Khawpui enkawl hna

Mizorama Muni­cipal din duhna avangin hman deuh­ah khan Municipal Steering Committee tih emaw ni kha an awm ṭhin a, hmel­hriatte ka neih ve avangin an titi pawh ka ngaithla ve nual hman. Tunah kan khawpui ber Aizawl chuan Municipal Council mai ni lo Municipal Cooperation a nei ta a, beisei a phak lo hle a ni.

AMC-a sum awm zat hi mipui hian kan hria em? Aizawl pawna chengte tana thik em emna tur khawp Aizawl khawpui enkawlna atan hian pawisa dah a ni. Heng pawisate hi Mizoram sorkar khawih theih pawh a ni lova, AMC-in Aizawl an enkawlna leh an cheina tur liau liau dah a nih chu mawle.

Heng pawisa zozaite hi AMC term hmasa berah khan awmze nei mang lovin an hmang ral ṭhak thei nia. Kha AMC term hmasa ber kha chu ‘musical chair’ ang deuh kha an ni a, an in lal chhawk kual zak zak a, hna pawh an thawk hman bar lo. Chutihlaiin pawisa awm ang ang kha chu an hmang zo hman em em bawk si a ni. Kha term AMC khan pawisa kha an intheisem vak mai a, mi hrang hrangin lalna an chan avang khan an sorkar chhung khan an sem kual den den mai a, AMC kha a bul ṭan dan a dik lo a ni.

Tunah hian AMC term thar a lo ding leh ta a, anni hi a hma aia ṭha hret tura beisei an ni. party mal enkawl an nih vangin sorkarna nghet tak an nei a, sum pawh a hma term aiin an nei tam zawk. Tuna kan hmuh chinah hi chuan hmun ṭhenkhatah a langsar laiah hna an thawk den den tih kan hmu a, an sum sen leh an hna en mil hian AMC term thar pawh hian beisei an la phak lo hle. pawisa tam si, hnathawh hmuh tur tam si lo hi a buaithlak ṭhin. An hnathawh hi kan chik chuan kawngpui kamah mipui hmuh tur a ni deuh zel a, hei hi khawpui hmasawnna kengkawhtute hna­thawhna tur hmunah kan ngai lova, a langsar lo laiah pawh hna ṭha hi thawh tur tam tak a awm a ni.

Mizoramin Mu­nicipal Council kan han nei ve a, Ai­zawl­ah ṭan a ni. Nakinah chuan Lunglei leh khawpui dangah pawh kan la nei zelin a rinawm a, hma­sawnna tur a la tam hle a, khawpui enkawl hna hi thil namai lo tak a ni tih pawh kan hre ṭheuh awm e. Aizawlah khawpui enkawlna tur liau liau pawisa tam tham tak neitu, Aizawl enkawl tura thlan tlin liau liauten an hman dan en hian kan inzir nasat a la ngai a ni.

Lalramthara Chenkual