Facebook hman dan chipchiar sawi ka tum lo va. A hman dan hrim hrim sawi tur chuan kei aia hre ril zawk leh ṭha zawk an awm pawh ka ring.
Facebook hi Pathian rawngbawl nan te, mi lungngai hnem nan te, chhiat tawh chungchanga zualko nan te leh thil dang dangah ṭangkai takin kan hmang ṭan niin a lang a, hei hi hmasawnna chi khat chu niin a ngaih theih. Ka sawi tum ber erawh chu- thu sawi leh thlalak kan dahah hian tun ai hian fimkhur leh uluk deuh zawkin i ti ang u tih hi a ni.
Mizote hian Zoram chhungah mai ni lo, khawvel dumhmun hrang hrangah facebook kan hmang ta a, khawvel dâpin fb kan hmang ve ta, tiin sawi ta ila, rilrua kan huap tir chin a zirin kan sawi sual lo maithei.
Facebook-ah hian thlalak kan dah reng reng hi tu pawhin hmu se, hmuh nuam thei ang ber tura ruahman ni thei se a duhawm hle mai. Kan zalènna hian tawp chin a nei a, khuahkhirh zalènna a ni tih hre reng chungin eng thu pawh sawiin khel ho ila zalen tak si, mi dang pawisawi hlau tak chung siin ṭawngkam i chhuah ang u.
Fb-ah hian kan duh duh thlalak kan dah a rem lo tih i hre bawk ang u. Tin, dan lek kawhtute leh roréltuten min manin min hrem kher lo mah se, hnam dangtena min hmuhsitna leh min entleuna thlen thei tur thil reng reng, entir nan, zahmawh lam rawng kai thlalak te, thawmhnaw tlem lutuk inbel chunga thlalak dah te hi i ching lo vang u. Mizo hmeichhia ni awm tak, hnam dangte inîttír tum ni awm taka thla laa fb-a dah a, hnam dangtena ṭawngkama an bawl mêk kan awm em tih te i inenfiah bawk ang u.
Tin, damlo na tuar hmuh hrehawm lutuk hmel te; chutiang a nih kher loh pawhin, natna khuma mu dam lo hmel hmuh hrehawm chin (ti mai ang) te, ICUa dam lo mu lai thlalak ang chi te, chêt sual (accident) lai rapthlak tak lem te hi kan hmel hriat leh chhung khat hnai vai tak, kei ni tana hmuh nuam tak pawh ni mah se, mi dang tan hmuh a nuam lem lo vang tih hria ila. Facebook-ah kan dah duh a nih pawhin mi dang tana hmuh nuam lo leh hmuh hrehawm lo tur chin dah tum hram hram a ṭha. Mitthi hmel phei chu dah hauh loh ni se a ṭha ber ang. Kan dah duh a nih pawhin ruang a ni tih hriat thiam theih a nih chuan a tâwk viau ang.
Keini Zofate, kawng hrang hranga hmasawna lam pan mékte hi facebook hmanah kan fimkhur deuh deuh a ṭul hle. Thlalak mai bakah pawh ngaih dan kan sawiin pi leh pute nun dan ṭha chhawmtu hnam kan ni tih hre reng chungin ṭawngkam mawi leh hawihhawm kan hman zel a pawimawh a ni.
Dr. JT Vanlalngheta Hlawndo