Sorkar hnathawk motor 2 kawl Leh sorkar inremchemna turte

Mizoram sorkar chuan inren­chemna policy a kalpui mekna hnuaiah sorkar motor thar lei belh loh a tum thute kan chhiar hnuah kan Minister leh mi pawimawhten motor an la nei thar zel hi chu lo dah ṭha ta ila, kan officer zinga miten motor pakhat aia tam an kawl fer fur mai hi chu tih tawp dan a awm lo vem ni le? Kan sorkar pachhe tak tan sum paihna mai mai hi titawp turin hmalakna a la awm lo vem ni le?

Tun hnaiah pawh hian Department head zingah motor pakhat aia tam kawl hi an la awm fo a, Vanglaini ah pawh hian ziah lan a ni tawh bawk. Chuti chung pawh chuan kan sorkar hian in renchem hi kal pui a duh tak tak lo niin a lang.

Tunah hian Home Department hnuaiah hian police lal zingah motor pakhat aia tam kawl, an motor pakhat zawk chu an nupuite hman atan mai maia an kawl niawm taka an nupuite chuanna ṭhin hi a la tam a. Police Station ṭhenkhatah an OC ten motor ṭawng tak tak an kawl laiin sem rual a ṭha a ni.

Tunlai motor hi chu a changkang tawh hlawm khawp mai a, Police hotu zingah Compact SUV pahnih kawl te an han awm hial a, pakhat zawkah designation plate leh a VIP light kan tih ang chi khuha an nupuite chuang hi kan la hmu cheu mai nia! Hetiang te te hi sorkarin pawisa a neih loh hi chuan vil deuh chu a ngai a, Police officer zingah huan nei ṭha an tam thu leh an huanah hian Police constable an awm fer fur an tih te pawh hi tun hma thil kha ni lovin tun lai thil a la ni reng tlat mai.

A Ardali (Orderly) neih theih zat dik thlap hi chu officer te entitlement a nih avangin dan bawhchhiatna a ni lova, dan phal baka sipai pawl te thleng hian ramri buai leh Covid-19 duty indaih loh lai hi chuan en fiah ngam a ṭha ngei ang mawle.

Tin, Department dangah pawh hian truck leh bus hian hman a hlawh deuh bik a, mimal thilah leh department pawna pawl hrang hrang tan an hmang nasa tih pawh hai tur rual a ni lo e. Mizoram sorkar hian inrenchem a kalpui rual hian ven tur a ngah khawp mai.

Secretariat lama Officer in quota anga fourthgrade chhawrna hlawh ang chi an la tel, an tihte pawh hi dawt nge thutak hai chhuah vat a ngai a ni.

Lalremruata