Mipui min zahna reng an nei lo!
Congress leh MNF party hian Zoram mipui min zahna reng reng an nei lo a lo ni a. Zah tlakah min ngai reng reng lo hi engvang nge ni ta ang? A chhan a awm tur a ni a, thudik kan hriat tlan pawh a pawimawh hle.
Tun hnaiah driver pakhat chu CM vengtute'n nasa takin an sawisa a. An ze ngai bawk chhuahin Congress party chuan ngaihdam dil aiin insawifihlim an tum leh ta chiam a! Zoram mipuite hi min zahna eih an nei lo!
MNF lam pawh hian kan tisual a, min ngaidam rawh u zawng an ti ngei e. Nimahsela, candidate chuh thawm awmah leh NLUP, hming dang vuaha SEDP min zawrh danah hian danglam tumna chhe tê pawh an nei lo tih a lang reng.
Heti tak maia Zoram mipuite, party pahnihin min zah lo ta mai hi kan thiam loh a nihna chen a awm ve ta tlat mai hi a pawina lai tak a ni tlat mai a ni. Khang an dawt sawi liam tak zozai avang khan zah tlak kan nihzia kan lantir tlat loh avangin an duh dan danin an nung ta mai reng a ni.
Nimahsela, Zoram mipui hruai nuam tak leh thuawih takte ni lovin party zawkte hi dem tur an ni kumkhua zawk si ang. Insiam that tum ahneka chapo tak chunga ngaidam dil leh thupha chawi, an tân thianglo ang hrima an inngaihna hi Zoram mipuite hian in en liam mai mai ang maw?
Kan Pathian, malsawmtu leh dawt sawi ngai lo hian chutianga kan awm a phal hlawl lo! Vawi khat êm pawh ngaihdam dil tur khawpa inhnukhniam thei lo khawpa chapote hian anmahni siamtu kan nihzia an hriat a ngai a ni ve tawh zawk.
Pathian betu satliah ni lo, Pathian Nung betute hian engvangin nge sual hi kan huat ngam hlawl loh a, dawt sawi hi kan palzam leh mai thin? Engvangin nge ram hruaitute leh an thuihhruaite hian dân chunga lênga an duh ang anga khawsa theiah an inngaih tak mai?
Tham lo taka an dawt sawi leh insawifihlimna ngaithla fo tur hian engvangin nge kan beng kan dawh a, kan mit kan men reng duh cheu ang? Ni lo, a tawk zozai tawh i tingam ang u! In tingam ngang lo a nih chuan in sakhua tal thlak danglam ngam rawh u!
A tawk ka tiin keimah chauh pawhin tang mah ila, heng mite hi a nuna ka nun chhûng, an inthlak danglam hma loh zawng ka doin anmahni kalh zawng leh an tih dik loh tarlangin ka tang ral raih ang. Dikna leh felna Lalpa hi ka lamtang erawh a ni kumkhua thung dawn tih ka hre si a.
Liana Pachuau