KAN DINHMUN A ṬHA VAK LO

COVID-19 hripui hian tun dinhmunah hian min nuai nat ṭum ber a thleng mêk ti ila kan sawi sual a rinawm rih lo. Aizawl khawpui bikah tuk tin mai hian tun hnai tê hian Veng 30 chuangah 'HRI KAINA CHIN HRIAT LOH CHHUI NGAI' kan awm ta ziah mai!

Tukin (13/7/2021) result kan en pawh hian hri kaina chin hriat loh chhui ngai Veng 38-ah kan awm a ni. Veng khatah sawm dawn dawnte an kai thar reng bawk. Aizawl ni lo, District 10 dangah pawh hri hi a darh nasa hle a, Kolasib District chauhah pawh tukin khan hri kaina chin hriat loh chhui ngai Veng/Khua paruk (6)-ah ngawt a awm. Home Quarantine lai Positive hi ngaihṭhat ngawt chi a ni bík lo a, hengte nen phei chuan kan dinhmun hi a chau hle.

A VÀNGLAI:
Tun hun hi Mizorama Covid hripuiin min tuam nat ber hun a ni chho mêk a, Mizoram puma hri kai hmuhchhuah pawhin 500 a chuang zak zak reng mai. Kan population chhûtin ni khata hmuhchhuah hi a tam mah mah. Mizorama test tawh aṭanga chhutin mi 1000 zelah 22-in hri an kai a, (kum 2011 chhiarpui behchhanin) mi 100000 zelah 10-in Covid-19 vangin nunna an chân tawh a ni.

ENKAWLNA INDAIH LOHNA:
COVID-19 atan liau liaua Damdawiin Mizorama kan neihchhun (Covid dedicated Hospital) chu Zoram Medical College (ZMC a hun hmasaa din ṭha lehtute'n MIMER an tih) Falkawna mi saw a ni a. ZMC-ah hian Ward 7 awmin khum 237 a awm a, ICU khum 34 a awm bawk. Damlo a enkawl theih bak ZMC hian a enkawl a ngaih tak fo avangin Kulikawn Hospital chu Covid dam lo nazual enkawlna atan siam belh a ngai dawn ta hial bawk. Hetih lai hian thawktu an indaih lo tih nimin Health Minister hova Meeting thuchhuak aṭangin kan lo hre ve leh ta zel bawk.

Ṭan lakna tur a tam hle mai, Ramri buai hi buaipui ngai hmasa viau ni mah se, he hripui hi kan ralpui phiar zawk tura leh kan do tur dik tak zawk niin a lang.

KAN ZALÉN SI:
Zalèn taka khawsak kan duh a, tun dinhmunah chuan kan zalèn leh ta hle mai. Khawlaia chhuak kan tamin Task Force lehkha ngaipawimawh lem loa duh duhnaa kal pawh kan tam leh ta. Eng vangin nge thla hnih lâi hnuah pawh 'hri kaina chin hriat loh chhui ngai' hi kan tam zual tak em em! Uluk taka kan inenfiah a ngai. Tawmim vek tura ngaih si kan hri kaina hre lo Veng 30 chuang chuangah tuk tin kai thar kan awm chuan hripui hi hmun tinah a awm tawh tihna a ni ber mai.

Third Wave a rawn thlen hma hian Second Wave vanglai, san lai ber (peak) hi tunah hian kan tawng mêk a nih dawn hi. Mi tin kan fimkhur zual a ngaihna em em chu a enkawlna luangliam nasa kan indaih tawh lo lutuk hi a ni.

SORKAR:
Mizoram State pakhat sum bawm kawltu an ni miau a, Sorkar kan sawi lo thei lo. Eng nge kan mamawh? A hmasa berah chuan hmanrua, hmun leh thawktu an ni. Aizawlah chuan ICU neih belh hi kan mamawh chhanna hmasa ber a ni. Chutihrualin Lawngtlai aṭanga ZMC rawn pan pawhin kawng lakah nunna an chãn ta!

Sorkarin mut mawh hnar mawha a neih tura chu Rawmi tih vel mai mai ni lovin District Headquarters tinah COVID DEDICATED HOSPITAL (Covid damlo bik enkawlna tur Damdawiin) rang taka siam hi a ni. Aizawl bikah hian he hri hi a nasat em avangin rang leh zualin ICU siam belha thawktu lak belh zung zung a ngai, chutiang zelin District dangah pawh. Test hi TreuNat a muan em avangin Lungleia RT-PCR saw Court vela pehhela insawithiam phêt tum lo hian Sorkar hian bun nghal rum rum se a ṭul bawk.

Tun ang dinhmun khirha kan awm mek laia mipuiin ṭul rih lova kan ngaih hmalakna dang Chief Minister leh a Minister bawh chak takin an lo nei fo hi a pawi hle a, a tlai hma hian insiamṭha thuai teh se.

Zoa Tlau