YOUTH RESCUE CENTER KAN MAMAWH (Sponsored by Govt. of Mizoram)

Tun hnaia Mizo­rama ṭhalaite dinhmun chhuttute chuan ngawlvei mi 25,000 vel awmin an hria a, chuta mi 10,000 chu zu ngawlvei an ni a, mi 15,000 vel chu ruihhlo chi dang vei niin an sawi.

Heng mite zinga mi 2,000 vel chu NGO hrang hrangte leh mimal tlawmngaite buatsaih Home eng­emaw zatah enkawl mekin, mi sang tel chu Dropping Center 18 velah nitin an kal bawk niin sawi a ni. A tak takah chuan hei ai hian an tam a rinawm.

Ṭhalaite hi ram leh hnam intohdelhna leh dinchhuahna tur an nih laiin fanghmir changpat zawn ang nuaih kan la ni si. Chhanchhuahna hna­thawhnaah te hian direct-a sawrkar in­rawlhna a awm lova, sponsor-tua ṭanna pawh a nei hek lo. Kan political party-te hian an vei pha miah lo a ni.

Mizorama chhung­kua pathum zela pakhat vel ang chu eng ngawl emaw vei an ni a. Sum sem an hmanna enzui tak tak si loh te mipui thatchhiat zirtirtu a ni. Nun kawng dik lo zawk mekte chhanchhuahna hmun ṭhenkhata vanduaina thleng ṭhin te hian sawrkar a ko ei zo chuang miah lo! Sawrkarin vaihlo kaihhnawih- meizial, sikret, sahdah, tuibur, kutkha products, etc. a buaipui aiin enkawl ngai khawp ngawlveite hi ngaimawh zawk se kan ram hian a ṭhat pui zawk ngei ang.

State sawrkar sponsor-na hnuaia ‘Youth Rescue Center’ din ka rawt a, hei hi Political Party ten vote bank atan ṭa zawka an duan chhuah theih ka ring. Sawrkarin khawpui hlat lutuk lovah hmun zau tawk buatsaih se, a chhungah ngawl chi hrang hrang veite tan hmun siamin drop-in-center mai ni lo Damdawi In nen ṭhutchilh se. Counselling Center te, Camping Center te siam ni ta sela, security department ṭha tak awm se a ṭhat a rinawm.

Sawrkar chuan a hnuaia department te thiam thil zir leh siamna hmun te buatsaih tir se, heng unproductive group-te hi productive group-ah a siam theih a ni. Entir nan Industry Department chuan furniture workshop te, auto-engeneering te, mobile repairing te etc. din se. Education Department pawhin zirna pangngai bakah a penhleh tih tur an ngah a ni. Agri leh Horti pawhin prac­tical-a zirtir theih tur an ngah ang. Health Department, Social Welfare Department leh department dang pawhin ṭangkai takin hmang hlawm se.

Israel rama Kibbutz, ṭhalai mahni ina leng lo tlan­khawmnate chuan an ram economy-ah an thawh hlawk hle a ni an ti. Heng ngawlvei sing tel tak meuh kan ramin a kawl mekte an lo fihlim duak chuan hmasawnna ropui tak ani ngei ang.

Duhkima, Kanan