kan sâwn chak lo hle mai. Hei hi rûkru rilru kan put vâng niin a lang. An film siamte hi kan hlutsak viau rualin kan leisak duh leh si lo a. Lo leisak ṭhin chu ni ila professional actor/ actress kan nei ve nual tawh tur. A thlâwna neih kan tum vek zel a! Professional footballer nei thei chuan professional actor/ actress pawh kan nei thei tur a ni. A thlâwna neih kan tum tlat avângin hlâwkna awm loin an ti ṭha duh tawh lo ni berin a lang. Hemi avâng hian Mizo film siam turin mi lâr leh thiam tak takte an rawn pên chhuak duh lo niin a lang. Tun hnaia an siam tharte pawh miin min rûksak palh ang tih hlau êm êm chungin hmun hrang hrangah uipui sa ruh chhar ang maiin hauh na êm êm chungin an han kal kualpui a, fimkhur takin an chhuah a, bazaar-ah chuan lei tur a awm meuh lo. A khawharthlâk hle mai.

Hei vâng hian sap, korean leh vai film lehlin tih vêl ringawt kan tui pui a, Mizo hnamzia a tel si lo a, hemi kawngah hian chîmralin kan awm mêk a ni ringawt.

Kohhran hrang hrang ṭhalaiten rawngbawlna tiin film tawi tête an siam a; nimahsela, Pathian thu lam hawi deuh vek a ni hlawm a, chu bâkah, mahni kohhran ṭhalaite siam a nih lêm loh chuan denomination rilru avângin kan en ṭha duh vak lo a, a hit hlei thei lo. Mizo zawng zawng tâna siam film puitling en a châkawm hle mai. Mipuite hi rinawm ila, Mizo film-te hi hlutsakin film pakhata nuai 15 vel tal an hmuh theih nân lo leisak zel ila chu film hmuhnawm tak tak kan ngah tawh tur. Miss Mizoram Rody te leh, zaithiam leh lehkha thiam nula/tlangval hmelṭha leh pian nalh tak takte rawn pên chhuak bawk se a va’n hmuhnawm dawn tak êm!

Mizo drama: Thangkura Drama Party, Tuarpuii bâkah Mizo Charlie Chaplin (Salemthara Pachuau) te reh deuh hnuah Zephyr Drama Club an rawn chawr chhuak leh a, min tihlim thei hle. Hêng Mizo drama-te tluka min tihlim leh kan Zoram dinhmun hailangtu, insiamṭhat kan ngaihna min kawhhmuhtu a tam lo tawp ang. Nimahsela, rilru leh ngaihtuahna, hun leh tha leh zung tam tak sênga mipui en theih tura an rawn chhawpchhuah vete hi ngaisâng hle siin leisak kan tum leh pek lo a. A thlâwn bawka neihsak kan tum avângin an ti ṭha duh lo niin a lang. Phûr tak leh inphal taka lo leisak sup supa nuai tam tak an hah man têltir ve ṭhin chu ni ila drama ropui tak tak kan nei nual tawh tûr.

An talent (script writing & acting) ropui tak tak hmanga kan hnam hmasâwnna tûr min kawhhmuhtu tûrte kha kan rûkru rilru avângin kan tihkhawlohsak vek. A pamhmai tak zet a ni. Rûkru rilru hian ram leh hnam humhalh kawngah min dâl chiang hle.

Mizo Music Video: Audio Cassette hun lai chuan lengzêm, lenglâwng leh gospel album-te kha duh duha dubbing theih a nih loh avângin dawr-ah lei tûr a tam hle a, beng a tlaiin zaithiamte pawh an lâr thei hle. Tunah chuan a video nen uluk thei ang berin sum tam tak sengin an siam a; nimahsela, rûkru rilru bawk avângin tuma’n an siam duh tawh lo. Khua a va har tak êm! A siamtute paw’n TV lamah an pe zêl a, mi zawng zawng kal theih lohna concert-ahte an zâi vêl ta mai mai a, duh hun hunah kan thlirin kan ngaithla thei tawh si lo. Hei vâng hian zaithiam chhuak tharte pawh an lâr dân a nêp tawh. Album chuti zât kan siam tih tur an nei hlawm lo bawk ang.

Rûkru rilru chuan min rûn lo se chu music video album ṭha tak tak lei tur kan nei reng ang a, zai leh music quality-ah an inel ang a, mit leh beng a fah khawp ang. Rimawi lama ram leh hnam hmasawnna tur dâltu chu kan rûkru rilru hi a ni.

Tlipna: Zaa za Kristian inti rama rûkru rilru hlir ka pu fer fur mai hi chu a zia lo deuh chu a ni. Zu te pawh pawisa ui loin kan lei mai. A thlâwna neih kan tum lo. Nun tihlimtu leh thil ṭha min zirtirtu hêng kan unaute thiam thilte hi rei tak kan neih tur, kan rilru tihlimtu tur leh kan nun kaihruaitu tur an ni. In zawh, ei zawh, zûk zawh, inchiu zawh nghâl tur thilte nên an inhlut hleih lutuk. Professional zai thiam, lemchan thiam, fiamthu thiam kan neih theih nân leh ram leh hnam humhalh nân rûkru rilru i paih bo tawh ang u hmiang.

Miltona, Vaivakawn