KAN HIM NAN... KAN BEI ZEL DAWN
Kar hmasa mai khan ka ṭhianpa Doctor Covid 19 hri vei, ZMC a awm mek, Oxygen hman ngai hiala awm ve hman nen kan inbia a. Ti hian a sawi a, "Han vei meuh chuan a dan a lo dang khawp mai, ngaihtuahna in kiltin a hrut chhuak a. Mi zawng zawngah a thawh dan a inang vek si lo, keimahah hian eng ang takin nge a rawn thawh ang aw? tih kan ngaihtuah a. Oxygen leh Concentrator-te an rawn hnuh hnaih rawk rawk mai chuan a dan a lo dang daih mai" tiin min hrilh a. A sawi zel a, "Fimkhur chin lem nei lova fimkhur tur a lo ni," a ti. He a thusawi hian thil tam tak min ngaihtuah tir a, sawi thui lo mahse, a sawi tam hle in ka hria.
Zana Damdawiin aṭanga mitthi kan thlah liam turte khan ngaihtuahna a va tithui ve aw... An khuaah phurh haw a ngai a, a awmpuitu a nupui Covid 19 a lo positive ve chiah mai si. Pasalte hun hnuhnunga mahni in lumah pawh thlah thei lovin zanin aṭangin Aizawla enkawlna hmunah hun a hmang ve ṭan dawn a ni a. Hun pangngai chu nise, chhungkhat laina ṭhenrual ṭhate nen, kan in tawrhpuiin kan in ṭahpui hawm hawm ṭhin a. Kan inhnem tawn ṭhin kha a nia. Hun hi a va danglam thei em ve aw!
Kan chhungte Covid 19 vei an lo nih chuan, an damloh chhung zawng kan tlawhpawh thei lova, min mamawh ber laiin an bulah kan awm thei ta lo phawt a. An serious zualin ICU a awm ngai an nih pawhin, an hmel kan hmu thei ta lo. He hripui hian kan nunphung min va sawi danglam sak nasa tak em!
Covid kâra nunphung dik (Covid appropriate behaviour) hi kan zawm ṭhat a ṭul ta takzet a ni. A theih hram chuan he hripui hi kai loh kan tum tlat ang. A tuartu in eng ang takin nge a tawrh dawn tih kan hre lawk thei lo. Mithiamte pawhin an chhui nasat em em chu, a ṭhenin an la na lem lo a, a ṭhenin an la na em em a, an thih pui hial mai ṭhin te hi eng vang nge ni? tihte hi a ni.
Mitinin tihtur kan nei, tun aia ṭan lak kan ngai, kan case neih a tlahniam thei lo. Kan hmalam hun hi a eng viau lo a nia. Damlo dahna tur kan indaih loh palh a hlauhawm. Enkawlna mamawhten enkawlna an dawn ngei a ngai.
Veng ṭhenkhat LLTF ten an sawi chu, "Kan leng chhuak lo an ti a, CCTV aṭangin a ṭhen chu kan en let hial a, an lo chhuak reng si" tih te, "Home quarantine lai ei tur pek kan tum a, an chhungin an lo awm lo" tihte sawi a awm tlat mai. Kan himna tur hian tih ve tur kan nei, nidanga kan awmphung pangngai angin kan him zo ta lo.
Midangte himna tihchhiatsaktu kan ni thei, an nunna thlenga dinhmun derthawnga din tirtu kan ni thei hial awm e. Inlêng hnar hi a Mizo lova, tu pawhin ṭhat chhuah kan duh ṭhin. Mahse, hripui lêng leh inleng neih hi a inmil lo hle.
Hawh u, i ṭang sauh sauh ang u. Lockdown reng theih a ni lo, mahse, Lockdown loh avanga zalenna famkim nei ta anga kan in ngaih mai chuan kan ram hi dinhmun derthawngah kan dah ang tih a hlauhawm ta e. Hripui len lai hian dam khaw chhuah kan khel tláng tih pawm tur a ni.
A hrik insiam danglam (variant) hi rawn chhuak zelin, kai awlsam zawkin, natna na zawk a lo thlen thei a nih pawhin, Covid kâra nunphung dik (CAB) hian min chhan thei a, min tuar nep tir thei tih kan hriat reng a ṭul. Hun rei lo chhunga mahni leh chhungkua kan inthunun hram hram chuan, kan ram hi dinhmun duhawm zawkah kan dah thei ngei ang. A hri kai kan tlakhniam hleihtheih loh avanga chauva beidawng mai lovin, kan bei zel ang a, kan la hneh ngei ngei ang Pathian zarah.
"Tlâng lamahte khian ka mit ka len chho vang: Khawi lama mi nge mi ṭanpuina tûr lo thleng ang? Mi ṭanpuina tûr chu Lalpa lei leh van siamtu hnêna mi a lo thleng ang" - Sam 121:1, 2.
Dr J Lalramchhuanga MD (Medicine)